Aizaia 62 - Edo Bible (E Baibol Ẹdo) Version 1996

¹ I gha guan ne I ya rhie igiọdu ne Jerusalẹm. Mẹ i ra hunwan a te do miẹn rẹn fan. Ne akhọnmiotọ ẹre vbe gha baa zẹ vbe ukpa vbe asọn.

² Jerusalẹm, avbe uhunmwu ẹvbo, gha ye aro iran miẹn akhọnmiotọ ọwuẹ avbe ọba hia gha miẹn uyi ruẹ a gha he uwẹ eni ọgbọn eni ne Nọyaẹnmwa tobọ ẹre hee ruẹ re.

³ U ghi do yevbe ẹde ne ọ mose ne Nọyaẹnmwa.

⁴ A i ghi dọlegbe tie ruẹ “Evbahe.” Ra ne a gha tie otọe ruẹ “Ne Ọdọ He.” Eni ruẹn nọgbọn ghi gha re “Ẹko Ẹre Maa Osanobua.” A ghi gha tie otọe ruẹ “Ne Ọdọ Bọ,” rhunmwuda, ẹko rua maa e Nọyaẹnmwa ọ ghi vbe yevbe ọdọ ne otọe uwa.

⁵ Zẹ vbe igbama ne ọ rhie ọvbokhunvbi rọnmwẹ ọmwa ne ọ yi uwẹ gha rhie ruẹ rọnmwẹ zẹ vbene ẹko ovbiọha rhiẹnrhiẹn ọdafọn ọha erriọ ọ re ẹko rua ra gha maa Osanobua rua.

⁶ Jerusalẹm, I viọ avbe abodẹ ye ekẹn ọlẹga ruẹ nẹ ohan i gie iran hunmwan vbe avan ra asọn te iran ra gha ye Nọyaẹnmwa eyan ne ọ yanrẹn rre, iran i vbe gie irẹn mianmian.

⁷ Iran i ra gie ẹe hẹwẹ ọ te do rhie Jerusalẹm werriegbe ye ihe ẹre. Ne ọ ya ẹe khian okpẹvbo ne otọ agbọn hia go wan.

⁸ E Nọyaẹnmwa yan eyan akekhọerre nẹ ọ gha ya ẹtin irọẹn mu ẹẹn sẹ, “Ọka ruẹ i ghi re ne avbe eghian ruẹn gha ya gha koko egbe iran. Avbe ọrriọvbe i ghi ra dọlegbe gha rhie ayọn ruẹn da.

⁹ Sokpan, wẹ ne ọ kọe, ne ọ vbe rhọ ọka nii ẹre ọ gha vbe rri ebrẹd ẹre, u ghi rho e Nọyaẹnmwa, wẹ ne ọ gbearoghe ne u na kọlọ azara nii ọ re ọ gha vbe da ayọn ẹnrẹn vbe ore Ọgua Osa mwẹ.”

¹⁰ Wa ne ivbi e Jerusalẹm, wa khian ladian adesẹ ore rre, ne uwa ya zẹ odẹ khẹ ivbi uwa ni werriegbe die owa. Wa zẹ odẹ ne ọ vbẹe, wa la okuta hia kua vbọ wa yi ama yọ, ne avbe uhunmwu ẹvbo miẹn ehe na rẹn.

¹¹ Wẹ te Nọyaẹnmwa tama otọ agbọn hia na: “Wa tama ivbi e Jerusalẹm, wẹ Nọyaẹnmwa dee ra do miẹn ruan fan, ọ gha vbe viọ avbe emwa ne irẹn faẹn vbe irri mwẹ obọ gha dee.”

¹² A gha tie uwa, “Emwa nọhuanrẹn ọghe Osanobua,” “Emwa ne Nọyaẹnmwa miẹnfan.” A gha tie Jerusalẹm, “Ẹvbo ne Osanobua ho ẹmwẹ ọnrẹn,” “Ẹvbo ne Osanobua ma fi Iyeke Gbe.”