Aizaia 37 - Edo Bible (E Baibol Ẹdo) Version 1996

Ọba Buu Aizaia Ne O Gu Irẹn Ze Iro

¹ E Hẹzekaia ne ọba ghi wa họn ẹmwẹ na, ọ ke yanghan ukpọn rẹn uan, ọ keghi hẹ ukpọn akhiẹ ye egbe, ọ na gha rrie Ọgua Osa e Nọyaẹnmwa.

² Ọ keghi gie Eliaikim ne ọ gbearoghe ẹguae, e Siebna ne ọgbenbe ẹguae, kevbe eniwanrẹn ohẹn bu akhasẹ ighẹ Aizaia ne ovbi Amọz. Ukpọn akhiẹ ọ re iran vbe hẹ rhuan.

³ Vbene ọ wẹ ne iran tama Aizaia ọ re ọna khin: “Ẹdẹ irrioya ọ re ẹdẹnẹrẹ na wa khin, a wa rri ima oya, a fa ima an. Ma ye vbe okhuo ne ọ te ra biẹ, sokpan orhiọn i rrọ ẹre re ne ọ gha ya biẹ ọe.

⁴ Ọgbaisi Asiria gie avbe ọkaokuo ẹre ne iran do kpa unu ghe Osanobua ne ọ rrọọ. Te Nọyaẹnmwa ne Osanobua ruẹ gha họn avbe ihẹn na ne ọ rri avbe emwa ne ọ kee ẹre unu rre oya. Rhunmwuda ọnii, na erhunmwu ghe Osanobua ne avbe emwa ima ni ghi miẹn uhunmwu.”

⁵ Aizaia ghi họn uhunmwu ne Hẹzekaia ghie rre,

⁶ ọ keghi giee ne a ya tama rẹn vbenian. “E Nọyaẹnmwa wẹ ne u ghẹ gie ivbi Asiria runran uwa vbe ne ọ gha na gha kha ighẹ e Nọyaẹnmwa I sẹtin miẹn uwa fan.

⁷ E Nọyaẹnmwa gha ru ẹe ne ọgbaisi họn ẹmwẹ eso ne ọ gha ya ẹe werriegbe gha rrie ẹvbo ẹre, evba ọ re Nọyaẹnmwa gha na ru ẹe ne iran gbe ẹe rua vbe odọ.”

Ivbi Asiria Vbe Do Dọlegbe Rhuọ Ku Iran

⁸ Ọkaokuo Asiria ni keghi họọn wẹ, ọgbaisi kpao vbe Lakis rre nẹ, ighẹ ọ gha gu ẹvbo okpa ne a tie ẹre Libna ne ọ rre ọkpẹn evba gbinna, rẹn keghi rhunmwuda ọnii bu ẹre gha khian ya gu ẹe guan vbe odọọ.

⁹ Avbe ivbi Asiria keghi họn wẹ e Tihaka ọghe Sudan viọ ivbiyokuo Igipt dee do gu iran gbinna. Ugbẹn vbe ọgbaisi ghi họn ẹmwẹ na, ọ keghi gbẹn ebe gie Hẹzekaia ne ọba

¹⁰ e Juda ne ọ ya tama rẹn wẹẹ, “Emwi ne u gho ne u mu ẹtin yan tama ruẹn nẹ wẹ obọ mwẹ i ra gba ruẹ, sokpan, ghẹ gie ọnii mu ẹẹn rẹrẹ.

¹¹ U họẹn vbene ọgbaisi Asiria ru avbe uhunmwu ẹvbo ne irẹn a rhirhi kha ighẹ rẹn ra rẹnkhẹn uan hẹ. Te uwẹ ro ighẹ u gha sẹtin miẹn uhunmwu ra?

¹² Avbe iran ni karo mẹ rẹnkhẹn avbe ẹvbo ne a tie ẹre Gozan, e Haran kevbe Rezẹf, iran kevbe gbele avbe emwa ni rre Bẹtẹdẹn Telasa, a ma miẹn ne ọ sẹtin miẹn iran fan vbe uwu emwi ne iran gho.

¹³ Ọba avbe ẹvbo Hamat vbo kevbe Apad, Sefavim, Hena kevbe Iva.”

¹⁴ Ẹre Hẹzekaia ne ọba na miẹn emwa ne iran gie rre ebe nii, ọ na tie ẹre. Ẹre ọ na gha rrie Ọgua Osa, ọ na rhie ebe nii ye evba vbe odaro e Nọyaẹnmwa.

¹⁵ Ọ keghi na erhunmwu wẹẹ,

¹⁶ “E Nọyaẹnmwa ne Oghodua, Osanobua Izrẹl, wẹ ne ọ tota ye odukhunmwu ehe ne avbe emwi ne a yi ni zẹ ifuẹn nii ye, wẹ okpa kẹkan ọrọre Osanobua, wẹ ọ re ọ vbe khaemwisẹ yan avbe otọe arriọba ni rre agbọn na hia, wẹ ọ re ọ yi otọe kevbe iso.

