Aizaia 64 - Edo Bible (E Baibol Ẹdo) Version 1996

¹ Vbọzẹ ne u ma na va iso ne u tuorre yi? Avbe oke nekhua gha te bẹghe ruẹ, iran ghi gha guọ ne ohan.

² Iran gha a guọ zẹ vbe amẹ ne ọ ti vbe erhẹn. Do rhie ẹtin ruẹn ma avbe eghian ruẹn, ne u vbe gie avbe uhunmwu ẹvbo gha guọ vbe odaro ruẹ.

³ Ẹghẹ ọkpa rrọọ ne u na rre, u na do ru emwi ne ọ runran ọmwa, egbe ne ima ma rhie aro yi, avbe oke nekhua bẹghe ruẹ, iran kegha guọọ ne ohan.

⁴ A ma he miẹn egbe ọ re a ma he vbe họn ẹmwẹ Osanobua ne ọ yevbe ruẹ ne ọ winna egbe iwinna vberriọ ne iran ni ye egbe kọe.

⁵ Wẹ miẹn iran ne emwi ne ọgbae ne a ru yẹ yi, iran ni yerre vbene u wẹ ho ne iran gha yin hẹ. Ohu mwa te gha mu ẹẹn, sokpan, ma keghi ye gha ru orukhọ yan, vbene ohu ni ya mu ẹẹn sẹ, orukhọ ọre ima ye ru kẹ ẹkpo nẹdẹ ni gha dee.

⁶ Te ima hia wa vuọn ne orukhọ, uhin ighẹ uyinmwẹ ne ọ ghi maa sẹẹ, iku kevbe ẹkẹkhẹrhẹ nọ. Rhunmwuda orukhọ mwa, te ima ghi yevbe ebe ne ọ kakae ne ẹhoho hohoo kua.

⁷ A ma miẹn orhiọnkpa ne ọ ya erhunmwu dọlegbe ghe ehe ne u ye, a ma miẹn ne ọ bu ruẹ rre do nọ iyobọ. U rhie egbe ruẹ lẹre ne ima, u ke hee ima yotọ rhunmwuda orukhọ mwa.

⁸ Sokpan, wẹ ọrọre erha mwa, Nọyaẹnmwa, te ima yevbe obuẹ, wẹ keghi yevbe ọmakhe. Wẹ ọ re ọ yi ima,

⁹ rhunmwuda ọnii, ghẹ mu ohu mwa gberra uwu, ra ne u gha ka orukhọ mwa yi ima owẹ ẹdẹdẹmwẹdẹ. Emwa ruẹn ma khin, tohan mwa.

¹⁰ Te ẹvbo ruẹ nihuanrẹn hia ghi yevbe ato oha, itowa ne emwa lẹẹ kpao sẹrae, ọ re Jerusalẹm ghi khin,

¹¹ deba Ọgua Osa mwa, ehe ne mose nọhuanrẹn nii, ehe ne avbe erha mwa odede na gha rho ruẹ, erhẹn giẹẹn ọnrẹn uan. Avbe ehe ni te yẹ emwa hia, itowa ehia ghi khin.

¹² E Nọyaẹnmwa, ena hia ma zẹdẹ kan uwẹ ra? Wẹ i ra zẹdẹ zẹ yọ ra, te uwẹ we ne ima gha rri oya khian gberra vbene egbe mwa gha sẹtin rrọ ra?