Aizaia 4 - Edo Bible (E Baibol Ẹdo) Version 1996

¹ Ọ gha ghi sẹ ẹghẹ ne a kha na, ikhuo ihinrọn gha de obọ mu okpia ọkpa, iran ghi kha wẹẹ, “Ma gha sẹtin koko egbe mwa, ma gha vbe sẹtin de ukpọn ye egbe mwa ẹkun, sokpan gie ima gha kha ighe wẹ ọrọre ọdafẹn ima, ne a ban ukpọn efaa ọghe okhuo ne ẹ i mwẹ ọdọ hin ima ẹkun rre.”

A Gha Dọlọ E Jerusalẹm Yi

² Ẹghẹ dee ne Nọyaẹnmwa gha na ru ẹe ne ivbi erhan kevbe avbe erhan nekhua ni rre otọe na gha kakabọ wan kevbe ne iran gha ma egbe. Avbe ivbi Izrẹl ni ghi miẹn uhunmwu hia gha ghọghọ, iran ghi vbe gha yae hio ighe emwiokọ ne a miẹn gha rhọ vbe otọe nii.

³ Emwa hia ne a ghi sẹrae vbe Jerusalẹm, iran ne Osanobua hannọọ zẹ vbọ wẹ ne ọ miẹn uhunmwu, a gha tie iran nọhuanrẹn.

⁴ E Nọyaẹnmwa gha ya ẹtin ẹnrẹn bu ohiẹn, ọ ghi vbe kpe ẹe huan hin rre ighe orukhọ uhunmwu ẹvbo na, kevbe esagiẹn ne a gbe yotọ vbọ.

⁵ Ẹghẹ nii, e Nọyaẹnmwa gha gie okuku amẹ vbe ẹghẹ avan, kevbe ighogho deba erhẹn ne ọ baa vbe ẹghẹ asọn gie Oke Zaiọn kevbe emwa ni si koko ye evba. Uyi ọghe Osanobua gha rhuẹ yan rẹn, ọ ghi degue ẹvbo nii hia.

⁶ Uyi ẹre gha degue ẹvbo nii, hin owowo avan rre, ọ ghi ya ẹe khian ehe ne ẹbe i ye, ne a degue hin obọ amẹ kevbe okpẹhoho rre.