Aizaia 54 - Edo Bible (E Baibol Ẹdo) Version 1996

Ahoẹmwọmwa E Nọyaẹnmwa Ghe Izrẹl

¹ E Jerusalẹm, te uwẹ gha ye vbe okhuo ne ẹ i mwẹ emọ, sokpan, eban nian, u sẹtin so ihuan ne u vbe gha wee ne oghọghọ. Eban nian, u gha mwẹ emọ sẹ okhuo ne ọdọ ẹre ma sẹrae ẹdẹ,

² Gie owa ukpọn ne u ye kpọlọ sẹ ayọ, fian te avbe irri ẹre, vbe kan avbe ukeke ẹre ẹse.

³ U gha vbẹẹ ehe ne otọe ruẹ lae vbe igienenẹ. Otọe nii gha dọlegbe sẹ emwa ruẹn obọ ighẹ ehe ne avbe emwa ọvbehe yinrin na. Avbe ore ẹvbo ne emwa na lẹkua nian gha khian ne emwa vuọn rẹn.

⁴ Ghẹ fian afianma, a i ghi dọlegbe fa ruẹ ua ọvbehe; ai ghi dọlegbe si ọ kẹ otọ ọvbehe, u gha mianmian uyinmwẹ ama guobọdọ zẹvbe okhuo ọvbokhan. Kevbe ohioro ọbanabe ruẹ zẹvbe okhuo ne ọ degbe.

⁵ Te Ayi ne ọ yii uẹ ra yevbe ọdafọn ọn, e Nọyaẹnmwa ne Oghodua ọre a tie ẹre. Osanobua nọhuanrẹn ọghe Izrẹl gha miẹn ruẹn fan, rẹn ọ re ọ khaemwisẹ yan otọ agbọn hia.

⁶ Izrẹl te u ye vbe okhuo ọvbokhan ne ọdọ lẹẹ sẹ rae ekhọe ẹre na rhiaa ẹsẹse. Sokpan, e Nọyaẹnmwa dọlegbe tie ruẹ rriegbe ọ na kha wẹẹ,

⁷ “I sẹ uẹ rae vbe ovbi ẹghẹ kherhe aho ẹmwẹ ọmwa ne ọ dinmwi ọre I ra ya dọlegbe rhie ruẹ werriegbe.

⁸ Ohu mu mwẹ, I na fi iyeke gbe vbe ovbi ẹghẹ kherhe. Sokpan, I gha ho ẹmwẹ ruẹn ẹdẹdẹmwẹdẹ. Erriọ e Nọyaẹnmwa ne ọ miẹn ruẹn fan khare.

⁹ “Vbe ẹghẹ e Noa, I yanrẹn ne I ghẹghi dọlegbe gie amẹ ro gba otọ agbọn. Banbanna nian, I yanrẹn ne I ghẹ ghi dọlegbe mu ohu ghe uwa. I i ghi ra gu uwa gui ra ne I rri uwa oya.

¹⁰ Avbe oke nekhua ke negiẹrẹ sẹtin siẹn sotọ. Sokpan ahoẹmwọmwa mwẹ ghe uwa i ra fo ẹdẹ. Eyan ọfumwegbe ne I yan ma uwa I gha mu ẹn sẹ ẹdẹdẹmwẹdẹ.” Erriọ Nọyaẹnmwa ne ọ ho ẹmwẹ uwa khare.

¹¹ E Nọyaẹnmwa khare wẹẹ, “E Jerusalẹm wẹ ne ẹvbo ne u sẹsẹ kevbe ne egbe wọre. Vbe ne a i na vbe miẹn ne ọ fu ruẹ ẹko rre, I gha ya okuta ighobioye dọlegbe gbe ẹyotọ ruẹ.

¹² I gha ya okuta ikpẹrọnmwọ bọ owa ọkhẹ ruẹ, ke onurho ore ẹvbo ruẹ, okuta ne ọ baa zẹ vbe erhẹn, a ghi ya emwi itegbe ọghe ikpẹrọnmwọ gbe ekẹn ne ọ lẹga ẹvbo ruẹ.

¹³ “Mẹ ọ re ọ ra tobọmwẹ ma emwa ruẹn emwi I ghi rhie ẹfe kevbe ọfumwegbe ne iran.

¹⁴ Ẹmwata kevbe uhunmwu ẹmwẹ gha ya uwa wegbe. Wa gha fe vbe obọ ukpokpo kevbe ohan.

¹⁵ Adeghẹ ọmwaikọmwa guẹ gbinna, te ọ ru ẹe vbene imẹ ma na kue yọ, ọmwaikọmwa ne ọ guẹ gbinna gha de.

¹⁶ “Mẹ ọ re ọ yi ogun ne ọ hie erhẹn ya dunmwu emwi igbinna. Mẹ ọ re ọ vbe yi ovbiyokuo ne ọ ya nene emwi igbinna gbe ọmwa.

¹⁷ Sokpan, emwi igbinna ọkpa ne ọ gha sẹtin kuan ruẹn egbe i rrọọ; te u gha miẹn ẹmwẹ zẹ wanniẹn ọmwa ne ọ rhirhi ba ruẹ ifi ẹzọ. I gha gbinna ne eguọmwadia mwẹ. I ghi gie iran khọnmiotọ.” E Nọyaẹnmwa taa ẹe nẹ.