Aizaia 57 - Edo Bible (E Baibol Ẹdo) Version 1996

A Wẹ Ne Izrẹl Na Gho Ẹbọ, Ẹ I Ma

¹ Emwa esi ghi wulo, ai miẹn ọmwa ne ọ rẹn otọ ẹre ra ne ọ vbe zẹyọ. Sokpan iran gha wulo, ọkhọ ọhanabe i sẹtin kuan iran.

² Iran ni ye ẹdagbọn iran ru emwi esi, iran ghi miẹn ọfumwegbe kevbe ikẹtin vbe uwu.

³ Wa larre ne a do bu ohiẹn uwa, wa ne emwa orukhọ. Wa ma maa sẹẹ avbe oso, iran ni ghẹẹ kevbe avbe ebabotu.

⁴ De ọmwa ne uwa ya gbogiẹ yi? De ọmwa ne uwa ne ọhọn ohoghe na wee yi?

⁵ Wa gho avbe ẹbọ umọbiẹ nii, vbene uwa na ru emwi ọdọ vbe amwẹ vbe ototọ avbe erhan iruẹemwi uwa nii. Wa ya ivbi uwa zọ ese vbe avbe uvun okuta ni rre vbe a gha bu otọ ẹzẹ.

⁶ Wa viọ okuta ikpẹbọ ke evba gha dee, wa ghi ya gho iran zẹ vbe ẹbọ. Wa ghi gha sa ayọn ye otọ zẹvbe emwi ne a ya zọ ese ghe iran, wa ghi vbe gha viọ ọka gie iran vbe emwi izọ ese. Wa yayi wẹ avbe emwi na yẹ mwẹ ra?

⁷ Wa ghi gha yo avbe oke ni yo ne uwa ya gha zọ ese kevbe ne uwa ya gha ru emwi ọdọ vbe amwẹ.

⁸ Wa ghi viọ ukhurhẹ oya ọghe uwa ye onurho uwa ne ọ ke ore. Wa he mwẹ yotọ. Wa ghi gha bannọ uan lovbiẹ ye ukpo uwa nekhua, wa kevbe emwa ne uwa zẹ ọ re ọse, ọmwa ne uwa ha osa na ne ọ do lovbiẹ ke uwa. Evba ọ re uwa na gie ẹko vuọn orriarria uwa.

⁹ Wa sa ori ne ọ winhin ye egbe kẹe kevbe ori ne a ya wuo. Wa keghi ya gho e Molẹk. Wa gie emwa la erhan la irri ya gha gualọ ẹbọ ne uwa gha gho uhin ighẹ te uwa gie yo ẹvbo iran ni wulo nẹ.

¹⁰ Wa miẹn ẹsọn a gha wu a rrie gha gualọ ẹbọ ọvbehe, sokpan, wa ma zobọ vbọ. Wa ro wẹ ukhurhẹ oya ọghe uwa ọ re ọ rhie ẹtin ne uwa, rhunmwuda ọnii, ọ re egbe ma na wọ uwa.

¹¹ E Nọyaẹnmwa khare wẹẹ, “Vbe avbe ẹbọ na ye ne afianma rẹn fian uwa na yi, ne uwa na ta ohoghe ma mwẹ, wa na vbe mianmian mwẹ fẹẹrẹ? Rhunmwuda ne I na hunwan la ẹghẹ ne ọ taẹn vberriọ ọ re uwa na dobọ uyi ne a rhie mẹ yi ra?

¹² Wa ro wẹ emwi ne uwa ru gbae, sokpan, I gha vẹ uwa uhe ua, avbe ẹbọ uwa i ra vbe sẹtin ru iyobọ ne uwa.

¹³ Wa gha nọ iyobọ, wa gie avbe amazẹ uwa ni ye uwa obọ. Ovbi ẹhoho kherhe ọ re ọ ra hoho iran gha rrie. Sokpan iran ni mu ẹtin yan mwẹ gha di otọe ni ya, iran ghi vbe gha ga mwẹ vbe uwu ọgua Osa mwẹ.”

Osanobua Wẹ Rẹn Gha Ru Iyobọ, Ọ Gha Mu Iran Egbe Rran

¹⁴ E Nọyaẹnmwa khare wẹẹ, “Wa gie avbe emwa mwẹ werriegbe bu mwẹ gha dee. Wa viọ idobo hia hin iran odẹ rre. Wa zẹ odẹ ni ne uwa zẹ ọe yotọ!

¹⁵ “Mẹ ọrọre Osanobua ne ọ yo kevbe ne ọ kpọlọ ne ọ rrọ ẹdẹdẹmwẹdẹ. Ehe ne ọ yo kevbe ne ọ huanrẹn ọ re imẹ dia, sokpan mẹ vbe di ọghe iran ni mu egbe rriotọ, kevbe ni roiro fi uyinmwẹ werriẹ ya, ne imẹ miẹn ehe na rhie idaehọ kevbe imuẹntiyan ọghe iran werriegbe ye ihe.

¹⁶ Mẹ ọ re ọ rhie arrọọ ne emwa mwẹ, rhunmwuda ọnii, mẹ i ra wa gha gu iran gui ra ne ohu iran gha mu mwẹ rhinrin ẹdẹ.

¹⁷ Ohu iran te mu mwẹ rhunmwuda orukhọ kevbe uzuanmwẹ iran, rhunmwuda ọnii, mẹ keghi rri iran oya, I na he iran yotọ. Sokpan, iran keghi wa zevbudu, iran na gha ru khian vbene ọ yẹ iran.

¹⁸ “I miẹn vbene iran ru hẹ nẹ, sokpan, I gha mu iran egbe rran, I gha su iran gha khian I ghi ru iyobọ ne iran, I gha vbe fu iran ni khiẹ ẹko rre.

¹⁹ I ya ọfumwegbe ne iran hia, ke iran ni sikẹ emwa na kevbe iran ni rre urria. I gha mu avbe emwa mwẹ egbe rran.

²⁰ Sokpan te emwa dan yevbe okun ne ọ hẹ yo hẹ rre, ne ulẹmwẹ ọnrẹn idobọ yi ne ọ na vẹ ladian, ọ ghi ya gha viọ iku kevbe isan ẹmila rre.

²¹ Egberọkhọmwẹ i rrọọ ne emwa orukhọ,” erriọ Nọyaẹnmwa khare.