Aizaia 5 - Edo Bible (E Baibol Ẹdo) Version 1996

Ihuan Ogba Azara

¹ Danmwehọ ihuan ne I ra so ma ruẹn, ihuan ọghe ọse mwẹ kevbe ogba azara ẹre: Ọse mwẹ kegha mwẹ ogba azara vbe oke ne ọ maa emwiokọ ẹsẹse.

² Ọ keghi vulo otọe nii, ọ na rhọ avbe okuta ni rrọọ hin, ọ keghi kọ azara ne ọ maa sẹẹ yọ, ọ keghi bọ owa ọkhẹ yọ ne a na gha khẹ ọre. Ọ keghi fian okọ ne a gha na gha minọẹn yọ, ọ keghi gha khẹ ne avbe ọmọ azara ni vbo, sokpan, ehia keghi wa kaan.

³ Rhunmwuda ọnii, ọse mwẹ keghi kha nian wẹẹ, “Wa ne emwa ni rre Jerusalẹm kevbe Juda, wa do bu ohiẹn imẹ kevbe ogba azara mwẹ.

⁴ Emwi eso rrọọ ra ne I ma sẹtin ru ne ẹẹn? Vbọ ghi zẹ yi, ne ọ na mọ ọmọ ne ọ kaẹn vbe imẹ rhie aro ye ọmọ ni maa?

⁵ “Vbene I ra ru ogba mwẹ hẹ ọ re ọna khin. I gha guọghọ ogba ne I gba ga ẹre hin rre, I ghi vbe guọghọ ekẹn ne ọ te degue ẹre. I ghi vbe gie aranmwẹ oha rri ọe, ne iran vbe ya owẹ rrilo ẹe muotọ.

⁶ I gha gie irunmwu sọn rhu ẹe, I i ra viọ azara ni abọ ra ne I vulo otọ ẹre. Sokpan, I gha gie igban kevbe ọkọsọ ma rhu ẹe. I gha wa vbe tama iso ne ọ ghẹ gie amẹ rhọ yọ.”

⁷ Izrẹl ọrọre ogba azara ọghe Nọyan ne Oghodua; emwa e Juda ọrọre azara ne ọ kọ yọ. Rẹn te rhie aro yọ ne iran gha ru emwi ne ọ maa, sokpan, iran kegha do izigha. Rẹn te rhie aro yọ ne iran gha ru emwi ne ọ gbae, sokpan, emwa ne obọ iran vbare kegha tu wẹ ne a bu ohiẹn ẹmwata.

Emwi Dan Ne Emwa Ru

⁸ Ọghe uwa fo nẹ! Wa gha dẹlẹ owa ọvbehe kevbe ugbo ọvbehe, ne uwa viọ ba ne uwa ka mwẹ. Ẹ i ghi rre gbe ban, emwa ọvbehe i ghi miẹn ehe dia, wa ọkpa ọ re ọ ghi ra gha rre otọe nii.

⁹ I họn ẹn vbe Nọyaẹnmwa ne Oghodua khare wẹẹ, “Avbe owa nekhua ne mose mose na, gha rẹnkhẹn uan.

¹⁰ Azara ne a kọ ye awowo otọe isẹn, egalọn ofigbọn isẹn kẹkan ọre a ra gha miẹn vbọ. Ẹgbẹdin emwiokọ enẹ ne a ya kọ, ẹgbẹdin emwiokọ ọkpa kẹkan ọre a gha vbe gha rhọ vbọ.”

¹¹ Ọghe uwa fo nẹ! Wa ghi wa rhiọrre vbe owiẹ vbirrivbirri ya suẹn ayọn ne a da, wa ghi ya ota hia gha re emwa ne ayọn gbe.

¹² Wa ghi viọ akpata, ẹrogbo kevbe okpe kevbe ayọn ye ehe ne uwa na gbe ẹbu rri evbare, sokpan wa ma rẹn otọe emwi ne Nọyaẹnmwa ru,

¹³ rhunmwuda ọnii, a gha viọ uwa gha rrie zẹvbe oghunmwu. Ohanmwẹ gha gbele avbe ọkaolotu uwa a, ovbamẹ ghi gbele emwa kẹkan.

¹⁴ Ohanmwẹ iran wa gbe ẹvbo avbe iran ne orinmwi, ọ vbe rhan unu yotọ khẹ iran gbodoo. Ọ minọ emwa nekhua ni rre Jerusalẹm re deba avbe emwa kẹkan ni gbe izabọbọ bi lele iran khian.

¹⁵ A gha fa edọmwadẹ ọghọe rua, a gha vbe mu edọmwadẹ ọghọe ne ọ tọn egbe mu rriotọ.