¹⁷ Banbanna nian, e Nọyaẹnmwa, danmwehọ mwa ne u vbe ghe emwi ne ima miẹn. Danmwehọ avbe ẹmwẹ ne Senakẹrib ta ne ọ ya kpa unu ghe ruẹ, wẹ ne Osanobua ne ọ rrọọ.

¹⁸ E Nọyaẹnmwa, ma hia rẹnrẹn wẹ uhunmwu ẹvbo ni bun ọ re avbe ọgbaisi Asiria he rẹnkhẹn uan ọ na ya otọ iran khian otọ ne ọ gbe ẹvbi.

¹⁹ Ọ keghi giẹẹn avbe emwi ne iran gho ua emwi ne ọ ma sẹ ne a gho ọ re iran gha khin, amazẹ erhan kevbe okuta kẹkan ọ re iran gha khin, emwi ne emwa ya obọ ru.

²⁰ Banbanna nian, e Nọyaẹnmwa Osanobua mwa, miẹn mwa fan vbe obọ ivbi Asiria, ne uhunmwu ẹvbo ni rre otọ agbọn hia miẹn ehe na rẹn ighẹ wẹ okpa ọrọre Osanobua.”

Uhunmwu Ne Aizaia Giee Gie Ọba

²¹ Ẹre Aizaia na giee ne a tama e Hẹzekaia ne ọba wẹ zẹ vbe ewanniẹn ye erhunmwu ne ọba naẹn,

²² e Nọyaẹnmwa khare wẹẹ, “Ore nọkhua e Jerusalẹm gha giọ, wẹ ne Senakẹrib, ọ ya a gbe ogiẹ.

²³ De ọmwa ne uwẹ ro ighẹ u kpa unu ghe, ne u vbe ya ukpe sakan yi? U ma ya ọghọ mẹ, mẹ ne Osanobua nọhuanrẹn ọghe Izrẹl.

²⁴ U giee avbe eguọmwadia ruẹ, ne iran do rhuọ ma mwẹ ighẹ u ye avbe ikẹkẹ okuo ruẹ hia khọn ehe ne ọ yo sẹ vbe oke Lebanọn mu otọ nẹ. U rhuọ ma mwẹ wẹ evba nii ọ re u na tọnnọ avbe sida ni tan sẹẹ gbotọ deba avbe uvbiakhẹ ni mose sẹẹ hia, kevbe wẹ u sẹẹ ehe ne ọ ghi dinmwi sẹẹ vbe uwu ẹgbo nii.

²⁵ U rhuọ ma mwẹ wẹ, u fian uhae u keghi wọn amẹ vbe ẹvbo ẹrrẹe, kevbe wẹ avbe ivbiyokuo ruẹ ya owẹ mama ẹzẹ e Naẹl ka.

²⁶ “Wẹ ma he họn ra ighẹ mẹ ọ re ọ mwamwa emwi na hia ke ẹghẹ ne ọ kpẹre gha dee? Banbanna nian, te I ghi do mu ẹẹn sẹ. Mẹ ọ re ọ rhie ẹtin ne uẹn ne u ya ye ẹvbo ne a gba odin gaa khian otiku emwirhiae.

²⁷ Emwa ni rre evba nii keghi khian ni i ghi mwẹ ẹtin, iran runraẹn, iran keghi zeze. Iran keghi yevbe irunmwu ni rre oha, ra irunmwu ni zọ ye ẹrhunrhun owa, ehe ne ẹhoho ne ọ tọn ne ọ ke odẹ ahọ rre na guọnmwẹ iran.

²⁸ “Sokpan, te I wa gba ruẹ fo fẹẹrẹ, emwi ne u ru kevbe ehe ne u yo, I rẹn vbene u gha vannọ kuọ mwẹ hẹ.

²⁹ A do na iyẹn ma mwẹ nẹ vbene u gha vannọ kevbe vbene u gha rhuọ hẹ, banbanna nian, I gha ha ẹghọ ye uẹ ihue, I ghi gba ukhu ye uẹ akọn, I ghi mu ẹẹn la odẹ ne u la rre gha rrie.”

³⁰ Ẹre Aizaia na tama Hẹzekaia ne ọba wẹẹ, “Ghe igiemwi emwi ne ọ gha sunu. Ukpo na kevbe ukpo ne ọ gha lele ẹe, avbe ọka ni de zọ ọ re uwa ra re, sokpan, vbe ukpo ne ọ ghi lele ẹe, wa gha sẹtin kọ ọka, wa ghi vbe rhọ ