Aizaia 40 - Edo Bible (E Baibol Ẹdo) Version 1996

Ẹmwẹ Idaehọ

¹ Erriọ Nọyaẹnmwa khare, “Wa fu avbe emwa mwẹ ẹko rre. Wa fu iran ẹko rre!

² Wa rhie igiọdu ne ivbi e Jerusalẹm wa khama iran ighẹ iran rrii oya kpee sẹ nẹ, ighẹ a ya orukhọ iran bọọ iran nẹ nian. I rrii iran oya sọkẹn ye orukhọ iran hia nẹ.”

³ Urhu ọkpa datu wẹẹ, “Wa gbẹn odẹ ye otọ khẹ e Nọyaẹnmwa vbe uwu oha! Wa gbẹn odẹ yotọ vbe uwu oha ne Osanobua mwa.

⁴ Wa ran avbe iya hia, wa vbe guọghọ avbe oke nekhua sotọ. Avbe oke gha khian otọe ne ọ rriẹe a ghi ya ẹvbo ne kpannọkpannọ khian ne kpẹghẹ.

⁵ Ẹghẹ nii, a ghi rhie uyi e Nọyaẹnmwa ne a miẹn, emwa ne agbọn hia gha vbe miẹn ọẹn e Nọyaẹnmwa tobọ ẹre yan ọna yotọ nẹ.”

⁶ Urhu ọkpa keghi tu ladian wẹẹ, “Ya tama iran!” Mẹ keghi nọ wẹẹ, “De emwi ne I ra tama iran yi?” “Tama iran wẹ te emwa nagbọn hia ye vbe irunmwu; iran i vbe tọ sẹ obobo oha.

⁷ Irunmwu luẹluẹe, avbe obobo vbe fafaa vbe Nọyaẹnmwa a kha ne ẹhoho ya hoho iran. Emwa i vbe sun sẹ irunmwu.

⁸ Ẹn, irunmwu luẹluẹe, obobo fafaa sokpan, ẹmwẹ e Nọyaẹnmwa rrọọ, ẹdẹdẹmwẹdẹ.”

⁹ E Jerusalẹm, hin oke ne ọ yo, ne u ya wewe iyẹn ne ọ maa nii! E Zaiọn, ya urhu ne ọ la datu, ta iyẹn ne ọ maa ni ladian, guan ladian, ghẹ gie ohan mu ẹẹn. Tama avbe ore nekhua ni rre Juda wẹ Osanobua iran dee.

¹⁰ E Nọyaẹnmwa ne Udazi dee ra do ya ẹtin khaemwisẹ. Ọ ghi viọ avbe emwa ne irẹn miẹnfan mwẹ obọ gha dee.

¹¹ Ọ gha gbearoghe avbe ohuan rẹn zẹvbe ne ọsuohuan ru. Ọ gha si avbe oteghe ohuan koko, ọ ghi munọ iran ye ekuaobọ ẹre ọ ghi su avbe iye iran hẹnnẹhẹnnẹ.

Osanobua Ne A I Miẹn Egbọre

¹² A gha miẹn ọmwa ne ọ gha ye atataobọ mwa amẹ okun ra ne ọ ya obọ mwa iso? A gha miẹn ọmwa ne ọ gha ya ukpu mu ekẹn ne otọe, ra ne ọ ya omwa mwa avbe oke nekhua kevbe negiẹrẹ?

¹³ Ọmwa rhọkpa gha sẹtin tama e Nọyaẹnmwa emwi ne ọ gha ru ra? Gha ọ gha sẹtin ma ẹre emwi yi ra ne ọ bu ẹre ude?

¹⁴ De ọmwa ne Osanobua nọ ẹre ọta yi ne irẹn miẹn ehe na rẹn ra ne ọ rẹn otọ emwi ra ne ọ miẹn ehe na rẹn vbene a gha ru emwi hẹ?

¹⁵ Uhunmwu ẹvbo hia ma sẹ emwi rhọkpa vbe odaro e Nọyaẹnmwa, iran ma gberra ikpẹ amẹ ọkpa, te avbe otọe ne amẹ lẹga ni rre urria ye hogha zẹ vbe ikpekhae ọkpa.

