Asan-Ibo 12 - Edo Bible (E Baibol Ẹdo) Version 1996

¹ Rhunmwuda ọnii, ye Ayi ne ọ yii uẹ rre vbe ne u he na re ọvbokhan na, vbe ẹdẹ oya kevbe ukpo ẹhorriẹ nii ma he rre, ẹghẹ ne u gha na gha kha wẹẹ, “Ehia khan mwẹ nẹ.”

² Ẹghẹ nii ọ re uwanmwẹ owẹn kevbe uki kevbe orhọnmwẹ, gha na ye vbirrivbirri vbe aro ruẹ, amẹ ne ọ bii i ghi vbe mwẹ ẹghẹ ne ọ ya we yo.

³ Ẹghẹ nii avbe ekuabọ ne u te ya wan ga egbe, ghi gha mian gbẹghẹgbẹghẹ, kevbe owẹ ruẹ ni he wegbe na, ghi do khian ne ẹ i ghi guọ otọ. Akọn ni rre unu ghi do ye zaghazagha, sẹrriọ wẹ u i ghi sẹtin lue evbare ruẹ, aro ruẹ ghi khian ne ọ ghi ghe emwi vbirrivbirri.

⁴ Ehọ ruẹ i ghi họn owogho idunmwu, ekherhe kherhe ọ re u ghi ya họn vbe olọ lọ emwi, ra vbe emwa a gha kpe ema iku, sokpan uhin ghẹ te utumwẹ ahianmwẹ ghi sẹtin huẹn ruẹn kpao vbe ovbe.

⁵ Ohan ehe ni yo hia ghi gha mu ẹẹn, owẹ ne a ya khian ghi do zẹ ẹbe nuẹn. Eto ruẹ ghi do khian nọfua. Vbe u ghi te do zẹ owẹ, ọ ghi ba kua, iro hia ghi wii. Ehe ikẹtin okiekie mwa ọ re ima ghi rrie na, akhiẹ ghi do gha rre idunmwu nii.

⁶ Ọgiọrọ esiliva nii ghi buun, urhukpa igoru nii ghi de, ọ ghi guọghọ ua, okun ne ọ rre uhae ghi fian, ovbi ẹluba amẹ ghi rẹnkhẹn uan.

⁷ Ikinnegbe mwa ghi dọlegbe ghe ekẹn ne otọe, orhiọn ghi dọlegbe bu Osa ne ọ rhie ẹre ne ọmwa.

⁸ Ẹ i mwẹ esa, ẹ i mwẹ esa, erriọ ọ re Asan-ibo khare. Erhọkpa i zẹdẹ mwẹ esa.

Vbene A Ghi Mu Ẹẹn Kọ Yi

⁹ Sokpan, rhunmwuda ighe umẹwaẹn ọ re Asan-ibo khin, ọ keghi ma emwa emwi ne irẹn rẹnrẹn. Ọ ruẹ avbe itan kevbe uyinmwẹ ne ẹ i ru ero, ọ keghi vbe danmwẹ avbe ẹmwata ni rrọ ghe.

¹⁰ Asan-ibo nii keghi hia ne ọ gualọ avbe ẹmwẹ ni fu ọmwa ẹko rre ladian, sokpan avbe ẹmwẹ ne ọ gbẹnnẹ, ne ero i ye ọ re nọ.

¹¹ Ẹmwẹ ne avbe umẹwaẹn ta, te iran yevbe erhan ne a mu ne ọsuohuan ya su ohuan, itan ne a si koko, te iran tọ zẹ vbe ise ne a kakabọ kan ye emwi. Osanobua ne ọ re Ọsuohuan ima hia ọ re ọ viọ iran ne ọmwa.

¹² Ovbi mwẹ, emwi ọvbehe ye rrọ ne ọ kere ne u rhie aro yotọ vbe ekpa ẹre. Ebe ne a gbẹnnẹ i mwẹ ọkhioha, a gha vbe ruẹ emwi gbe, te ọ ye egbe wọ ọmwa.

¹³ Vbe iyeke avbe enena hia, ẹmwẹ okpa kẹkan ọ re ọ ghi kẹe ne a gha ta wẹ. Gha yọghọ ne Osanobua, ne u vbe gha ya uhi ẹre ru emwi, rhunmwuda emwi ne a yi ọmwa ba ọ re ọnii khin.

¹⁴ Te Osanobua ra bu ohiẹn emwi hia ne ima ru, deghẹ ne ọ maa nọ ra ne ẹ i maa, ya sẹ egbe emwi ne a ru vbe ẹkhokho.