Aizaia 56 - Edo Bible (E Baibol Ẹdo) Version 1996

A Gha Ka Uhunmwu Ẹvbo Hia Ba Ọghe Nọyaẹnmwa

¹ E Nọyaẹnmwa tama emwa rẹn wẹẹ, “Wa gha ru emwi ẹmwata kevbe ne ọ gbae, rhunmwuda, ẹ i ghi rrei ban I do miẹn uwa fan.

² I gha fiangbe iran ni rhie ẹdẹ ikẹtin lẹre vbene iran i na ru emwi ne ọ ma kei vbọ. I gha fiangbe iran ne ẹ i ru emwi dan rhọkpa.”

³ Ọ ma kei ne orhunmwuyẹn ne ọ deba emwa e Nọyaẹnmwa kha wẹẹ, “E Nọyaẹnmwa i ra gunmwẹ yaba emwa rẹn gha ga.” Ọmwa ne a ware, ọ ma kei ne ọ gha ro wẹ rhunmwuda ighẹ rẹn i sẹtin biẹ, rẹn i sẹtin gha re ọkpa vbe uwu emwa e Nọyaẹnmwa.

⁴ E Nọyaẹnmwa tama egbe ọmwa vberriọ wẹẹ, “A deghẹ u ya ọghọ mẹ, vbekpa ne u gha na rhie Ẹdẹ Ikẹtin lẹre, a deghẹ u vbe gha ru emwi ne ọ yẹ mwẹ, u na gha rhie uhi mwẹ mwẹ vbe ẹmwata,

⁵ ẹghẹ nii, a gha ye eni ruẹn rre vbe Ọgua Osa mwẹ kevbe uwu ẹbu avbe emwa mwẹ kpẹe vbotọ ẹsẹse sẹẹ akpawẹ te u biẹlẹ emọ ikpia kevbe emọ ikhuo. A i mianmian an ẹdẹdẹmwẹdẹ.”

⁶ E Nọyaẹnmwa vbe tama avbe erhunmwuyẹn nii do deba emwa irẹn, iran ni ho ẹmwẹ ọnrẹn, iran na vbe gha gae, iran ni rhie Ẹdẹ Ikẹtin lẹre, ne iran na vbe rhie uhi ẹre mwẹ vbe ẹmwata wẹẹ,

⁷ “I gha viọ uwa gha die Zaiọn, ne oke mwẹ nọhuanrẹn, I ghi rhie oghọghọ ne uwa vbe owa erhunmwu mwẹ, I ghi vbe rhan obọ miẹn ese ne uwa zọ vbe Ogiukpo mwẹ. A gha tie Ọgua Osa mwẹ owa erhunmwu ọghe emwa uhunmwu ẹvbo hia.”

⁸ E Nọyaẹnmwa ne Udazi, ne ọ viọ Izrẹl ne emwa rẹn ke iwe gha dee, yan nẹ wẹ rẹn gha ye viọ emwa ọvbehe eso rre do deba iran.

A Buu Abe Gbe Avbe Ọkaolotu Izrẹl

⁹ E Nọyaẹnmwa tama avbe uhunmwu ẹvbo ọvbehe nẹ wẹ ne iran gha dee zẹ vbe aranmwẹ akọn ne iran do gbele emwa irẹn re.

¹⁰ Ọ wẹẹ, “Avbe emwa hia ne a te wẹ ne iran gha gie odẹ ma emwa mwẹ ehia rhu aro. Iran ma rẹn emwirhọkpa. Iran yevbe avbe ekita abodẹ ne ẹ i gbọọ, iran ghi lovbiẹ fua iran ghi gha mina. U miẹn vbene ovbe rhiẹnrhiẹn iran hẹ!

¹¹ Iran yevbe ekita ne aro vbẹ ne ẹko i vuọn. Avbe ọkaolotu na ma rẹn emwirhọkpa. Dọmwadẹ ọghọe vbe uwu iran ghi wa gha ru vbene ọ khọnrẹn, iran ghi gha gualọ ọghe obọ iran. Iran ghi kha wẹẹ.

¹² ‘Wa rhie ayọn rre, ne a da ehia ne ọ sẹ ima obọ! Ẹdẹ nakhuẹ gha maa sẹ ẹdẹnẹrẹ na!’ ”