Asan-Ibo 2 - Edo Bible (E Baibol Ẹdo) Version 1996

¹ I keghi kha wẹ, I gha kuobọyuwa ne I rẹn emwi ne a ya ẹko rhiẹnrhiẹnmwẹ kha, I kevbe miẹn wẹ, ọna i vbe mwẹ esa.

² I keghi do miẹn wẹ emwi ukọnmwẹ ọ re ogie khin, kevbe wẹ egberọkhọmwẹ i mwẹ emwi ne ọ rhie ne ọmwa.

³ Rhunmwuda ne ekhọe mwẹ na rrọ wẹ I ho ne I gha wan, I keghi wẹ I gha ye ayọn ne a da sẹ ọyẹnmwẹ ne I gha ru ọghe ne agbọn sẹ ọre obọ. I keghi roro ẹe wẹ erriọ ọ re ọ kere ne emwa ya lo agbọn ne ẹ i sa lo na.

⁴ I wa ya obọ ru okpe emwi ẹsẹse, I bọlọ owa nibun, I keghi vbe mu ugbo emwiokọ nibun.

⁵ I mwẹ ugbo obobo kevbe ọghe avbe ọmọ erhan ne a re hia vbe ne erhan ughughan ni mọ na gha rrọọ.

⁶ I keghi fian avbe ọghọdọ yọ ne amẹ gha ke evba lẹ yo ehia.

⁷ I dẹlẹ eviẹn nibun, a keghi vbe biẹlẹ eviẹn nibun vbe owa mwẹ, I keghi vbe gha mwẹ emwirri nibun sẹẹ ọmwaikọmwa ne ọ ka gha rrọ khẹ mwẹ vbe Jerusalẹm.

⁸ I keghi vbe sii esiliva kevbe igoru gboo kevbe avbe otọe ni ga gunmwẹ gha dee. Ikpia kevbe ikhuo kegha so ihuan yọmwẹ ehọ, I keghi vbe gha mwẹ ikhuo sẹẹ vbene ọmwaikọmwa gha sẹtin mwẹ sẹ.

⁹ Vbene ẹmwata, I keghi wa sekpe, I sekpe gberra vbene ọmwaikọmwa hẹ ka sẹẹ vbe Jerusalẹm, ẹwaẹn mwẹ ma vbe hiẹ mwẹ.

¹⁰ Emwikemwi ne I rhirhi a gha ho, kegha sẹ mwẹ obọ, I ma vbe ye emwi ne ọ ghi re ne ọ ye ẹko ọmwa sẹ ọyẹnmwẹ rhọkpa hin egbe mwẹ unu. Ẹko emwi hia ni winna yi ke wa vuọn mwẹ, ena hia kegha re ere ne I miẹn vbo.

¹¹ I keghi roro emwi ne I he ya obọ ru hia kevbe vbene I wa mu aro yọ hẹ vbe I winna ẹẹn, I keghi miẹn wẹ ọ ma zẹdẹ sẹ emwirhọkpa, te ọ ye vbe ne a khu ẹhoho khian, ẹ i zẹdẹ mwẹ esa hiehiere.

¹² U gha do ghe ẹre, emwi ne avbe ọba nikaro ru, ọ re ọbakọba gha vbe ru. Ọ re I na ghi do suẹn gha roro emwi ne a yae kha vbe a gha kha wẹ ọmwa wan ra ọ rruarrua ra ọ kọẹn.

¹³ Ẹta a, I rẹnrẹn wẹẹ, “Ẹwaẹn ọ re ọ maa sẹẹ ukọnmwẹ, zẹ vbene uwanmwẹ maa sẹẹ ebiebi.

¹⁴ Avbe umẹwaẹn sẹtin dẹghe ehe ne iran rrie, sokpan avbe akpa i sẹtin.” Sokpan, I vbe rẹn wẹ emwi okpa ọ re ọ ra rruan ima hia.

