Aizaia 45 - Edo Bible (E Baibol Ẹdo) Version 1996

E Nọyaẹnmwa Zẹ Sairọs

¹ E Nọyaẹnmwa zẹẹ Sairọs nẹ ne ọ rriọba. Ọ vbe zẹẹ ọe nẹ ne ọ gha khọn avbe uhunmwu ẹvbo miotọ; ọ gie ẹẹ ne ọ ya bannọ ẹtin hin obọ avbe ọba rre e Nọyaẹnmwa gha kie urho avbe okpẹvbo ne ẹẹn. E Nọyaẹnmwa tama Sairọs wẹẹ,

² “Mẹ tobọmwẹ ọ re ọ ra zẹẹ odẹ ne uẹn I ghi gha guọghọ avbe oke nekhua sotọ deba avbe oke negiẹrẹ I gha guọghọ avbe ẹkhu ẹrọnmwọ sotọ I ghi rẹnkhẹn avbe ogba ematọn ni rrọọ.

³ I gha viọ emwi ighobioye guẹ kevbe avbe ẹkhokho ni so ebiebi rre, ẹghẹ nii ọ re u gha na rẹn wẹ mẹ ọrọre Nọyaẹnmwa. Kevbe wẹ Osanobua ọghe Izrẹl ọ re ọ so eni ruẹn ya tie ruẹ.

⁴ Te imẹ zẹ uwẹ ne u yi Izrẹl ne ọguọmwadia mwẹ obọ avbe emwa ne imẹ hannọ zẹ I ya ọghọ nọkhua ne uẹn nẹ, a gha rhe miẹn wẹ u ma rẹn mwẹ.

⁵ “Mẹ ọrọre Nọyaẹnmwa, osa ọvbehe irrọọ. I gha rhie ẹtin ne ọ khẹ kuẹ nuẹn, a gha rhe miẹn wẹ, u ma rẹn mwẹ.

⁶ Te I ru ọna ne emwa hia ke okhiẹ agbọn na ya sẹ obọ nọkpa sẹtin rẹn wẹ mẹ ọrọre Nọyaẹnmwa kevbe wẹ osa ọvbehe i rrọọ.

⁷ Mẹ ọ re ọ yi uwanmwẹ kevbe ebiebi mẹ ọ re ọ gie afiangbe kevbe ọfuan rre, mẹ ne Nọyaẹnmwa ọ re ọ ru avbe emwi na hia.

⁸ I gha gie akhọnmiotọ ke iso gha dee zẹ vbe amẹ ne ọ rhọ. Otọ ghi vbe rhan yotọ ne ọ miẹn ẹnrẹn, ọ ghi vbe họn ebe ladian zẹ vbene ọ yan egbe ẹre kevbe odẹ ẹmwata. Mẹ ne Nọyaẹnmwa gha gie ọna sunu.”

E Nọyaẹnmwa Ọghe Uyimwẹ Kevbe Okha

⁹ Akhe obuẹ vbe gu ọmwa ne ọ ma ẹẹn gban ukpe ra akhe ne ọ yevbe nekpa hia? Obuẹ vbe nọ ọmakhe ra wẹ de emwi ne ọ ru yi? Akhe vbe sẹtin gui ra wẹ ọmwa ne ọ ma ẹẹn ma guẹ ona?

¹⁰ Ohan vbe gie ọmwaikọmwa tama evbibiọe ra wẹẹ, “Vbe u a na ru mwẹ vbenian hẹ yi?”

¹¹ E Nọyaẹnmwa ne Osanobua nọhuanrẹn ọghe Izrẹl ọmwa ne ọ kha vbene ẹdẹ nakhuẹ ra gha ye hẹ khare wẹẹ, “U i mwẹ asẹ ne a ya nọ mwẹ ọta vbekpa ivbi mwẹ, ra ne u gha tama mwẹ emwi ne ọ te kei ne I ru.

¹² Mẹ ọrọre ọmwa ne ọ yii otọe agbọn I keghi vbe yi emwa nagbọn ne iran gha rre evba. Ẹtin mwẹ ọ re I ya rhaan iso ladian; mẹ ọ re ọ dia owẹn, kevbe uki kevbe avbe orhọnmwẹ.

