Aizaia 42 - Edo Bible (E Baibol Ẹdo) Version 1996

Ọguọmwadia E Nọyaẹnmwa

¹ E Nọyaẹnmwa khare wẹẹ, “Ọnọna ọrọre ọguọmwadia mwẹ ne I rhie ẹtin ye ọre iwu, ọmwa ne imẹ zẹe, ne ẹko mwẹ vbe rhiẹnrhiẹn ghe. Mẹ ya orhiọn mwẹ vuọn irẹn nẹ, ọ gha rhie ohiẹn ẹmwata la dọmwadẹ uhunmwu ẹvbo.

² Rẹn i ra go ra ne ọ tọn urhu mu ra ne ọ gha vannọ guan vbe adesẹ ore.

³ Rẹn i ra bun ovbi erhan ne ọ bi gọọ ra ne ọ dọ ukpa ne ọ gbe muẹinmuẹin yọ. Ọ gha rhie ibuohiẹn ẹmwata sẹ obọ agbọn hia.

⁴ Egbe i ra wọ ẹre ra ne ẹtin fo ẹe ọ gha gbọ ẹmwata ye otọ agbọn. Avbe ẹvbo ni rre urria rhie aro ye odẹ gha khẹ iruẹemwi ẹnrẹn.”

⁵ Osanobua ọ re ọ yi iso, ọ keghi niẹn ẹnrẹn uan. Rẹn ọ re ọ yi agbọn kevbe emwi hia ni rre uwu ẹre; rẹn ọ re ọ rhie arrọọ kevbe uhiọnrọnmwẹ ne emwa ẹnrẹn hia. Banbanna nian, e Nọyaẹnmwa Osanobua tama ọguọmwadia ẹre wẹẹ,

⁶ “Mẹ ne Nọyaẹnmwa ọ re ọ tie ruẹ, I na rhie ẹtin ne uẹn ne u miẹn wẹ a yinrin vbene ọ kere vbe otọ agbọn. Obọ ruẹ ọ re I ra la gu emwa hia ta ile obọ ruẹ ọ re I ra la rhie uwanmwẹ gie uhunmwu ẹvbo hia.

⁷ U gha rhan aro avbe arhuaro, u ghi fannọ iran ni tota ye ẹwẹdọ ne ọ so ebiebi kua.

⁸ “Mẹ ọkpa kẹkan ọrọre Nọyaẹnmwa, Osanobua ruẹ. Emwi ne a gho ọvbehe ne ọ gha gunmwẹ ghae vbe uyi mwẹ, ẹ i rrọ, mẹ i ra kue ne amazẹ gunmwẹ ghae vbe uyi mwẹ.

⁹ Emwi ne I ta yotọ ọ re ọ do sunu na banbanna nian, I gha vbe ta ọvbehe ọghọgbọn ma ruẹn vbe iran te do gha sunu.”

Ihuan Urhomwẹ

¹⁰ Wa so ihuan ọgbọn ghe Nọyaẹnmwa wa so ihuan urhomwẹ ọnrẹn, wa ne otọ agbọn hia. Wa rho ẹre, wa ni gua khian vbe okun wa rho ẹre, wa ne emwi ni rre amẹ, wa so ihuan, wa ne otọe urria kevbe emwa ni rrọọ hia.

¹¹ Wa gie oha kevbe avbe okpẹvbo ni rrọọ rho Osanobua; wa gie emwa Keda rho ẹre! Wa gie iran ni rre ẹvbo e Sẹla kevbe avbe uhunmwu oke go ugomwẹ oghọghọ!

¹² Wa gie iran ni rre otọe urria rhie urhomwẹ kevbe uyi ne Nọyaẹnmwa.

¹³ E Nọyaẹnmwa ladian ne ọ ya gbinna zẹ vbe ovbiyokuo ọ mu egbe nẹ, te ọ ghi khẹ nene okuo, ọ tu utumwẹ okuo, ugomwẹ igbinna ọ rhie ẹtin ẹnrẹn ma vbe egbe avbe eghian rẹn.

Osanobua Wẹ Rẹn Gha Yi Emwa Irẹn Obọ

¹⁴ Osanobua khare wẹẹ, “Ọ kpẹre ne I ghi hunwan, I ma zẹ ye emwa mwẹ ẹre. Eban nian, ọ sẹe ne I gha ya guan yọ ọ I datu zẹ vbe okhuo ne emwi ubiẹmwẹ ru.

¹⁵ I gha dunmwu oke negiẹrẹ kevbe nekhua I gha kaka irunmwu kevbe avbe erhan hia a I gha ya iya avbe ẹzẹ khian ato, I ghi si avbe odighi amẹ ka.

¹⁶ “I gha viọ avbe emwa mwẹ ni rhu aro la odẹ ne iran ma he la ẹdẹ. I ghi ya ebiebi iran khian uwanmwẹ I ghi ya ẹvbo ne kpannọkpannọ khian ne kpẹghẹ ne iran. E yan ne I yanrẹn ọ re ena khin. Emwi okpa ne ọ gha wẹ ne I ghẹ mu ẹẹn sẹ i rrọ.

¹⁷ Iran hia ni mu ẹtin yan avbe amazẹ ni tie avbe amazẹ emwi ne iran gho ekhue gha mu iran, a gha fa iran an.”

Izrẹl Ma Sẹtin Ruẹ Emwi

¹⁸ E Nọyaẹnmwa khare wẹẹ, “Wa danmwehọ wa ne ayin ehọ! Wa ziẹn aro yọ, wa ne arhuaro!

¹⁹ Wa he miẹn ọmwa ne ọ he rhu aro sẹẹ ọguọmwadia mwẹ ra? Ne ọ vbe yin ehọ sẹẹ ọguọmwadia ne I gie ẹre uhunmwu?

²⁰ Izrẹl, aro ruẹ miẹn buan sokpan de emwi ne u ghi miẹn ruẹ vbọ? U mwẹ ehọ ne a ya họn ẹmwẹ, sokpan de emwi ne u he gele họn?”

²¹ E Nọyaẹnmwa Osanobua ne ọ ho ne ọ gha miẹn ruẹn fan ọre nọ rhunmwuda ọnii ọ re ọ na mu uhi kevbe iruẹemwi ẹnrẹn gbọọ. Ọ keghi vbe ho ne emwa irẹn gha mu iran sẹ.

²² Sokpan, banbanna nian, iran hẹ rhu emwa rẹn; a viọ ehia khui ye uvun uwu otọ a keghi vbe viọ iran lẹre ye uwu ẹwẹdọ a do iran emwi hẹ, a hẹ rhu iran vbene ai na miẹn ne ọ gha miẹn iran fan.

²³ A gha miẹn ne ọ gha ghi danmwehọ ọna vbe uwu uwa ra? Wa gha gbe ehọ kotọ danmwehọ ke ẹghẹ na kpao ra.

²⁴ Gha ọ zẹẹ Izrẹl obọ ne iran ni fu emwi yi? E Nọyaẹnmwa tobọ ẹre nọ, ọmwa ne ima ru orukhọ ghe! Ma ma yin vbene ọ gie mwa, ra ne a gha ru vbene ọ ma ima ẹre.

²⁵ Rhunmwuda ọnii, ọ keghi gie obọ ohu ẹre vba mwa, ma keghi miẹn obalọ okuo vbe egbe ohu ẹre giẹn la otọ Izrẹl zẹvbe erhẹn sokpan ma ma rẹn emwi ne ọ gha sunu. Ma ma sẹtin miẹn emwi ruẹ vbọ hiehiere.