Aizaia 43 - Edo Bible (E Baibol Ẹdo) Version 1996

Osanobua Wẹ Rẹn Gha Miẹn Emwa Irẹn Fan

¹ Izrẹl, Osanobua ne ọ yi uwe khare wẹẹ, “Ghẹ mu ohan, I gha miẹn ruẹn fan. Mẹ ọ re ọ he uwẹ eni, ọghomwẹ ọre u khin.

² U gha la uwu ẹzẹ ne ọ dinmwi khian, I gha mudia kuẹ ọlọghọmwa ruẹn I ra gbuẹ uhunmwu, u gha la uwu erhẹn khian, u i ra giẹn, ibaro nọ khua ne u miẹn, ẹ i ra kuan ruẹn.

³ Rhunmwuda mẹ ọrọre Nọyaẹnmwa ne Osanobua ruẹ, Osanobua nọhuanrẹn ọghe Izrẹl, ọmwa ne ọ miẹn ruẹn fan; I gha sẹ Igipt rae ne I miẹn ruẹn fan. I gha sẹ e Sudan kevbe Siẹba rae.

⁴ I gha sẹ avbe uhunmwu ẹvbo rae ne iran miẹn ruẹn fan, rhunmwuda ighobioye ọ re u khin mwẹ re kevbe wẹ rhunmwuda ighẹ I ho ẹmwẹ ruẹn, I vbe rhie ọghọ nuẹn.

⁵ Ghẹ fian afianma, I rrọọ yaba ruẹ! “Ke odẹ orrie ne ọ rrei sẹẹ ehia, I gha viọ emwa ruẹn gha die owa.

⁶ I gha tama odẹ okuọ ne ọ gie iran gha rrie kevbe odẹ ekẹn wẹ ne ọ ghẹ da iran yi. Wa gie emwa ke otọe urria gha dee kevbe ehe hia vbe otọ agbọn gha dee.

⁷ Emwa mwẹ ọ re iran khin. Te I yii iran ne iran gha re ọghomwẹ.”

Izrẹl Ọrọre Osẹe E Nọyaẹnmwa

⁸ Osanobua khare wẹẹ, “Wa tie avbe emwa mwẹ ye iko. Iran mwẹ aro sokpan te iran rhu aro, iran mwẹ ehọ sokpan, iran i họn ẹmwẹ!

⁹ Wa tie avbe uhunmwu ẹvbo hia ne iran gha die ehe ne a na gui ẹzọ na. De ọkpa ne ọ gha sẹtin ta emwi ne ọ gha sunu ẹdẹ nakhuẹ vbe uwu emwi ne iran gho? De ne ọ ta avbe emwi ni sunu na yotọ vbe uwu iran? Wa gie avbe ẹbọ na viọ osẹe iran rre ne iran do tae rhuan wẹ ẹmwata nọ, ne iran sosẹe wẹ ẹmwata ẹmwẹ iran khin.

¹⁰ “Wa ne ivbi Izrẹl, wa ọrọre osẹe mwẹ; mẹ ọ re ọ zẹẹ uwa, ne uwa gha re eguọmwadia mwẹ ne uwa miẹn ehe na rẹn mwẹ, ne uwa vbe ya mwẹ yi, ne iran vbe rẹn wẹ mẹ ọkpa ọrọre Osanobua. Emwi ne a gho ọvbehe i rrọ gberra mwẹ ẹ i ka rrọ de yi, ẹ i khian vbe gha rrọọ.

¹¹ “Mẹ ọkpa kẹkan ọrọre Nọyaẹnmwa, ọmwa ọkpa kẹkan ne ọ gha sẹtin miẹn ruẹn fan.

¹² I ta emwi ne ọ gha he sunu yotọ, I na gha dee do yi uwa obọ. Ẹbọ ne a gho ọghe avbe orhunmwuyẹn, ọkpa i he rrọọ ne ọ he ru ọna wa ọrọre osẹe mwẹ.

¹³ Mẹ ọrọre Osanobua, ọnii ọ re I ra gha khin ẹdẹ. Ọmwa ne ọ gha sẹtin fie emwi ne imẹ ru nẹ werriẹ i rrọọ.”