¹⁵ I keghi ye ekhọe mwẹ roro ẹe wẹẹ, “Emwi ni sunu vbe egbe avbe ọzuọ, ọ re ọ ra vbe sunu vbe egbe mwẹ. De esa ne ẹwaẹn ne imẹ wan na ghi ye vbọ ne imẹ nian?” I keghi wanniẹn wẹẹ, “Ẹ i mwẹ esa, ẹ i mwẹ esa hiehiere.”

¹⁶ A i miẹn ne ọ ye avbe umẹwaẹn rre, a i miẹn ne ọ ye avbe akpa rre. Te a ra mianmian ima hia vbe ẹghẹ ne ọ dee. Te ima hia ra wulo, kevbe avbe umẹwaẹn kevbe avbe ọzuọ.

¹⁷ I keghi miẹn wẹ agbọn na ma zẹdẹ mwẹ esa ne ọ ye mẹ rhunmwuda, orueghe ọ re emwi hia ni rrọọ hẹ gun mwẹ, te ehia wa khuola; te I wa gha khu ẹhoho khian.

¹⁸ Emwi hia ne I winna yi, I na ya obọ mwẹ khuaẹn, ma ghi mwẹ esa ne ọ ye mẹ, rhunmwuda, I do miẹn wẹ te I ra sẹ ehia rae yotọ ne ọmwa ne ọ ra rhie ihe mwẹ, gha ọ ghi rẹn egbe ọmwa ne ọ ra gha khin,

¹⁹ deghẹ umẹwaẹn nọ ra ọzuọ nọ? Sokpan rẹn ọ re ọ ghi ra yan emwi hia ne imẹ ye obọ mwẹ khuan, emwi hia ne ẹwaẹn mwẹ he viọ yọ mwẹ obọ vbe agbọn na. Ọna i zẹdẹ maa.

²⁰ Rhunmwuda ọnii, I keghi do gha gbe I ma rẹn, I i ghẹ miẹn ẹsọn sẹrriọ.

²¹ Ọmwa ghi wa ya ẹwaẹn rẹn hia miẹn ẹsọn ye emwi ọkpa, vbe irẹnmwi ẹnrẹn kevbe iguemwi ẹnrẹn. Iyekọnii, u ghi wa sẹ ehia rae ne ọmwa ne ọ ma zẹdẹ miẹn ẹsọn yọ. Ọna i zẹdẹ maa, ọ ma vbe gba.

²² Ọmwa ghi ya ẹdagbọn hia domian, ọ ghi hawa, ẹ i vbe miẹn ọyẹnmwẹ okpa vbọ?

²³ Vbe ẹghẹ ne ọmwa ya rre agbọn na, ẹsọn ne ọmwa miẹn, ohawa kevbe ọkpeudu ọ re ọ miẹn vbọ. Asọn gha vbe rre, ekhọe ẹre i vbe sotọ. Ọna i zẹdẹ maa.

²⁴ Emwi ne ọ maa sẹẹ ne ọmwa gha sẹtin ru ọrọre ne ọ gha re, ne ọ gha da kevbe ne ọ ya okhuan ne ọ khuaẹn gha zọmọ. Levba se vba, I kevbe miẹn wẹ obọ Osanobua ọ re ọna ke rre.

²⁵ De odẹ ọvbehe ne ọmwa gha la miẹn ya gha re ne ọ vbe ya gha zọmọ hiehie?

²⁶ Osanobua ọ re ọ rhie ẹwaẹn, irẹnmwi kevbe ọyẹnmwẹ ne emwa ne ọ ru ne ọ yẹ ọre, sokpan, ọ ghi ya emwa orukhọ gha winna, iran ghi miẹn igho, iran ghi ya ẹe gbakhua hinrre, ne a miẹn ehe na viọ okhuan ne iran khuaẹn ne emwa ni ru ne ọ yẹ ọ re. Ena hia i maa, te ọ yevbe ne a khu ẹhoho khian.