Aizaia 63 - Edo Bible (E Baibol Ẹdo) Version 1996

Akhọnmiotọ Osanobua Yan Avbe Uhunmwu Ẹvbo

¹ “Gha ọna khin ne ọ ke Bozra ne Idọm de yi? Gha ọna khin ne ọ ya ododo han yi, ne ọ ze owẹ kẹe kevbe ẹtin deba iwegbe?” “E Nọyaẹnmwa nọ, ọmwa ne ọ mwẹ ẹtin ne ọ ya miẹn ọmwa fan, ọ ra do kha vbene irẹn khọnmiotọ hẹ.”

² “Vbọzẹ ne ukpọn ne ọ yọe na baa sẹ vberriọ yi, zẹ vbe ọmwa ne ọ ya owẹ rri alimo azara ne a ya ru ayọn?”

³ E Nọyaẹnmwa keghi wanniẹn wẹẹ, “Mẹ ya owẹ rrilo avbe uhunmwu ẹvbo ginna otọ nẹ zẹ vbe alimo azara, ọmwa ne ọ rre do yọmwẹ obọ i rrọọ. I ya owẹ rrilo iran ginna otọ vbe ohu mu mwẹ, esagiẹn iran keghi gbe gba ẹwu mwẹ hia.

⁴ Te I khare wẹ, ẹghẹ sẹe nẹ ne I gha na miẹn avbe emwa mwẹ fan, ẹghẹ sẹe nẹ ne I gha na rri eghian iran oya.

⁵ Ọ wa yaan mwẹ unuan, vbe I ghe lẹga vbe ne a ma na miẹn ọmwa rhọkpa ne ọ do yọmwẹ obọ. Sokpan, ohu ne ọ mu mwẹ keghi rhie ẹtin yọmwẹ iwu, I keghi tobọmwẹ khọnmiotọ.

⁶ Vbe uwu ne ohu na mu mwẹ nii, I keghi, ya owẹ rrilo avbe uhunmwu ẹvbo ginna otọ I keghi duẹ iran an, I keghi hihiẹẹ, esagiẹn arrọọ iran yotọ.”

Umamwẹ Osanobua Ne Izrẹl

⁷ I gha na iyẹn ahoẹmwọmwa e Nọyaẹnmwa ne ẹ i fira. I rho ẹre ye iwinnaa ne ọ winna ne ima Ọ fiangbe ivbi Izrẹl ẹsẹse. Rhunmwuda itohan kevbe ahoẹmwọmwa ne ẹ i beghe.

⁸ E Nọyaẹnmwa khare wẹẹ, “Emwa mwẹ ọ re iran khin, iran i ra rẹrẹ mwẹ.” Rhunmwuda ọnii, ọ keghi miẹn iran fan

⁹ hin uwu usẹ iran hia rre. Ẹ i re odibosa ọ re ọ do miẹn iran fan, e Nọyaẹnmwa tobọ ẹre, ọ re ọ miẹn iran fan. Ahoẹmwọmwa kevbe itohan, ọ re ọ ya miẹn iran fan. Ọ ka wa gbearoghe iran dee ẹdẹ,

¹⁰ sokpan, iran keghi sẹmwẹ ọnrẹn, iran keghi gha rhia ẹre ẹko rua. Rhunmwuda ọnii, e Nọyaẹnmwa keghi khian oghian iran, Ọ keghi gu iran gbinna.

¹¹ Sokpan, iran keghi do ye ẹkpo nẹdẹ rre, ẹghẹ e Mosis ne ọguọmwadia e Nọyaẹnmwa, ọ re iran na ghi nọọn wẹẹ, “De ehe ne Nọyaẹnmwa ghi ye yi, ọmwa ne ọ miẹn avbe ọkaolotu emwa irẹn fan vbe obọ okun? De ehe ne Nọyaẹnmwa ghi ye yi ọmwa ne ọ rhie orhiọn irẹn ne Mosis?

^12-13 De ehe ne Nọyaẹnmwa ghi ye na yi, ọmwa ne ọ ya ẹtin ẹnrẹn la obọ e Mosis winna iwinna nọkhua, ọ keghi wannọ amẹ okun ye ihe eva, ọ na viọ emwa rẹn la uwu odin amẹ nii gberra, ne ọ ya hin usi ẹdẹdẹmwẹdẹ.” Rhunmwuda ne Nọyaẹnmwa na viọ iran khian, okhian ke wa gha kẹ iran zẹ vbe ẹsin oha, iran ma vbe rrua owẹ uhukpa.

¹⁴ Zẹ vbene a viọ ẹmila gha rrie iya ne emwi na maa, erriọ ọ re Nọyaẹnmwa rhie ikẹtin ne emwa rẹn. Ọ su emwa rẹn ọ keghi rhie uyi gie egbe ẹre.

Erhunmwu Itohan Kevbe Iyobọ

¹⁵ E Nọyaẹnmwa, gbearoghe odẹ ne ima ye ke ẹrinmwi gha dee, ehe ne uwẹ ye vbe uwu uhuanmwẹ kevbe uyi ruẹ. Ẹnina nọkhua ne u mwẹ ghe ima vboo? Ẹtin ruẹn vbo? Ahoẹmwọmwa kevbe itohan ruẹn vbo? Ghẹ yangbe mwa.

¹⁶ Wẹ ọrọre erha mwa. Ebraham kevbe Jekọh ne avbe erha mwa odede ma ka ima yọ, sokpan, wẹ ne Nọyaẹnmwa, wẹ ọrọre erha mwa, wẹ ọ re ọmwa ne ọ wa miẹn ima fan dee ẹdẹ.

¹⁷ Vbua ghi na gie ima bibi hin odẹ ruẹ rre hẹ yi? Vbua ghi na gie ima zevbudu sẹrriọ, ne ima ghi na fi iyeke gbe uwẹ? Werriegbe rre, rhunmwuda iran ni ga uwẹ, rhunmwuda iran ni wa re ọwuẹ, ke otọe gha dee.

¹⁸ Avbe eghian khulo ima ne emwa ruẹn nihuanrẹn kua vbe ovbi ẹghẹ kherhe. Iran kegha gbe ukpukpẹ vbe ehe nọhuanrẹn ruẹn.

¹⁹ U ke ghi ru ima zẹ vbene a gha a kha ighẹ u ma he ka gha re ogie ima ẹdẹ, vbene a gha a kha ighe ma ma he gha re emwa ruẹn ẹdẹ.