Aizaia 7 - Edo Bible (E Baibol Ẹdo) Version 1996

Uhunmwu Ne A Gie Gie Ehaz Ne Ọba

¹ Ẹghẹ ne Ọba Ehaz ne ovbi e Jotam kevbe eyẹ ọghe Uzaia na gha rre ẹkete e Juda, okuo keghi saa. E Rezin ne ọba e Siria, kevbe Pẹka ne ovbi e Remalaia ọba Izrẹl keghi dekun e Jerusalẹm, sokpan, iran ma sẹtin khọn rẹn.

² Ọba e Juda ghi họn wẹ okuo e Siria sẹẹ otọe e Juda nẹ, ohan mu irẹn kevbe emwa rẹn sẹrriọ wẹ iran ke gha mian gbẹghẹgbẹghẹ zẹ vbe avbe erhan ne ẹhoho hoho.

³ E Nọyaẹnmwa keghi tama Aizaia wẹẹ, “Rhie ovbuẹ ighe Sia Jasiub mwẹ obọ, ne u ya vba Ọba Ehaz. U gha miẹn ọẹn vbe odẹ nii ne iran ni do ukpọn na winna, vbe ukpe uvun ne amẹ lẹ la ke ẹzẹ ne ọ ke odọ rre.

⁴ Kha ma rẹn wẹ ne ọ sikhua, wẹ ne ọ gie ekhọe ẹre sotọ wẹ ne ọ ghẹ hawa, ọ ghẹ gie ohan mu ẹẹn. Ohu ne ọ mu e Rezin ne Ọba kẹe kevbe ivbi e Siria ne emwa rẹn na kevbe Ọba Pẹka ọ ma zẹdẹ zẹ ẹbe sẹẹ ighogho ne ọ ke ivbi erhan eva ni gbe muẹnmuẹn rre.

⁵ E Siria, deba Izrẹl kevbe ọba ẹre, sii uma nẹ.

⁶ Iran wẹ iran ra khọn e Juda, ne iran ya ohan mu emwa ni rrọ ne iran yegbe ba iran, ne iran mu ovbi e Tabil ye ẹkete.

⁷ “Sokpan mẹ ne Nọyan, ọ re ọ tae wẹ ẹ i gba.

⁸ Vbọzẹ? Rhunmwuda, e Siria ma wegbe sẹ e Damaskọs ne igiogbe ọ re, e Damaskọs ma vbe wegbe sẹ e Rezin ne Ọba. Sokpan, zẹ vbe ọghe Izrẹl, vbe ọ te do sẹ ukpo isẹn yan iyeha, iran gha zanzan ẹẹn ruan sẹrriọ wẹ, ẹ i ghi sẹtin guakpao do gha re uhunmwu ẹvbo ẹdẹ.

⁹ Izrẹl ma wegbe sẹ e Sameria, e Sameria ma vbe wegbe sẹ e Pẹka ne Ọba. “Adeghẹ iyayi ruẹ ma wegbe, egbe ruẹ i ra rrọ ẹre.”

Iyama Imanuẹl

¹⁰ E Nọyaẹnmwa keghi vbe gie uhunmwu ọvbehe gie Ehaz:

¹¹ “Nọ e Nọyaẹnmwa ne Osanobua ruẹ wẹ ne ọ rhie ama nuẹn. Ọ sẹtin gha re ke ehe ne dinmwidinmwi ne avbe orinmwi ye gha dee, ra ke odukhunmwu reghe gha dee.”

¹² Ehaz keghi wanniẹn wẹẹ, “Mẹ i ra nọ ama. Mẹ i sẹtin danmwẹ e Nọyaẹnmwa ghe.”

¹³ Ẹre Aizaia ghi na wanniẹn wẹẹ, “Banbanna nian, danmwehọ, wa ne ivbi uniẹn e Devid. Emwi dan wa nọ ne uwa gha ya emwi wọ emwa nagbọn egbe, te uwa ghi ra vbe yae wọ Osanobua egbe ra?

¹⁴ Vbene ọ ghi ye na nian, e Nọyaẹnmwa gha tobọ ẹre rhie iyama nuẹn: okhuo ọvbokhan ọkpa ne ọ ma rẹn okpia gha hanmwa, ọ gha biẹ ọmọ okpia ọkpa, ọ ghi he ẹre ‘Imanuẹl.’

¹⁵ Ọ ghi te wan sẹ ne ọ ghi ya ẹwaẹn obọ ẹre zẹ emwi ru, emwa gha a wọn ewẹn ẹmila, iran ghi vbe gha rri owọn.

¹⁶ Uhin vbe ọ te sẹ ẹghẹ ne a kha na, emwa gha lẹ kua vbe otọe avbe ọba eveva ni runran uwẹ na.

¹⁷ “E Nọyaẹnmwa ra si ọlọghọmwa ọkpa ye uwẹ egbe kevbe avbe emwa ruẹn, deba ẹgbẹe ọba hia fẹẹrẹ, egbe ẹdẹ ọlọghọmwa ne a ma he ka miẹn ẹdẹ, ke ẹghẹ ne Izrẹl ya fian egbe hin e Juda rre gha dee, ọba Asiria ọ re ọ ra si okuo ẹre gha dee.

¹⁸ “Ọ gha sẹ ẹghẹ nii, e Nọyaẹnmwa gha fi ewọe zẹ vbe ama ya tie ivbi Igipt, ne iran ke ehe ne ọ ghi rrei sẹ vbe abọ e Naẹl gha dee zẹ vbe ikian, kevbe ne ivbi Asiria vbe ke otọe iran gha dee zẹ vbe owọn.

¹⁹ Iran gha bi la avbe iya ne kpannọkpannọ nii, kevbe avbe uvun okuta, iran gha mama rhu oha igban hia kevbe otọe ne avbe aranmwẹ na rria hia.

²⁰ “Ọ gha sẹ ẹghẹ nii, e Nọyaẹnmwa gha ya rhie ọmwa ne ọ gbe eto okpa ke iyeke ẹzẹ Yufretes rre, ọnii nọ wẹ ọgbaisi Asiria, ọ gha kpolo uwa ẹtu ke eto ne uhunmwu kevbe ni rre uwu ikinnegbe.

²¹ “Ọ gha sẹ ẹghẹ nii, ọ gha khọn rẹn ne a miẹn wẹ ovbi ẹmila okpa ọ re ọwẹe sẹtin koko hin rre, deba ivbi ẹwe eva,

²² ewẹn iran gha la sẹrriọ wẹ, ọ gha mwẹ sẹ vbene ọ ho. Ẹn, ikpirogho eva ni ghi miẹn uhunmwu vbe otọ nii, gha miẹn ewẹn ẹmila kevbe owọn gha re.

²³ “Ọ gha sẹ ẹghẹ nii, avbe ogba azara ne mose mose, ne erhan azara arriaisẹn ye, ne ọ vbe sẹ igho esiliva arriaisẹn, igban ọkhuẹnkhuẹn kevbe ọkọsọ ghi sọn rhu ẹe.

²⁴ Emwa ghi viọ uhanbọ ya gha ru ohuẹ vbọ. Ẹn, ẹvbo nii hia ghi vuọn ne ọkhuẹnkhuẹn kevbe ogigban.

²⁵ Avbe oke ne a te ka kọ emwiokọ yi, igban gha sọn rhu ẹe sẹrriọ wẹ a i ghi miẹn ọmwa ne ọ gha yo evba. Ọ ghi do khian ehe ne ẹmila kevbe ohuan na rria.”