Aizaia 52 - Edo Bible (E Baibol Ẹdo) Version 1996

Osanobua Gha Dẹ Jerusalẹm Werriegbe

¹ Jerusalẹm, wegbe ne u vbe dọlegbe gha kpolo! Ẹvbo nọhuanrẹn ọghe Osanobua, ya ose yọ egbe ruẹ ẹwu. Avbe ni ma yayi i ghi dọlegbe fi owẹ la onurho ruẹ ọvbehe.

² Jerusalẹm, bọnmwẹ idobo kua vbe egbe kpaegbe vbe ebubẹ, ne u tota ye ẹkete ruẹ, wa rhan eghan ni de uwa, wa ne avbe oghunmwu ne ivbi e Zaiọn!

³ E Nọyaẹnmwa ne Udazi tama emwan rẹn wẹẹ, “Ẹghẹ ne uwa na khian eviẹn, a ma ha osa ye uwa uhunmwu, erriọ vbe nọ ẹghẹ ne a gha na fannọ uwa kua, a i ra vbe ha osa yọ.

⁴ Ẹghẹ ne uwa na ya gha rre Igipt zẹvbe ọrriọvbe, ekhọe obọ uwa ọ re uwa ya ru ẹẹ. Sokpan, ikẹtin ọ re Asiria ya viọ uwa gha rrie vbe ne ọ ma na ha osa rhọkpa yọ.

⁵ Egbọre ọ re ọ vbe sunu vbe Babilọn na, oghunmwu ọ re uwa khin, a ma vbe ha osa rhọkpa ye uwa uhunmwu. Ẹghẹ hia ọ re iran ni khaemwisẹ yan uwa ya rhuọ, iran vbe ghagha, iran ghi gha ya unu rhia mwẹ uan.

⁶ Vbe ẹdẹ ne ọ dee, wa gha miẹnkue wẹ mẹ ọrọre Osanobua, kevbe wẹẹ, I gu uwa guaan nẹ.”

⁷ U miẹn vbene ọ mose hẹ ne a bẹghe ọmwa ne a gie ẹre uhunmwu vbe ọ fian avbe oke ni rra dee do na iyẹn ne ọ maa, iyẹn ọfumwegbe! Ọ ya akhọnmiotọ wewe, ọ keghi tama Zaiọn wẹẹ, “Osanobua ọrọre ọba!”

⁸ Iran ni khẹ onurho ẹvbo nii gha wee iran gha koko wee ne oghọghọ. Iran gha tobọ iran ye aro iran bẹghe ẹre vbe Nọyaẹnmwa dọlegbe gha die Zaiọn.

⁹ Wa gha wee ne oghọghọ wa ne itowa ni rre Jerusalẹm! E Nọyaẹnmwa gha miẹn ẹvbo ẹre fan ọ ghi vbe fu avbe emwa rẹn ẹko rre.

¹⁰ E Nọyaẹnmwa gha lo ẹtin ẹnrẹn nọhuanrẹn ọ gha miẹn rẹn fan agbọn na hia gha vbe miẹn ọẹn.

¹¹ Wa ghẹ mwẹ wa ma kpao vbe Babilọn wa ni viọ emwi ne a ya ga vbe ọgua Osa mwẹ, wa ghẹ ye obọ kan emwi awua wa gie egbe uwa gha re nọhuanrẹn, ne uwa kpao.

¹² Ẹghẹ na, wa i ghi ra khirhi kpao, wa i ghi ra gha hia ne uwa lẹ fua. E Nọyaẹnmwa ne Osanobua uwa gha kodaro ne uwa ọ ghi vbe degue uwa vbe igienenẹ.

Ọguọmwadia Ne Ọ Rri Oya

¹³ E Nọyaẹnmwa khare wẹẹ, “Ọguọmwadia mwẹ gha miẹn ọ dunnaẹn vbe iwinna ne a wa ne ẹẹn; a gha ya ọghọ nọkhua ne ẹẹn.

¹⁴ Udu emwa nibun mu waa vbe iran bẹghe ẹre. A rhiaa akpa ne egbe ẹre ua sẹrriọ wẹ ọ ma ghi khọ ọmwa nagbọn.

¹⁵ Sokpan, te irẹn khian gha re ọyunnuan ne avbe uhunmwu ẹvbo nibun, avbe ọba gha yan unu uan, iran i miẹn ẹmwẹ ta. Iran gha bẹghe, iran ghi vbe rẹn otọ emwi ne iran ma he rẹn ẹdẹ.”