Aizaia 38 - Edo Bible (E Baibol Ẹdo) Version 1996

E Hẹzekaia Ne Ọba Khuọnmwi Ọ Ke Vbe Fe

¹ Vbe ẹghẹ na, e Hẹzekaia ne ọba keghi gha khuọnmwi, ọ te ra wa wu. Aizaia ne akhasẹ ighe ovbi Amọz keghi ya miẹn ọẹn, ọ tama rẹn wẹẹ, “E Nọyaẹnmwa we ne a tama ruẹn ne u dọlọ emwi yi, rhunmwuda u i ra fe. Mu egbe ne u gha ya wu.”

² E Hẹzekaia keghi werriẹ aro da ekẹn, ọ keghi na erhunmwu wẹẹ,

³ “Yerre Nọyaẹnmwa wẹ, ekhọe mwẹ hia ọ re I ya ga a vbe ne a i na ru ero. Kevbe wẹ te I wa hia ne I ru vbene u ho ne I ru vbe ẹghẹ hia.” Ọ keghi viẹ ua ghẹghẹghẹ.

⁴ Ẹre Nọyaẹnmwa na tama Aizaia

⁵ wẹ ne ọ werriegbe bu e Hẹzekaia gha khian, ne ọ ya tama rẹn wẹẹ, “Mẹ ne Nọyaẹnmwa, ne Osanobua e Devid ne erha a odede họọn erhunmwu ruẹn nẹ, I vbe dẹghe ameve ruẹ. I gha fian ukpo ekesugie ba ẹdagbọn ruẹn,

⁶ I gha miẹn uwẹ kevbe ẹvbo na ne Jerusalẹm fan vbe obọ ọgbaisi Asiria, I gha vbe gha degue ẹvbo na khian rhinrin.”

²¹ Aizaia keghi tama ọba ne ọ lọ ebe ohọ mama ye aro uruvba ne ọ mu ẹẹn nii, ighẹ egbe gha rran rẹn.

²² Ẹre Hẹzekaia ne ọba na nọ wẹẹ, “Ama vbo ne I ya rẹn wẹ I gha sẹtin yo Ọgua Osa?”

⁷ Aizaia keghi wanniẹn wẹẹ, “E Nọyaẹnmwa gha rhie ama nuẹn ne ọ ya rhie ma ruẹn wẹ rẹn gha ru vbene irẹn khare.

⁸ U gha sẹ inianwẹ ne ọba Ehaz so, e Nọyaẹnmwa gha ya inianwẹ igbe fian aghọnghọn kanmwa.” Aghọnghọn keghi gele ya inianwẹ igbe fian egbe ẹre kanmwa.

⁹ Ugbẹn vbe Hẹzekaia ghi fee nẹ vbe emianmwẹ ne ọ khuọnmwi, ọ keghi gbẹn ihuan urhomwẹ na.

¹⁰ I te gha ro wẹ vbe ẹghẹ ne agbọn na wa ma mwẹ na te I ghi rrie agbọn iran ni wulo nẹ ne I ghẹ lo ẹdẹ mwẹ hia ne a rhie mẹ.

¹¹ I te gha ro wẹ mẹ i ghi dọlegbe miẹn Nọyaẹnmwa. Ra ọmwa ne ọ rre agbọn vbe agbọn emwa ni ma he wulo na.

¹² A te fian agbọn mwẹ fua, ọ te sẹ ufomwẹ zẹ vbe owa ukpọn ne a siẹn kua zẹ vbe ukpọn ne a fian hin ido rre. I te gha ro ighẹ te Osanobua rhie ufomwẹ ye ẹdẹ mwẹ.

¹³ I ye asọn hia viẹ eve obalọ vbene a miẹn wẹ te oduma guọghọ ugboloko mwẹ. I te gha ro ighe te Osanobua rhie ufomwẹ ye ẹdẹ mwẹ.

¹⁴ Urhu mwẹ ye wẹnrẹn, ọ ma vbe wegbe I ke gha tu ye uwu ẹko zẹvbe idu. Te aro mwẹ ghi ye kuọkuọkuọ, ne I ya ghe odukhunmwu. E Nọyaẹnmwa, wọlọ mwẹ hin uwu avbe ọlọghọmwa na rre.

¹⁵ Vbe I a ra sẹtin ta yi, e Nọyaẹnmwa ọ re ọ ru ọna. Orriara vuọn ekhọe mwẹ, I i sẹtin vbiẹ.

¹⁶ E Nọyaẹnmwa, I gha lo ẹdẹ agbọn mwẹ nuẹn wẹ ọkpa kẹkan; mu mwẹ egbe rran ne u gunmwẹ gha rre agbọn.

¹⁷ Orriara mwẹ gha fiwerriẹ khian ọfumwegbe u miẹn ẹdẹ agbọn mwẹ fan hin obọ ẹbe hia rre, u ya orukhọ mwẹ hia bọ mwẹ.

¹⁸ A i miẹn ne ọ gha rho ruẹ vbe agbọn iran ni wulo nẹ; orinmwi i sẹtin mu ẹtin yan ẹmwata ruẹ.

¹⁹ Emwa ni rre agbọn ọ re ọ rho ruẹ, zẹ vbene I rho ruẹ na. Erha emọ tama emọ vbene u maa hẹ.

²⁰ E Nọyaẹnmwa, u mu mwẹ egbe rran nẹ. Ma gha kpe akpata so ihuan urhomwẹ ruẹn ma gha so ihuan rho ruẹ vbe uwu Ọgua Osa ruẹ la inu ẹghẹ ne ima gha ya vbe agbọn.