Aizaia 46 - Edo Bible (E Baibol Ẹdo) Version 1996

¹ “Ufomwẹ avbe ẹbọ e Babilọn ọ re ọna khin! A te ka gha gho Bẹl kevbe Nebo yi, banbanna nian, te a ghi kun iran yan ekẹtẹkẹtẹ ihẹ Vbe iyeke aranmwẹ ne egbe wọre.

² Avbe amazẹ ne ẹ i sẹtin miẹn egbe iran fan a khọn munọ iran hẹ gha rrie. Ufomwẹ avbe ẹbọ e Babilọn ọ re ọna khin!

³ “Wa danmwehọ mwẹ, wa ne ivbi uniẹn e Jekọb, wa hia ni ghi kẹe vbe emwa mwẹ, te I gha gbearoghe uwa ke ẹghẹ ne a ya biẹlẹ uwa gha dee.

⁴ Mẹ ọrọre Osanobua uwa, I gha gbe aro ghe uwa rhinrin wa te do khian ọmaẹn, ne uwa fu edẹ. Mẹ ọ re ọ yi uwa, I gha gbearoghe uwa I gha rhie iyobọ ne uwa, I ghi fannọ uwa vbe irri.

⁵ “De ọmwa ne uwa gha ya gie mwẹ yi? Erriọ Nọyaẹnmwa khare. Ọmwa ọvbehe ne ọ yevbe imẹ rrọ ra?

⁶ Emwa ghi rhan ẹsiso iran iran ghi viọ igoru ladian, iran ghi ya mwa esiliva vbe esike iran ghi tie ogun ẹrọnmwọ ne ọ do dunmwu ẹbọ ne iran, iran ghi ya uhunmwu rhanmwẹ otọ iran ghi gha ya uhunmwu rhanmwẹ otọ iran ghi gha gho ẹre.

⁷ Iran ghi tọn ẹẹn mu yan izabọ iran, iran ghi ya ẹe kpao iran ghi mu ẹẹn ye ihe ẹre, ọ ghi gha rre evba, ẹ i sẹtin zẹ owẹ hin ehe ne ọ ye rre. Ọmwa gha na erhunmwu ghe ẹre, ẹ i sẹtin wanniẹn, ra ne ọ miẹn rẹn fan vbe obọ emwi dan.

⁸ “Wa ye ọna rre, wa ne emwa orukhọ wa ghi ro iwinna ne imẹ winna ẹn.

⁹ Wa ye emwi ni sunu vbe ẹghẹ ne Ọ kpee fua rre; wa miẹnkue wẹ mẹ ọkpa ọrọre Osanobua vbene a gha na miẹn wẹ ọmwa ọkpa ne ọ yevbe mwẹ ẹ i rrọọ.

¹⁰ Vbe omuhẹn, ọ re I na taa emwi ne ọ gha kiekie ẹre, vbe ẹghẹ ne ọ kpẹe fua, I taa emwi ne ọ gha sunu yotọ nẹ. I khare wẹ, emwi ne I mwamwaẹn ne I ru, te ọ gba te I ru emwi hia ni rrọ mwẹ ekhọe ne I ru.

¹¹ Mẹ tie okpia ọkpa ne ọ ke odẹ ahọ gha dee, ọ gha vin rrie otọ zẹ vbe ahua ọ ghi do ru emwi ne I mwamwa yotọ. I guan nẹ, te a ra ruẹe.

¹² “Wa danmwehọ mwẹ, wa ni ze vbe ẹkoko udu ni ro wẹ akhọnmiotọ wa rrei ẹsẹse.

¹³ Mẹ si ẹdẹ akhọnmiotọ sikẹ otọ nẹ ẹ i ghi ra kpẹe hiehiere. Emwi i ra da akhọnmiotọ mwẹ obọ yi I gha miẹn Jerusalẹm fan, I ghi vbe rhie ọghọ gie ivbi Izrẹl vbe evba.”