Aizaia 65 - Edo Bible (E Baibol Ẹdo) Version 1996

Oya Ne Osanobua Rri Iran Ni Sẹmwẹ Ọnrẹn Re

¹ E Nọyaẹnmwa khare wẹẹ, “Mẹ te mu egbe ne I ya họn erhunmwu avbe emwa mwẹ, sokpan, iran ma na erhunmwu. Mẹ te mu egbe ne iran gualọ mwẹ miẹn, sokpan, iran ma ziga hiehiere. Ẹvbo nii ma na erhunmwu ghe mwẹ, a gha rhe miẹn wẹ, te imẹ mu egbe ne I ya họn erhunmwu. Tama iran wẹẹ, ‘Ghe mwẹ vbe emwana, I gha ye uwa obọ.’

² Te imẹ te wa mu egbe vbe ẹghẹ hia ne I ya miẹn avbe emwa mwẹ yi, iran ni ya izevbudu ru emwi ne ọ ma gba, iran na gha ru ọghe iran khian.

³ Iran kegha ya ifavbaro ru emwi ne ọ mu mwẹ ohu khian. Iran zọ ese emwa ni ga ẹbọ vbe ugbo ẹbọ, iran ghi vbe gha giẹn eturari vbe Ogiukpo iran nigẹbọ.

⁴ Ẹdẹ gha mu nẹ, iran ghi gha lele avbe uvun okuta kevbe idin khian, ya gha gualotọ emwi vbe obọ orhiọn emwa ni wulo nẹ. Iran rri emiowo esiebo, iran ghi vbe rri uwọnmwẹ emiowo ne iran ni ga ẹbọ ya zọ ese.

⁵ Vbe iyeke ọnii, iran ghi gha tama emwa ọvbehe wẹẹ, wa gban egbe ne ima, ma huan gberra ne ọ kere ne uwa gha ya obọ kan! I i ho ne I gha bẹghe emwa vbenian, ohu iran ne ọ mu mwẹ yevbe erhẹn ne ẹ i dọyọ.

⁶ “I mwamwa oya ne I gha rri iran re yotọ nẹ. Avbe gbẹn abe ne a bu gbe iran yotọ nẹ. Mẹ i ra fi aro ua vbe emwi ne iran ru, I gha ha ẹre werriegbe ne iran

⁷ ighẹ orukhọ iran kevbe orukhọ avbe erha iran odede. Iran giẹẹn eturari vbe uhunmwu oke ẹbọ, iran kevbe gha ya ukpe sakan mwẹ. Rhunmwuda ọnii, I gha rri iran oya zẹ vbene ọ khẹke orukhọ ne iran ru gberra.”

⁸ E Nọyaẹnmwa khare wẹẹ, “A i miẹn ọmwa ne ọ viọ alimo azara ne ọ maa kua, sokpan, te iran ya ẹe ru ayọn. Erriọ vbe nọ, mẹ i ra fuẹn emwa mwẹ hia a, I gha miẹn iran ni ga mwẹ vbọ fan.

⁹ I gha fiangbe ivbi Izrẹl ni re ẹwae ọghe Juda vbọ, ivbi uniẹn iran ọ re ọ ra yan otọe mwẹ ne uhunmwu oke. Emwa mwẹ ne a hannọ zẹ, ni vbe gha ga mwẹ, ọ re ọ ra yin evba.

¹⁰ Iran gha ga mwẹ, iran ghi vbe gha viọ ohuan kevbe ẹmila iran ya gha rria vbe Otọe Nọrriẹe ọghe Siarọn vbe odẹ orrie kevbe vbe Iya Orueghe vbe odẹ ahọ.

¹¹ “Sokpan, emwi ughaẹn ra wa gha nọ ne uwa ni hee mwẹ yotọ, wa ni ma zẹ ye Zaiọn ne oke mwẹ nọhuanrẹn re, wa na vbe gha gho e Gad kevbe Mẹni, ne avbe ẹbọ uhimwẹ kevbe ẹwerẹ.

¹² Vbene uwa hi hẹ nọ wẹ ne uwa wulo uwu ekpain ekpain, rhunmwuda, wa ma khuẹnniẹn vbe I tie uwa, wa ma danmwehọ vbe I guan. Wa na wẹ te uwa ra he uhunmwu yọmwẹ obọ ne uwa gha ru emwi dan.

