Asan-Ibo 10 - Edo Bible (E Baibol Ẹdo) Version 1996

¹ Ikian ni wulo sẹtin ya ọgọ ori ne ọ winhin khian ne ọ ghi wia, erriọ vbe nọ emwi ukọnmwẹ kherhe sẹtin mu ogie ẹwaẹn nọkhua rhia.

² Vbene a yii ẹe wa nọ ne ọmwa ne ọ wan gha ru emwi ne ọ kere, ke ne ọmwa ne ọ kọẹn gha ru emwi ne ọ ma gba.

³ Te ukọnmwẹ ọnrẹn wa vbe rhie egbe maa avbe ekhẹn ne ọ sẹ odẹ miẹn, rẹn ghi gie emwa hia wa rẹn wẹ akpa rẹn khin.

⁴ Adeghẹ ọmwa ne ọ khaemwisẹ yan ruẹn mu ohu ruẹ, ghẹ wa gbẹn ebe I i ghi winna mu gie ẹe. A sẹtin wa ye abakuru nọkhua bọ ọmwa adeghẹ ọ ma balegbe.

⁵ Uyinmwẹ ne ọ ma dia ne I vbe miẹn vbe agbọn na ọ re ọna khin, emwi ne ọ ma gba ne iran ni khaemwisẹ si.

⁶ A ghi rhie avbe ọzuọ ye ukpo ọdakha vbene a na sẹ avbe emwa esi rae.

⁷ I miẹn vbe avbe eviẹn hin ẹsin vbe ne ọdafẹn na ya owẹ mama otọ khian vbe eviẹn ọmwa.

⁸ U gha tọn uvun, wẹ ọ ra de yọ, u gha kpahiẹ la ekẹn gberra, ẹyẹn gha ho ruẹ ẹmwẹ.

⁹ U gha winna vbe uvun ne a na guọghọ okuta, okuta gha kuan ruẹn egbe. U gha sọ erhan, u ghi vbe miẹn ikuanegbe vbe ehe ne u na ru ẹe.

¹⁰ Adeghẹ ughanmwa ruẹn gbin, ighe u ma lọ ẹe, te u ghi ra miẹn ẹsọn sayọ vbe u a gha ya ẹe winna. A mwamwa iwinna ururo ye otọ khẹ ọ dee, ọ re ọ maa sẹẹ.

¹¹ A rẹn vbene a ya ta ẹyẹn ohun hẹ ighi mwẹ esa, a deghẹ u gie ẹyẹn nii ka ho ruẹ ẹmwẹ nẹ.

¹² Ẹmwẹ ne unu umẹwaẹn, ọ re ọ si ọghọ ne ọ rre ọre egbe, sokpan ẹmwẹ ne unu ọzuọ, ọ re ọ gbe ẹre uhunmwu.

¹³ Ẹmwẹ oya ọre ọ ya suẹn, ọ ghi ya emwẹmwẹ mu ẹẹn yotọ.

¹⁴ Ọzuọ ghi gha talọ khian kpẹrẹ. Ọmwa ne ọ rẹn emwi ne ọ ghi ra sunu irrọ, ọmwa rhọkpa i vbe sẹtin tama ọmwa emwi ne ọ ghi ra sunu vbe ọmwa a wu nẹ.

¹⁵ Ọmwa ne ọ kọn sẹrriọ wẹ ọ ma rẹn odẹ ne a la yo owa, ọ re ọ ye iwinna gbe egbe ẹre ua.

¹⁶ Ẹvbo nii la ẹmwẹ, a dẹghe igbama ọrọre ne ọ khaemwisẹ yan rẹn, kevbe wẹ avbe ọkaolotu ni rrọ gha wa gha ye asọn hia rri evbare eghọ.

¹⁷ Sokpan, uwa ọ re ẹvbo nii ye adeghẹ iran mwẹ ọba ne ọ tobọ ẹre ta vbene irẹn gha ru emwi hẹ kevbe avbe ọkaolotu ni rri evbare ye ẹghẹ, Emwa ni mu egbe iran yọghọ kevbe ne ẹ i da ayọn gbe egbe.

¹⁸ Adeghẹ ọmwa mitan an, ighe ọma sẹtin dọlọ ẹrhunrhun owa ẹre yi, owa ni ghi gha gin, ọ ghi de.

¹⁹ Te evbare eghọ ye ọyẹnmwẹ sẹ ọmwa, erriọ ọ re ayọn vbe ya aro ọmwa maa vbe uhunmwu, sokpan ne obọ ruẹ gha sẹtin gba i rrọ adeghẹ igho i rrọọ.

²⁰ Ghẹ gbodan ghe ọba, ọ gha khọn rẹn ne ọ gha re vbe ẹkhokho, ghẹ gbodan ghe ọmwa ne ọ fe, ọ gha khọn rẹn ne ọ gha re vbe ẹkhokho ughugha ruẹ nọ. Ahianmwẹ sẹtin rhie ẹmwẹ nii kpao, ọ ghi ya tama iran ẹmwẹ ne u tae.