Aizaia 58 - Edo Bible (E Baibol Ẹdo) Version 1996

Aguẹ Ẹmwata

¹ E Nọyaẹnmwa khare wẹẹ, “Kakabọ go vbene ẹtin ruẹn sẹe! Tama Izrẹl ne emwa mwẹ, vbene orukhọ iran ye hẹ.

² Ẹdẹgbegbe ọ re iran ya ga mwẹ, iran ghi vbe kha wẹ iran ho ne iran rẹn vbene I ru emwi hẹ, kevbe ne iran vbe gha ya uhi mwẹ ru emwi. Iran khare wẹ, iran ho ne I yi uhi ẹmwata ne iran, kevbe wẹ te ọ wa bọbọ iran egbe ne iran gha ga mwẹ.”

³ Emwa nii nọrẹn wẹẹ, “Vbọzẹ ne ima gha na gha ya aguẹ yi adeghẹ e Nọyaẹnmwa i dẹghe ẹre. Vbọzẹ ne ima gha na gha ya ohanmwẹ rriegbe adeghẹ rẹn i zẹ yọ.” E Nọyaẹnmwa tama iran wẹẹ, “Ẹmwata ne ọ rrọ ọrọre wẹ ẹghẹ ne uwa na rre aguẹ, iwinna obọ uwa ọ re uwa mu aro da, wa ghi vbe gha wọ iran ni winna ne uwa uhunmwu.

⁴ Aguẹ ne uwa ye ghi do ya uwa khian emwa ọkhọ, wa ghi gha gui, wa ghi gha gbinna. Wa yayi wẹ egbe aguẹ vberriọ gha ye imẹ gha zẹye erhunmwu uwa ra?

⁵ Wa gha rre aguẹ, wa ghi gha rri egbe uwa oya, wa ghi hierre vbe ebe irunmwu, wa ghi wa ukpọn akhiẹ kevbe emuẹn yotọ ne uwa gha lovbiẹ yi. Ọnii ọ re uwa tie ẹre aguẹ ra? Wa yayi wẹ ọnii gha yẹ imẹ ra?

⁶ “Egbe aguẹ ne imẹ ho ọ re ọna khin; wa viọ eghan ne a ya wọ emwa uhunmwu, kevbe urọnghọn aita ẹmwata kua, ne uwa gie iran ne a wọ ẹre uhunmwu gha rrie kẹkan.

⁷ Wa fian ne iran ne ohanmwẹ gbe vbe evbare uwa, ne uwa vbe gha gie iran ne ivbiogue ne ẹ i mwẹ owa gha la owa uwa. Wa gha viọ ukpọn ne iran ne ẹ i miẹn rhuan, ne uwa ghẹ he ne uwa ru iyobọ ne etẹn uwa.

⁸ “Ẹghẹ nii, aro ne ọ maa mwẹ ghi gha wan mu uwa egbe zẹ vbe owẹn owiẹ, ẹwẹn uwa ghi vbe rherhe rrie. Mẹ gha gu uwa gha rrọọ ẹghẹ hia ne I miẹn uwa fan, aro mwẹ ghi degue uwa vbe igie-nenẹ.

⁹ Wa gha na erhunmwu, I ghi họn. Wa gha tie mwẹ, I ghi khuẹnniẹn. “De ghẹ wa dobọ ne uwa na wọ emwa uhunmwu yi, deba uyinmwẹ ne ọ ghi khọ ọghe otilua, kevbe ẹmwẹ dan hia.

¹⁰ Adeghẹ wa rhie evbare ne ọmwa ne ohanmwẹ gbe, wa na gie ẹko vuọn iran ne ẹ i mwẹ, ẹghẹ nii, ebiebi ni lẹga uwa gha khian uwanmwẹ ogiavan.

¹¹ Ẹghẹ hia mẹ gha ya gha su uwa, I ghi ya emwi ni maa sẹ uwa ọkẹn I gha gie uwa wegbe, egbe ghi vbe rran uwa. Wa gha yevbe ogba ebuwọnmwẹ ne amẹ mobọ ye, zẹvbe ovbi ẹzẹ ne amẹ i na ka ẹdẹ.

¹² Avbe emwa ruẹn gha dọlegbe bọ avbe emwi ni guọghọ ua ke ẹghẹ ni gha dee. Iran ghi bọlọ owa yan avbe ẹyotọ nẹdẹ nii. A ghi gha tie uwa emwa ni dọlegbe gbe ekẹn nii, emwa ni munọ avbe owa nii te khian itowa kpaegbe.”

Ere Ne Ọ Rre A Rhie Ẹdẹ ikẹtin Lẹre

¹³ E Nọyaẹnmwa khare wẹẹ, “A deghẹ wẹ ru Ẹdẹ Ikẹtin zẹ vbe emwi. nọhuanrẹn, ighẹ u ma gha do ẹki egbe ruẹ vbe ẹdẹ nẹdẹrriọ; a deghẹ u ka ẹdẹ mwẹ nọhuanrẹn yọ, ighe u na yọghọ ne ẹẹn vbekpa ne u i na ya ẹe yo okhian, ra ne u ya ẹe winna ra ne u gha gbe ikuẹmwẹ vbe ẹdẹ nẹdẹrriọ.

¹⁴ Ẹghẹ nii, wẹ gha miẹn oghọghọ ne a miẹn vbe uwu ugamwẹ mwẹ. I gha ya uwa khian ne a yọghọ na vbe otọ agbọn hia, wa gha vbe rriere otọ ne I mu ne Jekọb ne erha uwa odede. Mẹ ne Nọyaẹnmwa tae nẹ.”