A Lẹẹ Fua Hin E Babilọn Rre

¹⁴ Osanobua nọhuanrẹn ọghe Izrẹl, e Nọyaẹnmwa ne ọ miẹn uwa fan khare wẹẹ, “Ne I miẹn ehe na miẹn uwa fan, I gha gie ivbiyokuo ne iran ya gu e Babilọn khọn; I gha guọghọ ẹkhu onurho ne ọ rrọọ sẹ otọ uwemwẹ ne emwa ni rrọọ te wee, gha khian eve.

¹⁵ Mẹ ọrọre Nọyaẹnmwa Osanobua ruẹ nọhuanrẹn mẹ ọ re ọ yi uwe Izrẹl mẹ ọ re ọ vbe re ọba ruẹ.”

¹⁶ Ẹghẹ ne ọ kpee fua, e Nọyaẹnmwa keghi zẹẹ odẹ fian okun rraa ovbi odẹ la uwu amẹ ne ọ khọn yo Khọn rre.

¹⁷ Ọ viọ iyokuo ọrhẹnrhẹn la uwu ọfuan ivbiyokuo ikẹkẹ ematọn kevbe ẹsin. Iran dele gbotọ iran i ghi kpaegbe ẹdẹ, a ya ẹhoho dọ ẹre yọ vbene a dọ urhukpa yọ.

¹⁸ Sokpan, e Nọyaẹnmwa khare wẹẹ, “Wa ghẹ mu emwi ne ọ sunu gberra nẹ gba mu ukpẹ, ra ne uwa sikan mu emwi ne ọ sunu ne ẹkpoimwarria gha dee.

¹⁹ Wa rhie aro yotọ gha khẹ emwi ọgbọn ne I khian ru, ọ wa sunu nẹ wa gha sẹtin bẹghe ẹre nian! I gha zẹ odẹ la adesẹ ẹgbo, I ghi vbe viọ ẹzẹ ne ọ lẹ ne uwa vbe evba.

²⁰ Ya sẹ egbe avbe aranmwẹ oha, iran gha rhie ọghọ mẹ, kevbe ekuaghagha kevbe avbe ugomugo, ehia gha rho mwẹ vbe uyi vbe I gha gie amẹ gha lẹ vbe ato, ne ọ rhie amẹ ne emwa mwẹ ne I hannọ zẹ.

²¹ Avbe emwa ni yii ne egbe mwẹ iran khin iran gha vbe so ihuan urhomwẹ mwẹ.”

Orukhọ Izrẹl

²² E Nọyaẹnmwa khare wẹẹ, “Sokpan, te ẹmwẹ mwẹ khan uwa, Izrẹl, wa ma ghi ga mwẹ.

²³ Wa ma viọ ese ohuan ne a giẹn uan ọghe uwa gunmwẹ, wa ma ye ese uwa ye ọghọ mẹ. I ma nọ ese ne azọ, ya mu ẹsọn ne uwa gha miẹn ra ne I ya ẹmwẹ eturari ne I nọ, wọ uwa egbe.

²⁴ Wa ma dẹ eturari mẹ, a ma ghi wẹ wa gha ya ẹvbi aranmwẹ vuọn mwẹ ẹko, sokpan, wa keghi ya ẹmwẹ orukhọ uwa mu ihẹ mẹ. Wa ya ẹmwẹ abakuru uwa wọọ mwẹ egbe. Wa keghi ya ẹmwẹ orukhọ ne uwa ru wiẹn mwẹ uan.

²⁵ Vberriọ, mẹ ọrọre Osanobua ne ọ ye orukhọ uwa bọ uwa. Te I ru ọna rhunmwuda egbe ọmwa ne imẹ khin. Mẹ i ra ka orukhọ uwa ye uwa urhu.

²⁶ “Wa gie ima gha rrie iko ẹzọ, wa viọ ẹzọ ne uwa mwẹ ne uwa ra gui rre. Wa do ta ne unu uwa, ne uwa rhie ma ighẹ wa ma rria abe.

²⁷ Avbe erha uwa nikaro ru orukhọ, iran ni khaemwisẹ yan uwa rukhọ ghe mwẹ,

²⁸ avbe nikhaemwisẹ uwa ru owa mwẹ awua. Rhunmwuda ọnii, I keghi sii ọfuan ye Izrẹl egbe I keghi kue ne a yagha emwa wẹ.”