Aizaia 44 - Edo Bible (E Baibol Ẹdo) Version 1996

E Nọyaẹnmwa Ọkpa Ọrọre Osanobua

¹ E Nọyaẹnmwa khare wẹẹ, “Danmwehọ nian, Izrẹl ne ọguọmwadia mwẹ emwa mwẹ ne I hannọ zẹ ivbi uniẹn Jekọb.

² Mẹ ọrọre Nọyaẹnmwa ne ọ yii uwa, ke ne a ya biẹlẹ uwa gha dee, te I gha yi uwa obọ wa ghẹ fian afianma, eguọmwadia mwẹ ọ re uwa khin emwa mwẹ ne I hannọọn zẹ ne I ho ẹmwẹ ọnrẹn.

³ “I gha sa amẹ ne ọmwa ne ovbamẹ gbe, I ghi vbe wẹ ne ẹzẹ gha lẹ, vbe otọe ne ọ kae I gha hihiẹ ẹtin yan avbe ivbi uẹ kevbe afiangbe mwẹ yan ivbi uniẹn ruẹn.

⁴ Iran gha maa zẹ vbe irunmwu ne a gbe amẹ khakha, zẹ vbe iyikhoẹzẹ ne ọkpẹn ẹzẹ ne ọ lẹ.

⁵ “Ọkpọkpa ọ re emwa ra ya gha kha wẹẹ, ‘ọghe Nọyaẹnmwa ọ re imẹ khin.’ Iran gha do ya egbe ba ivbi Izrẹl. Dọmwadẹ ọghọe gha yi ama e Nọyaẹnmwa ye obọ ẹre, ọ ghi vbe tie egbe ẹre okpa vbe uwu emwa Osanobua.”

⁶ E Nọyaẹnmwa ne ọ khaemwisẹ yan, kevbe ne ọ vbe degue Izrẹl, e Nọyaẹnmwa ne Oghodua khare wẹẹ, “Mẹ ọrọre okaro, okiekie, ne irẹn ọkpa re Osanobua; osa ọvbehe i rrọ gberra imẹ.

⁷ Ọmwa ọvbehe ne ọ gha te sẹtin ru emwi ne imẹ ru rrọọ ra? De ọmwa ne ọ gha te sẹtin tae yotọ yi ighẹ avbe emwi ni gha sunu ke omuhẹn emwi hia gha dee do sẹ ufomwẹ ọnrẹn?

⁸ Wa ghẹ fian afianma wa ne emwa mwẹ wa rẹn wẹ ke ẹkpo nẹdẹ gha dee do sẹ ebanbanna, I ta avbe emwi ni gha sunu yotọ nẹ, wa ọ re ọ vbe re osẹe mwẹ osa ọvbehe vbe rrọ ra? Osa ọvbehe ne ọ mwẹ ẹtin vberrọ ra! Ne imẹ ma he họn ẹmwẹ ọnrẹn?”

A Ya Ẹbọ Ne A Gho Gbogiẹ

⁹ Iran hia ni mannọ amazẹ, emwa oya iran khin avbe ẹbọ ne iran ghe gẹdẹgbẹ i zẹdẹ mwẹ esa, iran ni gho avbe ẹbọ na, emwa ni rhu aro, ni ma rẹn ne a ye, ọ re iran khin, a gha fa iran hia a.

¹⁰ Ere ọkpa irrọ ne ọmwa ye ematọn ru amazẹ ne ọ gha gho ẹre zẹ vbe ẹbọ!

¹¹ Emwa hia ni gho ẹre a gha ru iran emwi oya, avbe emwa ni ru amazẹ, emwa nagbọn kẹkan ọ re iran khin, iran ma vbe gberra vberriọ. We ne iran gha dee ne iran do mudia ye erhan ẹzọ, iran gha runran, ekhue ghi vbe mu iran.

¹² Avbe ogun ematọn ghi rhie ematọn, ọ ghi mu ẹẹn ye erhẹn gha winna yan. Obọ ẹre ne ọ wegbe ghi gha fi umọmọ ne ọ miẹn ehe na dunmwu ematọn ye ama vbene ọ gha na gha mwẹ ona. Vbe ẹghẹ ne ọ ya ru ẹe nii, ovbamẹ ghi gbẹe, ohanmwẹ amẹ ghi gbẹe, egbe ghi wọ ẹre.

¹³ Owinna gha mwa erhan, ọ ghi ya orhue vin ama yọ, ọ ghi ya emwi iwinna rẹn ka ẹre, ọ ghi ru ẹe ya ta ọmwa, ama ọmwa nagbọn ne ọ mose, ne ọ mu ye uwowa ẹre.

¹⁴ Ọ sẹtin tọn isida gbotọ ne ọ ya ru ẹẹ, ọ sẹtin zẹ okan ra uvbiakhẹ vbe otọ ẹgbo, ra ọ sẹtin kọ igẹdu, ọ ghi diakhẹ ọ re ne amẹ rhọ ne ọ zọ ladian.

¹⁵ Ọmwa ghi rhie vbe erhan ya koko erhẹn, ọ ghi vbe rhie vbọ ya ka amazẹ, ọ ghi rhie vbọ ya hie erhẹn ne ọ ghae ra ne ọ ya le ebrẹd, ọ ghi ya obọ nọkpa ka amazẹ ne ọ gha gho.

