Aizaia 9 - Edo Bible (E Baibol Ẹdo) Version 1996

Ọba Ne Ọ Gha He Re

¹ A te ka fa otọe ẹwae Zẹbulọn kevbe Naftali rua, sokpan, ẹdẹ nakhuẹ gha rhie ọghọ gie otọe ẹvbo na. Ke Meditẹrrenian ghe odọ ahọ ya sẹ otọ ne ọ rre obọ nọkpa ọghe Jọdan, uhin ya sẹ e Galili tobọre, ehe ne avbe erriọvbe ye.

² Iran ni te ka khian vbe uwu ebiebi miẹn uwanmwẹ nọkhua otọe aghọnghọn ọ re iran te ye usin banbanna nian, uwanmwẹ wan yan iran.

³ Wẹ rhie oghọghọ nọkhua ne iran Nọyaẹnmwa; u ya ẹko iran gha rhiẹnrhiẹn iran ghọghọe ye iwinna ne u winnaẹn zẹ vbene emwa ghọghọ vbe iran a gha rhọ emwiorhọ ra vbe iran a gha ghae emwi ne iran gbinna ẹn viọ vbe okuo.

⁴ Rhunmwuda, wẹ bun urọnghọn ne ọ te mianmwẹ iran nẹ! Kevbe ukpokpo ne ọ te gbe iran izabọ wẹ khọn ẹvbo ne ọ te zẹ emwa ruẹn kpokpo ne ọ na vbe do iran ọzuọ ne zẹ vbene u ka khọn ivbiyokuo e Midian vbe ẹghẹ ne ọ kpee fua.

⁵ Ibata avbe iyokuo ni mu okuo dee kevbe ẹwu iran ne esagiẹn gbe yi hia erhẹn gha giẹn ehia a.

⁶ A biẹ ọmọ ọkpa ne ima! A rhie ọmọ okpia ọkpa ne ima! Rẹn ọ ra gha re ogie mwa. Eni ne a ra gha tie ẹre ọrọre, “Ọbude Ọyunnuan.” “Osa ne Oghodua,” “Erha Etẹbitẹ,” “Okoro Ọfumwegbe.”

⁷ Te ẹtin arriọba ẹre ra gha muan yọ, ọfumwegbe ọ re otọe arriọba ẹre ra gha ye vbe ẹghẹ hia te irẹn ra rriọba zẹvbe ọmwa ne ọ rriọba lele Devid ne Ọba ẹmwata kevbe uhunmwu ẹmwẹ ọ re irẹn ra ya gha mwẹ ẹtin; ke ẹghẹ na kpao ya sẹ ufomwẹ agbọn. E Nọyaẹnmwa ne Oghodua tae nẹ ighe erriọ rẹn ra ru ehia.

E Nọyaẹnmwa Gha Rria Izrẹl Ikhi

⁸ E Nọyaẹnmwa buu ohiẹn otọe arriọba Izrẹl nẹ, ohiẹn ivbi uniẹn e Jekọb.

⁹ Avbe ivbi Izrẹl hia, avbe emwa hia ni rre ore ẹvbo e Sameria, gha rẹn wẹ ọ ru ọna nẹ. Banbanna nian, iran hia wa tọn egbe mu. Iran khare wẹẹ,

¹⁰ “Avbe owa ne a ya ibiriki bọlọ dele nẹ. Sokpan, okuta ma ra ya dọlọ iran bọlọ. Iran giagia egbaha ọghe ohia ni rrọ kua, sokpan, ọghe isida ne ọ maa sẹẹ ọ re ima ra viọ ye ihe iran.”

¹¹ E Nọyaẹnmwa bọ avbe eghian iran yọ nẹ. Ne iran do gu iran gbinna.

¹² E Siria vbe odẹ ahọ kevbe Filistia vbe odẹ orrie, rhan unu yotọ ne iran minọ Izrẹl re. Ọ rhe ye vberriọ, ohu e Nọyaẹnmwa ma he ye fo. Te ọ ye niẹn obọ ẹre ladian ne ọ rri iran oya.

¹³ Ivbi Izrẹl ma he ye fiwerriẹ, a gha rhe miẹn wẹ e Nọyaẹnmwa ne Oghodua rria iran ikhi nẹ, iran ma he ye werriegbe bu ẹre rre.

¹⁴ Vbe ikpẹdẹ ọkpa kẹkan, e Nọyaẹnmwa gha rria avbe ọkaolotu Izrẹl kevbe avbe emwa rẹn ikhi, ọ gha giagia iran kua, ke uhunmwu kevbe ẹrhunrhun.

¹⁵ Avbe eniwanrẹn ne adazẹ, ọrọre avbe uhunmwu, avbe ẹrhunrhun ni rrọ keghi gha re avbe akhasẹ, ni ma emwa emwi ohoghe.

¹⁶ Iran ni su emwa na khian wa bibi iran odẹ nẹ fẹẹrẹ, iran keghi gie iro han ehia.

¹⁷ Rhunmwuda ọnii, e Nọyaẹnmwa I ra gie ọkpa lẹfe vbe uwu avbe igbama ni rrọọ, ẹ i ra vbe tohan avbe ẹgbẹ kevbe emọ ne ẹ i mwẹ erha, rhunmwuda emwa dan ne emwa dan ọ re avbe emwa nii hia wa khin, ẹmwẹ ne iran ta hia, ọkhọ ọ re ehia khin. Ọ rhe ye vberriọ, ohu e Nọyaẹnmwa i he ye fo, te obọ ẹre gha ye niẹn ladian ne ọ rria ikhi.

¹⁸ Uyinmwẹ dan emwa nii gha to vbe erhẹn ne ọ giẹn ẹti oha igban, ọ gha giẹn vbe erhẹn ẹgbo ne ọ zẹ okpighogho ghe odukhunmwu.

¹⁹ Rhunmwuda ne ohu na mu e Nọyaẹnmwa ne Oghodua, ikhi ne ọ rria emwa re gha to vbe erhẹn vbe otọe nii hia, ọ kevbe gha fuẹn emwi nii hia a, ọ keghi do khian ne dọmwadẹ ọghọe ghi na sinmwi uhunmwu ẹnrẹn.

²⁰ Vbe otọe nii hia, evbare ne emwa a rhirhi miẹn ọ re iran gha gua rhie, iran ghi vbe gha rri ọe sokpan, ẹko i vuọn iran. Uhin ighe te iran ra gha gbele ivbi iran re.

²¹ Ivbi e Manasẹ kevbe ivbi Ifreim gha gu egbe khọn, iran ghi vbe koko mu okuo gie Juda. Sokpan, ọ rhe ye vberriọ, ohu e Nọyaẹnmwa ma he ye fo, te obọ ẹre ye niẹn ladian ne ọ rriaikhi.