Aizaia 41 - Edo Bible (E Baibol Ẹdo) Version 1996

Osanobua Rhie Udinmwẹ Ne Izrẹl

¹ Osanobua khare wẹẹ, “Wa gbẹdọ ne uwa danmwehọ mwẹ wa ne otọe urria! Wa ne ẹvbo ni rre urria gban an. Wa mu egbe ne uwa ya rhan otọ egbe uwa vbe iko. A gha rhie otọ ne uwa ya guan wa gia miegbe ne a do ta ene ọ rri ase vbọ.

² “Gha ọ rhie ne ọ khọnmiotọ ke owẹn owiẹ rre yi ne ọ na gie ẹe khọnmiotọ vbe ehe ne ọ rhirhi a la hia? Gha ọ gie ẹe khọn avbe ọba kevbe avbe uhunmwu ẹvbo muotọ? Umozo ẹre bẹlẹ ehia ku otọ vbene a gha kha wẹ ebubẹ ọ re iran khin. Ifẹnmwẹ ọnrẹn zagha iran, zẹ vbe ebe nọkakae vbe odaro ẹhoho.

³ Ọ zẹ iran khu, ọ kegha khian vbe a i mwẹ ẹbe, okhian kẹ ọ re sẹrriọ wẹ ọ yevbe ne ẹ i ya owẹ kan otọ.

⁴ Gha ọ ru ẹe ne ọna na sunu yi? Gha ọ tae yotọ vbene emwi gha sunu hẹ? Mẹ ne Nọyaẹnmwa rre evba vbe omuhẹn. Mẹ ne Nọyaẹnmwa Osanobua gha vbe gha rre evba vbe ufomwẹ.

⁵ “Iran ni rre urria gban an miẹn emwi ne I ru nẹ. Iran runraẹn iran kegha guẹ ne ohan. Rhunmwuda ọnii, iran keghi si egbe koko iran na gha dee.

⁶ Avbe owinna ru iyobọ, iran kegha rhie igiọdu ne egbe.

⁷ Owinna keghi tama ogun igoru wẹẹ, ‘Ọbevbaru!’ Ọmwa ne ọ kaa amazẹ kpẹghẹ, kegha rhie igiọdu ne ọmwa ne ọ ya ise selẹe kugbe. Iran wẹẹ, ‘A saa ẹe ẹse gbe’ iran keghi ya ise kan amazẹ ni mu ihọkpa.

⁸ “Sokpan, wẹ, Izrẹl ne ọguọmwadia mwẹ, wa ọrọre emwa ne I hannọ zẹ, ivbi uniẹn Ebraham ne ẹse mwẹ.

⁹ I viọ uwa ke ehe ne agbọn sẹe gha dee I tie uwa ke okhiẹ ọre ne ọ rrei sẹ rre, I keghi tama uwa wẹẹ, ‘Ọguọmwadia mwẹ ọ re uwa khin.’ I ma he uwa, sokpan, te I zẹ uwa.

¹⁰ Wa ghẹ fian afianma, I gu uwa rrọọ. Mẹ ọrọre Osanobua uwa, wa ghẹ gie emwikemwi mu uwa ohan. I gha ya uwa wegbe, I gha yi uwa obọ I gha degue uwa, I ghi miẹn uwa fan.

¹¹ “Iran ni gu uwa mu ohu gha rẹn emwiekhue a khọn miẹn ọmwa otọ. I ran ni gu uwa gbinna gha wulo.

¹² A gha ho iran bẹkun vbe otọ agbọn.

¹³ Mẹ ọrọre Nọyaẹnmwa, Osanobua ruẹ, I rhie iwegbe ne uwa, I keghi tama uwa wẹẹ, ‘Wa ghẹ mu ohan, I gha yi uwa obọ.’ ”

¹⁴ E Nọyaẹnmwa ke kha wẹẹ, “A gha rhe miẹn wẹ wa kanmwa, wa ma vbe wegbe Izrẹl, wa ghẹ mu ohan, I gha yi uwa obọ. Mẹ ne Osanobua nọhuanrẹn ọghe Izrẹl mẹ ọrọre ọmwa ne ọ miẹn uwa fan.

¹⁵ I gha ya uwa ru uhanhan ne a ya wiẹn emwi ne a halọ ise ọgbọn ni mu yi, wa gha wiẹn oke nekhua, wa gha rhia iran an. Avbe oke negiẹrẹ wiẹghua khian ebubẹ.