¹³ Mẹ ọ re ọ tobọmwẹ kpikpi e Sairọs ne ọ ru emwi ne ọ ru vbene I mwamwaẹn, ne ọ dọlọ emwi hia yi, I gha dia odẹ ne ọ ra la hia, ọ gha dọlọ Jerusalẹm ne okpẹvbo mwẹ bọ ọ ghi fannọ emwa mwẹ ne a viọ ẹre oghunmwu kua. Ọmwa ne ọ vbu ẹe ya winna iwinna na i rrọ, ra ne ọ rhie igho odieke ne ẹẹn. E Nọyaẹnmwa ne Oghodua guan nẹ.”

¹⁴ E Nọyaẹnmwa kha ma Izrẹl wẹẹ, “Ẹfe Igipt kevbe Sudan gha khian ọwuẹ emwa ni taẹn ni rre Siẹba gha khian eviẹn ruẹn; iran gha lele uẹ vbe a ye eghan gbalọ iran, iran gha ghughẹrre nuẹn iran ghi miẹnkue wẹẹ, ‘Osanobua deba ruẹ rẹn ọkpa kẹkan ọrọre Osanobua.

¹⁵ Osanobua Izrẹl ne ọ miẹn emwa rẹn fan, Osanobua ne ọ rhiegbe lẹre nọ.

¹⁶ Te ekhue ra gha mu iran ni ma amazẹ hia a gha fa iran hia a.

¹⁷ Sokpan, e Nọyaẹnmwa miẹn Izrẹl fan etẹbitẹ ọ re akhọnmiotọ ẹre khin a i ra fa emwa rẹn uan ẹdẹdẹmwẹdẹ.’ ”

¹⁸ E Nọyaẹnmwa ọ re ọ yii iso, rẹn ọrọre ọmwa ne ọ re Osanobua! Rẹn ọ re ọ dọnmwẹ agbọn, ọ na yii ẹe ọ ru ẹe gbain kevbe ne ọ vbe tọ, ọ ma yi ẹre ne ọ dihoi rua ne ọ rhiaẹe. Sokpan ehe ne emwa gha yin. Rẹn ọrọre ọmwa ne ọ khare wẹẹ, “Mẹ ọrọre Nọyaẹnmwa, osa ọvbehe i ghi vbe rrọọ.

¹⁹ I ma ta ẹmwẹ rhọkpa vbe ẹkhokho ra ne I rhie emwi ne I ra ru lẹre I ma kha wẹ ne ivbi Izrẹl, ya gha gualọ mwẹ vbe ehe ne ọ dihoi rua. Mẹ ọrọre Nọyaẹnmwa, ẹmwata ọ re I vbe ta; I ghi vbe gie emwa rẹn emwi ne ọ re ẹmwata.”

E Nọyaẹnmwa Ọghe Agbọn Na, Kevbe Avbe Amazẹ E Babilọn

²⁰ E Nọyaẹnmwa khare wẹẹ, “Wa do si egbe koko, wa ne emwa ni rre uhunmwu ẹvbo, wa hia ni miẹn uhunmwu vbe arriọba nọkhua ni de. Wa ladian ne a do gui ẹzọ uwa. Iran ni gha mu amazẹ erhan, hẹ yo hẹ rre iran na gha na erhunmwu ghe ẹbọ ne ẹ i ra sẹtin miẹn iran fan, emwa nii ma zẹdẹ rẹn emwi rhọkpa hiehiere.

²¹ Wa larre, wa do ta ne unu uwa vbe iko, wa tama iran ne a gu ẹzọ ne iran mu iro vba egbe. Gha ọ ta emwi ne ọ gha he kue sunu yotọ ke ẹkpo nii gha dee? Ẹre mẹ ne Nọyaẹnmwa nọ, mẹ ne Osanobua ne ọ miẹn emwa rẹn fan? Osa ọvbehe i rrọọ.

²² “Wa bu mwẹ gha dee nian ne uwa miẹn ehe na fe wa ne emwa hia ni rre agbọn! Mẹ ọkpa ọrọre Osanobua ne ọ rrọọ.

²³ Ẹmwata ọ re eyan ne I yanrẹn khin ai vbe fi ẹe werriẹ. Emwi ne I khin hia fẹẹrẹ ọ re I ya yan: Emwa hia gha rre do diguẹ vbe odaro mwẹ iran ghi yan wẹ iran gha rhie egbe mu mwẹ.

²⁴ “Iran gha kha wẹẹ, obọ mwẹ ọkpa ọ re a na miẹn akhọnmiotọ kevbe ẹtin sokpan, emwa hia ni khuiwu mwẹ, efa gha rruan iran.

²⁵ Mẹ ne Nọyaẹnmwa, gha fannọ ivbi uniẹn e Jekọb werriegbe iran gha vbe rhie urhomwẹ mẹ.