¹³ Mẹ ke ghi rhunmwuda ọnii tama uwa wẹ iran ni ga mwẹ, iran na vbe gha hẹnmwẹ mẹ, gha miẹn gha re, kevbe gha da ọwọrhọwọrhọ, sokpan, ohanmwẹ gha gbe uwa, ovbamẹ ghi vbe gha gbe uwa. Ẹko gha sẹ iran ọyẹnmwẹ sokpan, wa gha fa egbua.

¹⁴ “Iran gha so ihuan oghọghọ, sokpan wa gha viẹ eve orriara.

¹⁵ Emwa mwẹ ne a hannọ zẹ gha ya eni uwa gha mu ẹbọ gbe emwa, Mẹ ne Nọyaẹnmwa ne Udazi ọ re ọ ra gbele uwa a. Sokpan, I gha he iran ni họn ẹmwẹ mwẹ eni ọgbọn.

¹⁶ Ọmwaikọmwa ne ọ ghi nọ afiangbe vbe otọe nii, Osanobua ẹmwata ọ re ọ ra wẹ, ne ọ fiangbe irẹn. Ọmwaikọmwa ne ọ vbe vẹn ihẹn eni Osanobua ẹmwata nii ọ re ọ ra vbe ya vẹn ọẹn. Orueghe ọghe ẹghẹ ne ọ gberra gha fo, a ghi vbe mianmian ẹn.”

Emwi Ne A Yi Ọgbọn

¹⁷ E Nọyaẹnmwa khare wẹẹ, “Mẹ wa yi agbọn ọgbọn nian, kevbe avbe ẹrinmwi ọgbọn. A gha mianmian emwi ni sunu vbe ẹghẹ ne ọ gberra hia fẹfẹẹfẹ.

¹⁸ Gha sẹ ọyẹnmwẹ ne u vbe gha ghọghọ ye emwi ne I yi ẹdẹdẹmwẹdẹ. E Jerusalẹm ọgbọn ne I ra yi, te ọ ra vuọn ne oghọghọ, emwa ni rrọọ hia ghi vbe gha sẹ ọyẹnmwẹ.

¹⁹ Oghọghọ gha vuọn imẹ tobọmwẹ ẹko rhunmwuda e Jerusalẹm kevbe avbe emwa ni rrọọ. Eve i ra gha rre evba, bu mwẹ rre, bu mwẹ rre i ra vbe gha rrọọ.

²⁰ Ibiẹka i ra gha wulo ye emọ obọ, agbọn hia gha sẹ ẹdẹ ne ẹhi khare. Ọmwa ne ọ rre ukpo iyisẹn, a ghi ye gha kae ba igbama. Ọmwa gha wu ọ te sẹ vberriọ, ọnii rhie ma wẹ te I rri iran oya.

^21-22 Emwa gha bọlọ owa, iran ghi vbe yin iran, ẹrrẹe i ra viọ iran gha lo. Iran gha mu ugbo azara, iran ghi vbe ya ayọn ẹnrẹn ru. Ẹrrẹe i ra vbe rhie ẹre da. Emwa mwẹ gha wa tọ zẹ vbe erhan. Iran gha miẹn emwi ne iran miẹn ẹsọn yi ya ru ẹsẹsẹmwẹse.

²³ Emwi ne iran ru gha wa gha dinna odẹ, ọkhọ i ra vbe sunu vbe egbe ivbi iran, i gha fiangbe iran kevbe uniẹn ivbi iran ni dee ẹdẹdẹmwẹdẹ.

²⁴ Iran te na erhunmwu fo, erhunmwu iran mẹ họn nẹ.

²⁵ Avbe akpakomiza kevbe ivbi ohuan gha gba gha rri evbare kugbe, avbe oduma ghi gha rri irunmwu zẹvbe ẹmila, avbe ẹyẹn i ra gha re emwi ikuaengbe ọvbehe. Emwi ọkpa ne ọre ọghe ọkhọ ra emwi dan, a i ghi ra miẹn ọẹn Vbe Zaiọn ne oke nọhuanrẹn mwẹ.”