¹⁶ Avbe aranmwẹ ni rre ẹgbo Lebanọn ma sẹ ne a gha ya zọ ese uhukpa ghe Osanobua mwa, avbe erhan ma sẹ ne a gha ya hie erhẹn.

¹⁷ Avbe uhunmwu ẹvbo ma sẹ emwi vbe aro ẹre.

¹⁸ De ọmwa ne a gha ya gie Osanobua yi? Vbe ọmwa ra ya gie vbene ọ ye hẹ?

¹⁹ Rẹn i yevbe amazẹ ne avbe emwa ni ru emwi mamaẹn, ne avbe igun ẹrọnmwọ ya igoru rhu a na vbe hẹnhọn ẹẹn yan esiliva vbe ototọ.

²⁰ Ọmwa ne obọ ẹre ma gba esiliva ra igoru, ghi gualọ erhan ne ẹ i ra kẹkẹ. Ọ ghi gualọ owinna ne ọ fu ẹro ne ọ ru amazẹ nẹi ra werriẹ gbotọ.

²¹ Wẹ ma rẹn ra? A ma tama ruẹn ke ẹkpo nii gha dee? Wẹ ma he họn vbene agbọn ya suẹn hẹ?

²² Ọmwa ne ọ tota ye ẹkete ẹre ọ re ọ ru ẹe vbe odukhunmwu agbọn, a ghi gberra iso, emwa ni rre ototọ ye giẹnrẹn vbe iranmwẹ ọ tan agbọn zẹ vbe ukpọn ne a taẹn zẹ vbe owa ukpọn ne ọ mwa ra dia.

²³ Ọ ya iran ni wegbe nikhaemwisẹ uhe sotọ ọ na ya iran khian ekẹkan fẹẹrẹ.

²⁴ Iran ye vbe ivbi erhan ne a da rhie gbọọ ne ọ ma he ke ọre zẹ inian. E Nọyaẹnmwa gha gie ẹhoho iran ghi kaka, iran ghi hoho kua vbe abọ irunmwu.

²⁵ De ọmwa ne a gha sẹtin ya gie Osanobua nọhuanrẹn? Ọmwa ọvbehe rrọ ne ọ yevbe irẹn ra?

²⁶ Tọn aro mu ghe odukhunmwu! Gha ọ yi avbe orhọnmwẹ ne u dẹghe yi? Ọmwa ne ọ viọ iran ladian vbe ivbiyokuo? Ọ rẹn inu ne iran khin te ọ he ọkpọkpa vbọ eni! Ẹtin ẹnrẹn kpọlọ sẹ vberriọ okpa vbe iran ne ọ gha wii edẹ i rrọ!

²⁷ Vbọzẹ ne u na ghi zuyọn yi Izrẹl wẹ e Nọyaẹnmwa ma rẹn ọlọghọmwa ruẹn ra ne ọ kue zẹyọ vbe a gha ruẹ khọ?

²⁸ Wẹ ma rẹn ra? U ma he họn? E Nọyaẹnmwa ọrọre Osanobua etẹbitẹ rẹn ọ re ọ yi agbọn na hia. Egbe i wọ ẹre, ẹtin i fu ẹe ọmwa ne ọ rẹn iro ekhọe ẹre i rrọọ.

²⁹ Rẹn ọ re ọ rhie ẹtin ne iran ne ẹtin fo kevbe ne egbe wọre.

³⁰ Uhin ighẹ ẹtin vbe fo ọmwa ne ẹ i re ọmaẹn egbe sẹtin wa wọ igbama, ọ ghi de.

³¹ Sokpan iran ni mu ẹtin yan iyobọ Nọyaẹnmwa, a gha ya ẹtin iran khian ọghọgbọn. Iran gha ya ifuẹn iran tin kpao vbe oghohọn iran gha rhulẹ, egbe i ra wọ iran iran gha khian, ẹtin i ra vbe fo iran.