Aizaia 47 - Edo Bible (E Baibol Ẹdo) Version 1996

A Bu Ohiẹn E Babilọn

¹ E Nọyaẹnmwa khare wẹẹ, “E Babilọn, tuorre vbe ẹkete ruẹ ne u do tota ye ebubẹ vbe otọ. Vbe ẹghẹ ọkpa, te u te yevbe ovbialeke, ẹvbo ne a ma khọn miẹn ẹre otọ sokpan, u i ghi re ne vbukhẹ kevbe ne sọguọsọguọ ọvbehe, ọviẹn ọ re u ghi khin na.

² Werriẹ olọ nii, wiẹn ọka nii! Ban ugbaleto ruẹ fua. Bannọ avbe ukpọn ruẹn ne mose mose kua kie ẹwu ruẹ ghe odukhunmwu, ne u ya fian ẹzẹ rra.

³ Emwa gha miẹn uẹn eban iran gha miẹn vbe a si ọ kẹ otọ iran gha miẹn vbe a fa ruẹ ua. I gha rria ikhi, ọmwa ne ọ gha da mwẹ obọ yi i rrọ.”

⁴ Osanobua nọhuanrẹn ọghe Izrẹl fannọ ima kua! Eni ẹnrẹn ọrọre e Nọyaẹnmwa ne Oghodua.

⁵ E Nọyaẹnmwa tama e Babilọn wẹẹ, “Tota ne u hunwan hii vbe uwu ebiebi a i ghi dọlegbe tie ruẹ oloi avbe uhunmwu ẹvbo!

⁶ Te ohu emwa mwẹ te gha mu mwẹ, I keghi ru iran vbene a miẹn wẹ iran i ghi re emwa mwẹ ọvbehe. I keghi suaa iran fi obọ ruẹ, wẹ ma vbe tohan iran. U keghi ya obọ ne ọ wegbe mu avbe ọmaẹn.

⁷ Te u te gha ro ighẹ oloi ọ re u ra gha khin ẹdẹdẹmwẹdẹ, u ma rhie avbe emwi na ye ekhọe ra ne u roro emwi ne ọ gha ke ẹre ikian.

⁸ “Danmwehọ ẹmwẹ na, wẹ ne ọyẹnmwẹ yẹẹ, wẹ ne ọ ro ighẹ ẹbe fo, ẹkun vbe sẹ uẹ otọ. U khare wẹ u kpọlọ vba Osanobua nẹ kevbe wẹ ọmwa ne ọ ye vbe ruẹ ighi rrọọ, u te ro ighẹ u i ra dẹgbẹ ẹdẹ ra ne ọmọ wu ẹ.

⁹ Sokpan, vbe ifuanro ọkpa kẹkan, vbe ẹdẹ ọkpa kẹkan, emwi eveva na gha sunu. Egbe ne a rhe ya miẹn ighẹ, u silo ẹbọ ga egbe hia ọdafọn kevbe avbe ivbuẹ gha wulo uẹ.

¹⁰ “Te u wa gha ya obọ so udu ye iba ne u zẹ u na gha ro wẹ ọmwa ne ọ bẹghe ruẹ i rrọọ. Ẹwaẹn kevbe irẹnmwi ruẹn keghi ya a bibi odẹ u keghi tama egbe ruẹ wẹẹ, ‘Mẹ ọrọre Osanobua ọmwa ne ọ yevbe mwẹ i rrọọ.’

¹¹ Ọfuan gha de rhuẹ. Ẹbo edunna ruẹn ọkpa ne ọ ra dae yi i rrọọ. Ọ gha rhurhẹ yan ruẹn vbe udomwurri. Ọfuan ne u ma ro u ma kọ.

¹² Gha kun egba kevbe akpalode ruẹ khian erriọ ọ re u kun ẹnrẹn khian ke ẹghẹ ọvbokhan gha dee. U gha ghe a gha miẹn emwi ne iran gha ru ne uẹn; u gha ghe, u gha sẹtin runran avbe eghian ruẹn.

¹³ U i ye mwẹ ẹtin, vbene a bu ruẹ ude sẹ gie iran ni we uki ne uẹn ladian do miẹn ruẹn fan avbe iran ni ghe umian vbe orhọnmwẹ iran ni mwamwa iso ye dọmwadẹ oghae ni vbe tama ruẹn uki uki wẹ ghe emwi ne ọ gha sunu vbe egbe ruẹ.

¹⁴ “Te iran ra gha yevbe iku irunmwu ni bunnọẹn erhẹn ghi giẹn ehia a! Iran i ra kue sẹtin miẹn egbe iran fan erhẹn ni gha yọn ne iran gbe, ẹ i re erhẹn kherhe ne a ghae.

¹⁵ Emwi ne ọ maa ọkpa ne iran ra ru ne uẹn ọ re ọnii khin avbe iweuki nii ne u gha lẹ bu yo vbe ẹdẹ agbọn ruẹn hia. Iran hia gha sẹ uẹ rae, iran ghi khian okhian ọghe iran ọkpa ighi vbe kẹe vbọ ne ọ gha miẹn ruẹn fan.”