¹⁶ Erhan nii ọ re ọ na rhie ya hie erhẹn ne ọ ya tọn emiowo re, ẹko ghi vbe vuọn ẹẹn. Ọ ghi ghae vbọ ọ ghi kha wẹẹ, “U miẹn vbe ọ ma hẹ, u miẹn vbene ọ yọn hẹ. Erhẹn esiesi wa nọ!”

¹⁷ Ne ọ ghi kẹe vbe erhan nii, ọ ghi ya ẹe ka amazẹ, ọ ghi vbe vbẹrre ye uhunmwu rhanmwẹ otọ ne ẹẹn. Ọ ghi vbe na erhunmwu ghe ẹre wẹẹ, “Wẹ ọrọre Osanobua mwẹ, miẹn mwẹ fan.”

¹⁸ Emwa vberriọ akpa ni i sẹtin rẹn emwi ne iran ru ọ re iran khin. Iran yin ehọ iran yin ẹwaẹn, iran ma ghi sẹtin rẹn emwi ne ọ re ẹmwata.

¹⁹ Iran ni ru amazẹ i vbe mwẹ ẹwaẹn ra irẹnmwi ne iran gha ya kha wẹẹ, “I giẹẹn eso ua nẹ vbe erhan na, I vbe ya erhẹn ọnrẹn eso le ebrẹd, I vbe tọn emiowo, I na rrii ọe. Ne ọ ghi dekẹe vbe nene erhan, I keghi yae kaa amazẹ. U ghe mwẹ vbe I ya uhunmwu rhanmwẹ otọ ne ike erhan!”

²⁰ Ẹwaẹn ne ọ rre emwa ma vbe kpọlọsẹ ọghe ọmwa ne ọ rri emuẹn. Emwi akpa ne ọ rre ọre uhunmwu bibi ẹre odẹ sẹ vberriọ nẹ wẹ ẹ i ghi gia yọre obọ. Ẹ i sẹtin tae ma egbe ẹre wẹ amazẹ ne irẹn mu mwẹ obọ ighe ẹ i re Osanobua hiehiere.

E Nọyaẹnmwa Ayi Kevbe Ọmiọnmwafan

²¹ E Nọyaẹnmwa khare wẹẹ, “Izrẹl, ye ẹmwẹ na rre, yerre i ghẹ ọguọmwadia mwẹ ọ re u khin. Te imẹ yii uwẹ ne u gha re ọguọmwadia mwẹ, mẹ i ra mianmian uwẹ ẹdẹ.

²² I kpolo orukhọ ruẹ gha rrie zẹ vbe okuku amẹ. Werriegbe bu mwẹ gha dee, mẹ ọrọre ọmwa ne ọ miẹn ruẹn fan.”

²³ Wa we uwemwẹ oghọghọ, wa ne ẹrinmwi wa gha wee, wa ne ehe ne ọ dinmwi vbe otọ agbọn. Wa gha we uwemwẹ oghọghọ wa ne avbe oke nekhua kevbe avbe erhan ni rre ẹgbo hia! E Nọyaẹnmwa rhie ukpọlọmwẹ ọnrẹn maa nẹ vbekpa ne ọ na miẹn Izrẹl ne emwa rẹn fan.

²⁴ “Mẹ ọrọre Nọyaẹnmwa ne ọ ọmiọnmwafan ruẹn, mẹ ọ re ọ yii uwẹ. Mẹ ọrọre Nọyaẹnmwa ne ọ yii emwi hia. Mẹ ọkpa ọ re ọ tan iso zẹ vbe ukpọn ẹghẹ ne I na yii agbọn, ọmwa ne ọ ru iyobọ mẹ i rrọọ.

²⁵ Mẹ ye avbe iran ni fi iha ne emwa, gbogiẹ I ghi vbe ya emwi ne avbe iweuki ta yotọ khian ne ọ ma de yọ. Mẹ khare ighẹ ohoghe ẹmwẹ ne avbe umẹwaẹn ta khin. I ghi rhie ma ighẹ ukọnmwẹ ọ re ẹwaẹn iran khin.

²⁶ Sokpan avbe eguọmwadia mwẹ ta emwi ne ọ gha he sunu yotọ Mẹ gha gie ọmwa uhunmwu ne ọ ya rhie emwamwa mwẹ maa, I ghi ru ẹe ne avbe emwamwa nii kevbe ẹmwẹ ne a ta yotọ nii gele gha sunu. I tama Jerusalẹm wẹ emwa gha dọlegbe gha rre evba, kevbe avbe okpẹvbo ni rre Juda ighe a gha dọlegbe bọ iran. Avbe ẹvbo nii gha kpaegbe hin itowa ree.

²⁷ I ya ukpẹmwẹ ọkpa ne I tae sii okun ka.

²⁸ I tama Sairọs wẹẹ, ‘Wẹ ọrọre ọmwa ne ọ gha ya gha khaemwisẹ mẹ; u gha ru vbene I ho ne u ru: U gha tae wẹ ne a dọlọ bọ Jerusalẹm kevbe wẹ ne a gbe ẹyotọ ọgua Osa.’ ”