Aizaia 39 - Edo Bible (E Baibol Ẹdo) Version 1996

Emwa Ne A Gie Ke Babilọn Rre

¹ Vbe ẹghẹ na zẹ, ọba e Babilọn ighẹ Merodak Baladan ne ovbi Baladan keghi họn ighẹ egbe ma te rran Hẹzekaia ne ọba, ọ keghi rhunmwuda ọnii gbẹn ebe gie ẹe, ọ keghi vbe haa oko gie ẹe.

² E Hẹzekaia keghi gbe ọbokhian ne iran, ọ na ma iran ẹfe ne irẹn mwẹ hia, avbe esiliva kevbe igoru ẹre, avbe ori ni winhin, kevbe avbe emwi ne ivbiyokuo ya khọn okuo. Emwiọkpa i rre avbe aza ẹre ra eheikehe vbe otọ arriọba ẹre ne ọ ma viọ ma iran.

³ Ẹre Aizaia ne akhasẹ na bu e Hẹzekaia gha khian, ọ nọ rẹn wẹẹ, “De ehe ne avbe emwa na ke rre yi, vbe iran tama ruẹn hẹ?” E Hẹzekaia keghi wanniẹn wẹẹ, “Ehe ne ọ rrei ọ re iran ke rre, e Babilọn.”

⁴ “De emwi ne iran miẹn vbe ẹguae?” “Iran wa miẹn emwi hia. Emwi ọkpa i vbe rre aza ne I ma rhie ma iran.”

⁵ Ẹre Aizaia na tama ọba wẹẹ, “E Nọyaẹnmwa Osanobua khare wẹ,

⁶ ẹghẹ dee, ne emwi hia ne u mwẹ vbe ẹguae, avbe emwi ne avbe erha a khuan viọ hin rre ye aza do sẹ ẹdẹ ne ẹre na, gha na khian ne a viọ gha rrie Babilọn. Emwi ọkpa ne a gha sẹrae i rrọ.

⁷ A gha viọ eso vbe uwu avbe ivbi uẹ taara kpao, a gha ya iran khian ọghẹrriẹnoguan, ne iran ya gha tae emwi vbe ẹguae ọba e Babilọn.”

⁸ Emwi ne Hẹzekaia wẹ a ya ọna kha ọrọre wẹ ọfumwegbe kevbe ẹkun sotọ gha rrọ vbe ẹghẹ irẹn, rẹn keghi rhunmwuda ọnii wanniẹn, “Uhunmwu ne Nọyaẹnmwa giọ ẹre ne u tama mwẹ wa maa.”