Aizaia 50 - Edo Bible (E Baibol Ẹdo) Version 1996

¹ E Nọyaẹnmwa khare wẹẹ, “Te uwa ro ra ighẹ te imẹ khulo emwa mwẹ kua zẹ vbene okpia khu amwẹ ọnrẹn fua ra? Ebe aheyotọ ne a ghi gbẹn ne ẹẹn vbo khekherriọ? Te uwa ro ighẹ te I khiẹnnẹ wa gha rrie iwe ra zẹ vbe ọmwa ne ọ khiẹnnẹ ivbi ẹre eviẹn? Ẹn o, iran viọ uwa oghunmwu gha rrie rhunmwuda orukhọ uwa. Te a khulo uwa ladian rhunmwuda emwi dan ne uwa ru.

² “Vbọzẹ ne avbe emwa mwẹ ma na zẹ yọ yi vbe I yo ya miẹn iran fan? Vbọzẹ ne iran ma na khuẹnniẹn vbe I tie iran? Mẹ ma wegbe sẹ ne ọ gha miẹn iran fan ra? Mẹ gha sẹtin ye ẹmwẹ unu mwẹ si okun ka I ghi Vbe ye avbe ẹzẹ khian ato sẹrriọ wẹ avbe ehẹn ni rrọọ ghi wulo rhunmwuda iran ma miẹn amẹ.

³ I gha sẹtin wẹ ne iso so ebiebi, vbene a gha kha wẹ te ọ khiẹ emwa ni wulo.”

Ahọn Ẹmwẹ Ọghe Ọguọmwadia E Nọyaẹnmwa

⁴ E Nọyaẹnmwa ne Udazi tama mwẹ ẹmwẹ ne I gha ta nẹ, ne I miẹn ehe na rhie ẹtin ne ne egbe wọre. Owiẹ owiẹ ọ re ọ ya gie ẹe gha bọbọmwẹ egbe ne I họn ẹmwẹ ne ọ gha ma mwẹ re.

⁵ E Nọyaẹnmwa rhie irẹnmwi mẹ nẹ, mẹ ma vbe sọtẹ ọ re ra ne I fi iyeke gbẹe.

⁶ I bannọ iyeke mwẹ yotọ ne iran ni gbe mwẹ, iran rhovbiẹ mwẹ, I ma gbe eta ye iran unu ẹghẹ nii iran na gha vbọlọ mwẹ eto ne uhunmwu iran na tulo asẹn yọmwẹ aro.

⁷ Sokpan ẹbọ iran i miẹn emwi ru mwẹ re rhunmwuda, e Nọyaẹnmwa ne Udazi mudia mẹ. I si aro gba vbe uhunmwu ne I ya ziengbe emwi ne iran ru I rẹnrẹn wẹ efa ira rruan mwẹ.

⁸ Rhunmwuda, Osanobua sikẹ mwẹ ọ gha kha wẹ I ma rriabe. De ọmwa ne ohan gha gie ẹe gunmwẹ gui yi? Wẹ ne ọ gie ima gba gha rrie iko wẹ ne ọ ba mwẹ ifi ẹzọ!

⁹ E Nọyaẹnmwa ne Udazi tobọ ẹre ọre ọ mu ẹzọ mwẹ gui. De ọmwa ne ọ gha miẹn abe bu gbe mwẹ khekherriọ? A gha ho iran ni gun mwẹ gui hia bẹkun; a gha ho iran bẹkun zẹ vbe ukpọn ne errarra re.

¹⁰ Wa hia ni ya ọghọ ne Nọyaẹnmwa ni vbe ya ẹmwẹ avbe eguọmwadia ẹre ru emwi, odẹ ne uwa la khian sẹtin wa gele so ebiebi sokpan wa ya egbe yan e Nọyaẹnmwa, wa mu ẹtin uwa yan Osanobua uwa.

¹¹ Wa hia ni si uma ne uwa fuẹn ẹrrẹe rua uma ne uwa si nii ọ re ọ ra fuẹn uwa a. E Nọyaẹnmwa tobọ ẹre ọ re ọ ra gie ẹe gha ye vberriọ ọkhọ ne ọ wegbe ọ re ọ ra rruan uwa.