Asan-Ibo 11 - Edo Bible (E Baibol Ẹdo) Version 1996

Emwi Ne Umẹwaẹn Ru

¹ Rhie igho ruẹ ye ẹki urria ne a do, u gha miẹn ere vbọ ẹdẹ ọkpaikhẹdọkpa.

² Rhie igho ye emwi atẹ vbe ihe ughughan nibun, rhunmwuda, u ma rẹn egbe emwi ne ọ ma dunna ne a ghae khẹ ruẹ vbe agbọn na.

³ Ehe ne erhan a rhirhi de ghe, ehe ne ọ de yi nii ọ re ọ ra gha ye. Amẹ gha bi, ọ ghi rhọ.

⁴ U gha wẹ ne u diakhẹ ẹghẹ ne ikpakpaiso ra ẹhoho wa ya rre ihe, u i kọ emwi rhọkpa ẹdẹ, u i vbe rhọ emwi ẹdẹ.

⁵ Osanobua ọ re ọ yi emwi hia, wẹ i khian sẹtin rẹn otọ emwi ne ọ ru, gberra vbe ne u rẹn otọ ẹre sẹ ighe vbe ne ọmọ ọgbọn ya suẹn hẹ vbe ẹko okhuohanmwẹ.

⁶ Kọ emwi ruẹn vbe owiẹ, ota gha rre, vbe kọ, u ma rẹn dẹghe ehia ọ re ọ ra maa ra dẹghe ọna ọ ra maa vbọ sẹẹ nọkpa.

⁷ Ọ kere ne ọmwa sẹtin gha ya oghọghọ lo uwanmwẹ ẹdẹ nọ rhiẹnrhiẹn.

⁸ Gha kpọnmwẹ ye dọmwadẹ ukpo ọkpọkpa ne u loro. Vbene u rhirhi a tọ sẹ hẹ, ye rre wẹ ẹghẹ ne u ra wu la tan sẹẹ ẹsẹse. Emwi ne a ghi ye vbe rhie aro yi ighi rrọọ ọvbehe.

⁹ Wa ne igbama, wa gha zọmọ igbama uwa. Gie ẹko gha sẹ uwa ọyẹnmwẹ vbene uwa he ye rre igbama na. Ru emwi ne u ho ne u ru, vbe rhie obọ lele emwi ne ọ rre orhiọn ruẹn. Sokpan ye rre wẹ Osanobua gha bu ohiẹn ruẹn vbekpa emwikemwi ne u rhirhi a ru.

¹⁰ Ghẹ gie emwikemwi mu ẹẹn orhiọn rueghe ra ne ọ si obalọ ye uẹ egbe. Ẹghẹ ne u ra ya ru igbama ma mobọ tan.