Aizaia 8 - Edo Bible (E Baibol Ẹdo) Version 1996

Ovbi Aizaia Zẹ Vbe Ama Ne Emwa Nii

¹ E Nọyaẹnmwa keghi tama mwẹ wẹẹ, “Mu emwi ne a gbẹn emwi yi ne u gbẹnnẹ emwi gbada gbada yọ vbenian: ‘Ifu emwi ẹgiẹgiẹ, Otueghae okhirhikhirhi.’

² Viọ ikpia ọmwata eva, Uraia ne ohẹn, kevbe Zẹkaraia ne ovbi e Jeberekaia ne iran mudia ye ihe osẹe.”

³ Ọ ma ghi kpe, ọvbokhan mwẹ keghi do gha hanmwa. A ghi biẹ ovbi ima ne ọmọ okpia nii, e Nọyaẹnmwa keghi tama mwẹ wẹẹ, “He ẹre Ifu emwi ẹgiẹgiẹ, Otueghae okhirhikhirhi!

⁴ Ọmọ na ghi te wan sẹ ne ọ gha na gha tie ‘Iye’ tie ‘Ebaba’, ẹfe ni rre Damaskọs kevbe emwi ne a furu vbe Sameria hia gha khian ne ọba Asiria hẹ gha rrie.”

Ọba Asiria Dee

⁵ E Nọyaẹnmwa keghi vbe dọlegbe gunmwẹ guan.

⁶ Ọ wẹẹ, “Rhunmwuda ighe avbe emwa na he amẹ Ẹzẹ Siloa ne ẹ i si ọfọ yotọ, iran na gha guọ zighazigha vbe odaro Ọba Rẹzin kevbe Ọba Pẹka,

⁷ mẹ ne Nọyaẹnmwa gha tie ọgbaisi Asiria rre, deba ivbiyokuo ẹre hia, ne iran gu e Juda gbinna. Iran gha bi rre zẹ vbene amẹ Ẹzẹ Yufretes kpa ku oke ẹre.

⁸ Iran gha bi la e Juda gberra zẹ vbe amẹ ne ọ lẹ, ọ ghi ro ya sẹ izabọ, ọ ghi ro gue emwi hia.” Osanobua rrọọ yaba mwa, ifuẹn ọnrẹn ne ọ rhan rẹn degue otọe mwa.

⁹ Wa ne uhunmwu ẹvbo, wa ya ohan si egbe koko! Wa danmwehọ, wa ne ẹvbo ni rre urria vbe otọ agbọn na. Wa mu egbe ne uwa ya gbinna. Sokpan, wa gie ohan gha mu uwa. Ẹn, wa mu egbe ne uwa ya gbinna, sokpan, wa gie ohan gha mu uwa.

¹⁰ Wa mwamwa emwi hia! Sokpan, erhọkpa i dunna. Wa guan yan emwi hia ne uwa ho ne uwa guan yan. sokpan erhọkpa i mwẹ esa, rhunmwuda Osanobua rrọọ yaba mwa.

E Nọyaẹnmwa Ye Obọ Sekhae Ne Akhasẹ

¹¹ E Nọyaẹnmwa keghi ya ẹtin ẹnrẹn nọkhua ya obọ sekhae mẹ wẹ ne I ghẹ lele odẹ ne avbe emwa nii lele khian. Ọ wẹẹ,

¹² “Ghẹ deba uma ne avbe emwa nii si, ghẹ vbe mu ohan emwi ne iran mu ohan ẹnrẹn.

¹³ Yerre wẹ mẹ ne Nọyaẹnmwa ne Udazi, ọmwa nọhuanrẹn ọ re imẹ khin, mẹ okpa kẹkan ọ re uwẹ gha a mu ohan rẹn.

¹⁴ Rhunmwuda uhuanmwẹ ugborrirri mwẹ, te imẹ ghi ye vbe okuta ne emwa na rrua owẹ. Te I ye vbe ifi ne ọ ra munọ emwa arriọba e Juda kevbe Izrẹl, kevbe emwa ni rre Jerusalẹm.

¹⁵ Nibun gha rrua owẹ, iran gha dele, iran ghi rẹnkhẹn uan. Ifi gha munọ iran.”

Ẹmwẹ Emwa Ni Wulo Nẹ Ne A Gualo Otọ Emwi Vbe Obọ Ẹre

¹⁶ Wa ne erhuanegbe mwẹ ọ re ọ ra gha siẹn ẹro ẹmwẹ ne Osanobua ta ma mwẹ.

¹⁷ E Nọyaẹnmwa rhie egbe ẹre lẹre ne emwa rẹn nẹ, sokpan, mẹ mu ẹtin yan rẹn, I vbe mwẹ idaehọ vbe uwu irẹn.

¹⁸ Mẹ rre emwa na deba emọ ne Nọyaẹnmwa viọ mẹ. e Nọyaẹnmwa ne Oghodua, ọmwa ne ẹkete ẹre rre Oke Zaiọn gie ima nẹ, zẹ vbe ẹmwẹ unu ne ọ rre agbọn, ne a gie gie emwa Izrẹl.

¹⁹ Sokpan, emwa gha tama ruẹn ne u ya gualọ otọ emwi vbe obọ avbe ọbiro kevbe ọfiakpẹlẹ ni kpe ihue, kevbe ni vbe zuyọn. Iran gha kha wẹẹ, “A rẹnrẹn wẹ ọ kere ne emwa gha gualotọ emwi gie emwa ni rre agbọn vbe obọ avbe ẹrinmwi kevbe emwa ni wulo nẹ.”

²⁰ Wẹ ghi zẹ wanniẹn iran wẹẹ, “Danmwehọ emwi ne Nọyaẹnmwa ma uwa ẹre! Wa ghẹ danmwehọ avbe iran ni miẹn aro, emwi ne iran ra tama uwa i mwẹ asa ne ọ ye ne uwa.”

Ẹghẹ Ọlọghọmwa

²¹ Emwa gha zozo lele otọe nii zẹ vbe emwa ne ẹtin fo kevbe ne ohanmwẹ gbe. Vbe uwu ne ohu na mu iran kevbe ne ohanmwẹ na vbe gbe iran nii, iran ghi filo unu gie ọba iran nii, iran ghi filo unu gie ọba iran kevbe Osanobua iran. Iran sẹtin gha ghe odukhunmwu

²² ra iran ghi gha ghe otọe sokpan, iran i ra bẹghe emwi ọvbehe gberra ọlọghọmwa kevbe ebiebi, ebiebi ne ọ gbe orrirri ne iran ra khulo iran lao. Odẹ ne iran gha la miẹn uhunmwu vbe egbe ọlọghọmwa na, ẹ i rrọ.