Aizaia 60 - Edo Bible (E Baibol Ẹdo) Version 1996

Uyi E Jerusalẹm Vbe Ẹdẹ Nakhuẹ

¹ Kpaegbe Jerusalẹm ne u viọ asan ladian vbe owẹn, uyi e Nọyaẹnmwa ọ re ọ viọ asan yan ruẹn.

² Avbe uhunmwu ẹvbo nekpa, ebiebi gha gue iran muotọ sokpan, uwanmwẹ e Nọyaẹnmwa gha wan mu uwẹ. Uwanmwẹ ọghe rhunmwuda ighẹ rẹn rre evba, gha guẹ gha rrọọ.

³ Avbe uhunmwu ẹvbo gha rri uwu uwanmwẹ ruẹn avbe ọba gha vbe gha die uwu ẹdẹ ọgbọn ọwuẹ.

⁴ Tọn aro mu ne u ghe emwi ne ọ sunu. Emwa ruẹn gha si egbe koko ne iran gha die owa. Avbe ivbuẹ nikpia gha ke otọe urria rre, a gha mu avbe ivbuẹ nikhuo zẹ vbe emọ obọ.

⁵ Wẹ gha miẹn ọna, u ghi vuọn ne oghọghọ ọ gha bọbọ ọ egbe sẹrriọ wẹ, u ghi gha guọ kpẹkpẹkpẹ. A gha viọ ẹfe avbe uhunmwu ẹvbo bu ruẹ gha dee. Ẹfe iran gha ke iyeke okun bu ruẹ gha dee.

⁶ Usun lọghọọ ọghe aranmwẹ kamẹl gha la ato gberra, ke Midian kevbe Efa gha dee. Iran ke Siẹba rre, iran kevbe igoru kevbe eturari. Emwa gha na iyẹn iwinna esi ne Nọyaẹnmwa winna ẹn.

⁷ Avbe ohuan e Keda kevbe Neboiọt hia. a gha viọ iran bu ruẹ rre zẹ vbe emwi izọ ese a gha ya iran zọ ese vbe Ogiukpo ghe Nọyaẹnmwa. E Nọyaẹnmwa ghi do ya Ọgua Osa ẹre khian ne ọ mwẹ uyi sẹẹ vbene ọ ka ye ẹdẹ.

⁸ De okọ ne ena khin ni bi dee vbe uhimwẹ amẹ yi? Zẹvbe avbe idu ni werriegbe die owa?

⁹ Avbe okọ ni ke otọ urria dee nọ. Te iran viọ emwa Osanobua die owa. Iran viọ esiliva kevbe igoru mwẹ obọ dee ne iran do ya ya ọghọ ne eni e Nọyaẹnmwa Osanobua nọhuanrẹn ọghe Izrẹl. Ne ọ ye avbe uhunmwu ẹvbo hia gha ya ọghọ ne emwa irẹn.

¹⁰ E Nọyaẹnmwa tama Jerusalẹm wẹẹ, “Avbe orhunmwuyẹn ọ re ọ ra gbe ekẹn ruẹn. Avbe ọba iran ghi gha gaa ohu ọ re ọ mu mwẹ ne I na rri uwa oya sokpan banbanna nian, I gha rhie aro ne ọ maa ọghomwẹ kevbe itohan mwẹ ma uwa.

¹¹ A gha kie urho ruẹ yotọ asọn kevbe avan ne avbe ọba avbe uhunmwu ẹvbo. Sẹtin gha viọ ẹfe iran guẹ.

¹² Sokpan avbe ẹvbo ni ma ga uwẹ a gha fuẹn iran an fẹẹrẹ.

¹³ “Erhan agba, umẹ kevbe uvbiakhẹ erhan ne ọ ghi maa sẹ vbe ẹgbo e Lebanọn a gha viọ iran do ya dọlọ e Jerusalẹm ruẹn bọ. Ne a do ya ẹe ya Ọgua Osa mwẹ mose. Ne a do ya ẹvbo mwẹ gha mwẹ uyi.

¹⁴ Ivbi avbe emwa ni te gha wọ ruẹ uhunmwu gha rre. Iran ghi ya uhunmwu rhanmwẹ otọ ya ọghọ nuẹn. Avbe iran ni te ka gha giọ yi. Gha do ga vbe akharha ruẹ. Iran gha tie ruẹ ‘Ore nọkhua ọghe Nọyaẹnmwa,’ ‘E Zaiọn ne Ore Nọkhua ọghe Osanobua Nọhuanrẹn Izrẹl.’

¹⁵ “A i ghi ra he uwẹ yotọ ra ne a gha khu iwu ruẹ, ẹvbo ne a na lẹkua, ne ọ dihoi rua, I gha ya a khian nọkhua kevbe ne ọ mose ehe oghọghọ ẹdẹ kevbe ẹdẹdẹmwẹdẹ.

¹⁶ Avbe uhunmwu ẹvbo kevbe avbe ọba, ọ re ọ ra gha gbe aro ghe ruẹ. Zẹ vbene iyọmọ koko ovbi ẹre. Wẹ gha rẹn wẹ mẹ ne Nọyaẹnmwa ọ re ọ miẹn ruẹn fan, wẹ Osanobua ne ọ mwẹ ẹtin ọghe Izrẹl ọ re ọ fan an fua.

¹⁷ “I gha viọ igoru guẹ ye ihe oze esiliva kevbe oze, ye ihe ematọn vbe erhan kevbe ematọn ye ihe okuta. Iran ni khaemwisẹ yan ruẹn i ghi ra wọ ruẹ uhunmwu ọvbehe, I gha ru ẹe ne iran ya ẹmwata kevbe ọfumwegbe gha khaemwisẹ.

¹⁸ A i ghi họn ẹmwẹ ọkhọ vbọ ọvbehe, ọfuan i ghi ra dọlegbe rhia ẹvbo ruẹ ua I gha degue ruẹ I ghi vbe gbinna nuẹn zẹ vbe ekẹn ne a gbe lẹga ẹvbo. Wẹ gha rho mwẹ rhunmwuda, I miẹn ruẹn fan nẹ.

¹⁹ “Ovẹn i ghi ra gha re uwanmwẹ ruẹn vbe avan ọvbehe, ra ne uki gha re uwanmwẹ ruẹn vbe asọn, mẹ ne Nọyaẹnmwa ọ re ọ ra gha re uwanmwẹ ruẹn ọghe etẹbitẹ. Uwanmwẹ uyi mwẹ gha wan mu uwẹ egbe.

²⁰ Ẹghẹ akhiẹ ruẹ gha sẹ ufomwẹ. Mẹ ne Nọyaẹnmwa, ọ re ọ ra gha re uwanmwẹ etẹbitẹ ruẹ ne ọ gha tọ sẹ owẹn kevbe uki.

²¹ Emwa ruẹn hia gha ru emwi ne ọ kere iran gha vbe yan otọe nii ẹdẹdẹmwẹdẹ. Mẹ ọ re ọ kọ iran, mẹ ọ re ọ yi iran ne I ya rhie ukpọlọmwẹ mwẹ ma ehia.

²² Uhin wẹ ẹgbẹe ne ọ kanmwa sẹ ke ne ọ rriotọ sẹẹ gha do gha kpọlọ zẹ vbe uhunmwu ẹvbo ne ọ mwẹ ẹtin. Ọ gha sẹ ẹghẹ ne ọ kei yi, I gha ru ẹe ne ọ na sunu ẹgiẹgiẹ. Mẹ ọrọre Nọyaẹnmwa.”