¹⁶ Sokpan, e Nọyaẹnmwa ne Oghodua rhie maa vbene irẹn kpọlọ hẹ vbekpa ne ọ na ru emwi ne ọ kere, ọ keghi vbe rhie uhuanmwẹ ọnrẹn maa vbekpa ne ọ na bu ohiẹn avbe emwa.

¹⁷ Avbe ivbi ohuan gha rri irunmwu, avbe ivbi ẹwe ghi vbe gha rria vbe itowa ni rre ẹvbo ni.

¹⁸ Ọghe uwa fo nẹ! Wa ma sẹtin zobọ vbe orukhọ ne uwa ru.

¹⁹ Wa khare wẹẹ, “Wa wẹ Nọyaẹnmwa gie obọ kẹe vbe emwi ne ọ wẹ rẹn ra ru, ne ima miẹn ọẹn. Wa gie Osanobua nọhuanrẹn ọghe Izrẹl ru vbe ne ọ mwamwa ẹn, wa gie a ghe emwi ne ọ rre ọre ekhọe.”

²⁰ Ọghe uwa fo nẹ! Wa ni tie emwi dan emwi esi, kevbe emwi esi, emwi dan. Wa fi ebiebi werriẹ khian uwanmwẹ, wa keghi fi uwanmwẹ werriẹ khian ebiebi! Wa ya emwi ne ọ rriara khian ne ọ rhiẹnrhiẹn, wa keghi ya ne ọ rhiẹnrhiẹn khian ne ọ rriara.

²¹ Ọghe uwa fo nẹ! Wa ro ighe uwa wan, ighe uwa guẹ emwi gbe.

²² Ọghe uwa fo nẹ! Wa ni re asukpekhae vbe egbe ọgọ ayọn. Emwa ni din kevbe ne ohan i mu vbe ọ gha sẹ egbe ayọn ne a gua.

²³ Sokpan, wa gha rri igho odieke kherhe nẹ, wa ghi fannọ emwa ni rri abe kua, wa ighi gie ne ọ ma rukhọ miẹn ibuohiẹn ẹmwata ne ọ khẹke ẹe.

²⁴ Rhunmwuda ọnii nian, vbene irunmwu kevbe ebe ne ọ kakae kinkin rre, ọ ghi vbe giẹn uan vbe erhẹn, erriọ ọ re inian uwa gha kẹkẹ ua, ebe uwa ghi vbe kaka a, ọ ghi hoho kua, rhunmwuda, wa he emwi ne Nọyaẹnmwa ne Oghodua, Osanobua nọhuanrẹn ọghe Izrẹl ma ima ẹre yotọ.

²⁵ E Nọyaẹnmwa mu ohu emwa irẹn, rẹn vbe niẹn obọ ẹre ladian nẹ ne ọ ya rria iran ikhi. Avbe oke nekhua gha mu rueghe, a gha vbe sẹ ikun avbe emwa ni wulo rae ye adesẹ ore zẹvbe iku, Sevba, ohu e Nọyaẹnmwa i he ye fo ye evba, te ọ gha ye niẹn obọ ẹre ladian ne ọ ya rri iran oya.

²⁶ E Nọyaẹnmwa ru iyama nẹ wẹ ne a tie uhunmwu ẹvbo okpa ne ọ rre urria rre. Ọ fi ewọe gie iran wẹ ne iran ke ehe ne agbọn sẹe gha dee. Ghe vbe iran zẹgiẹgiẹ ya ululẹ dee.

²⁷ Ọkpa ne egbe wọre i rre uwu iran, okpa ne ọ vbe rrua owẹ irrọọ. Iran i mumu, iran i vbiẹ, ukugba iran i vbe kuọghọ, irri ibata okpa i vbe fian.

²⁸ Ifẹnmwẹ iran mu, uhanbọ iran vbe mu egbe ne ọ gha ya fi ifẹnmwẹ. Ibata ẹsin iran wegbe vba ematọn, owẹ ikẹkẹ okuo iran keghi vbe fi lẹga zẹ vbe ẹhoho ẹziza.

²⁹ Avbe ivbiyokuo ni rrọọ tulo vbe avbe oduma ni gbe aranmwẹ nẹ, te iran ghi vbe dadae rrie ehe ne ọmwarhọkpa i na sẹtin miẹn iran ẹre.

³⁰ Ọ gha sẹ ẹdẹ nẹdẹrriọ, iran gha da van yan Izrẹl zẹ vbe uvanmwẹ okun. Wa ghe ọna ighe ẹvbo! Ebiebi kevbe akhiẹ. Ebiebi gbe uwanmwẹ ne ọ rrọọ re.