Aizaia 6 - Edo Bible (E Baibol Ẹdo) Version 1996

Osanobua Tie Aizaia Ne Ọ Do Gha Re Akhasẹ

¹ Vbe ukpo ne Ọba Uzaia wu, I keghi bẹghe Nọyaẹnmwa. Ọ keghi tota ye ẹkete ẹre, ọ yo, ọ keghi vbe ye gelete, emwi ne ọ ya mu egbe keghi vuọn Ọgua Osa hia.

² Emwi ne a yii ni baa gidigidi vbe erhẹn keghi mudia lẹga ẹre, ọkpọkpa vbe uwu iran keghi mwẹ ifuẹn ehan. Ọkpọkpa vbe uwu emwi ne a yii nii keghi ya ifuẹn eva gue aro, ọ keghi ya eva gue owẹ, ọ keghi gha ya eva ni dekẹe tin.

³ Iran keghi gha go tama egbe wẹẹ: “Huanrẹn, huanrẹn, huanrẹn! Ne ọ huanrẹn ọ re Nọyaẹnmwa ne Oghodua khin! Uyi ẹre vuọn agbọn hia.”

⁴ Ulamwẹ urhu iran keghi mu ẹyotọ Ọgua Osa rueghe, ighogho keghi vuọn nene Ọgua Osa tobọre.

⁵ Mẹ keghi kha wẹẹ, “I wiri! Ọghomwẹ fo nẹ, rhunmwuda ẹmwẹ ne ọ rhirhi ke akhuarhamwunu mwẹ ladian, orukhọ nọ, uwu ẹbu emwa ne ẹmwẹ ne iran guan hia wa vbe re orukhọ ọ re I ye. Sevba, mẹ keghi ye aro mwẹ bẹghe Ọba, e Nọyaẹnmwa ne Oghodua.”

⁶ Ọkpa vbe uwu avbe emwi ne a yi nii keghi tin bu mwẹ gha dee, ọ keghi ye awan mu ogiọnmwẹ erhẹn ẹyin vbe Ogiukpo gha dee.

⁷ Ọ keghi ya ogiọnmwẹ erhẹn ẹyin nii kaan mwẹ akhuarhamwunu, ọ wẹẹ, “Ọnọna dekan ruẹn akhuarhamwunu nẹ, rhunmwuda ọnii, irriabe ruẹ fo nẹ, a vbe ya orukhọ ruẹ bọ ọ.”

⁸ Iyekọnii, mẹ keghi họn vbe Nọyaẹnmwa khare wẹẹ, “De ọmwa ne I gha gie? De ọmwa ne ọ gha yo ukọ ne ima?” Mẹ keghi wanniẹn wẹẹ, “I gha yo! Gie mwẹ.”

⁹ Ẹre ọ na tama mwẹ wẹ ne I ya ta uhunmwu na ma avbe emwa nii wẹẹ, “Vbene ọ rhirhi a khọn uwa ne uwa rhie aro yotọ sẹ, wa i ra rẹn emwi ne ọ sunu.”

¹⁰ Rẹn keghi vbe tama mwẹ wẹẹ, “Gie ekhọe iran ne emwa na gbin, gie ehọ iran yin, ne aro iran vbe rhu. Ne iran ghẹ bẹghe ra ne iran họn, ra ne iran rẹn emwi ne a yae kha. Ọ gha gie iran ru, iran sẹtin fiwerriẹ bu mwẹ gha dee, mẹ ghi mu iran egbe rran.”

¹¹ Mẹ keghi nọ wẹẹ, “Inu ẹghẹ ọ re ọ ra gha ye vbenian la vbe otọe yi e Nọyaẹnmwa?” Rẹn keghi wanniẹn wẹẹ, “Rhinrin avbe okpẹvbo nii tedo rẹnkhẹn uan ne ehia vbe dihoi rua, a te do miẹn wẹ avbe owa nii khian ne ẹvbo i ghi ye, a te do miẹn wẹ avbe otọe nii hia dihoi rua, ne ehia la ọrhiae rrie.

¹² I gha viọ avbe emwa nii gha rrie ehe ne ọ rrei, I ghi ya otọe nii khian ne ọ dihoi rua.

¹³ Gia kha wẹ arhiọnkpa kẹkan miẹn uhunmwu vbe uwu arhin igbe vbe otọe nii, te a ra ye vbe fuẹn irẹn uan, ọ ghi yevbe ut ukhunmwu erhan okan ne a tọn gbe otọ nẹ.” (Ut ukhunmwu ni mudia ye omuhẹn ọgbọn ne emwa Osanobua.)