¹⁶ Wa gha fi iran ghe ẹhoho ẹhoho ghi hoho iran gha rrie. Okpẹhoho ghi zagha iran an. Ẹghẹ nii, ẹko uwa gha rhiẹnrhiẹn rhunmwuda ighe mẹ ọrọre Osanobua uwa wa gha rho mwẹ vbe uyi, mẹ ne Osanobua nọhuanrẹn ọghe Izrẹl.

¹⁷ “Ẹghẹ ne avbe emwa mwẹ gha na gualọ amẹ ne iran i mwẹ, ẹghẹ ne ovbamẹ gha na kaka iran ẹho ua, ẹghẹ nii, mẹ ne Nọyaẹnmwa gha họn erhunmwu iran. Mẹ ne Osanobua Izrẹl i ra he iran yotọ.

¹⁸ I gha gie ẹzẹ gha lẹ vbe oke ni dihoi rua ivbi uhunmwu ẹzẹ gha vbe gha lẹ vbe uwu iya I gha ye ato khian avbe odighi amẹ.

¹⁹ I gha gie erhan sida zọ vbe uwu ato, avbe ohia kevbe agba kevbe erhan oliv. Ẹgbo gha wan ladian vbe otọ ne ọ dihoi rua. Ẹgbo ọghe uwọwẹ, ọkhuẹn kevbe ovbiakhẹ.

²⁰ Emwa gha miẹn ọna, iran ghi do rẹn wẹ mẹ ne Nọyaẹnmwa ọ re ọ ru emwi na, ọ ghi do vẹ ne iran rẹn wẹ, Osanobua nọhuanrẹn ọghe Izrẹl ọre ọ ru ẹe.”

Osanobua Si Avbe Ẹbọ Ohoghe Evẹn

²¹ Ẹmwẹ ne Nọyaẹnmwa ne ọba Izrẹl tae ọ re ọna khin: “Wa ne avbe ẹbọ uhunmwu ẹvbo wa gui ẹzọ ọghe uwa. Ẹzọ ne ọ dia sẹẹ ne uwa mwẹ wa gui ẹe.

²² Wa larre, wa do ta emwi ne ọ gha he kue sunu yotọ. Ne ima miẹn ehe na rẹn ọnrẹn vbe ọ a gha sunu wa rhan otọ emwi ne ọ gberra ma iko ne uwa vbe tama ima emwi ne a ya ẹe kha.

²³ Tama ima emwi ne ọ rre ẹdẹ nakhuẹ ma ghi do rẹn ighẹ ẹbọ wa gele khin! Ru emwi esi ọkpa, ra gie ọkhọ sunu gie ima runran ne a gha guọ!

²⁴ Ke uwa kevbe emwi ne uwa ru hia, kẹkan ehia khin. Emwa izohu ọ re iran ni gho uwa khin!

²⁵ “I hannọ orhiọnkpa ne ọ rre odẹ ahọ zẹ nẹ. I gha ru ẹe ne ọ ya la odẹ okuọ suẹn igbinna. Te ọ ya owẹ rrilo irriegie mu otọ, vbe ne a khakha ighẹ ọrho iran khin, zẹ vbene ọmakhe ya owẹ rrilo obuẹ.

²⁶ De ọkpa ne ọ tae yotọ vbe uwu uwa ighẹ ọna gha sunu, ne ima miẹn ehe na kha wẹ, ẹmwata u tae? Ọkpa vbe uwu uwa ne ọ ya unu kanrẹn i rrọọ, ọmwa ne ọ họn ẹmwẹ ọkpa vbe unu uwa i rrọọ.

²⁷ Mẹ ne Nọyaẹnmwa, mẹ ọ re ọ ka gha na iyẹn na ma Zaiọn; I giee ọmwa gha rrie Jerusalẹm ne ọ ya kha wẹẹ, ‘Emwa uwa dee, iran die owa.’

²⁸ Ugbẹn vbe I tọn aro mu ghe avbe ẹbọ, ọkpa vbe uwu iran ne ọ miẹn ẹmwẹ ta i rrọọ; ọkpa vbe uwu iran ne ọ sẹtin rhie ewanniẹn ye ọta ne I nọrẹn i rrọ.

²⁹ Kẹkan ọ re avbe ẹbọ na hia wa khin, iran i sẹtin ru emwi rhọkpa hiehiere. Te avbe amazẹ na ye mitanmitan iran i mwẹ ẹtin rhọkpa.”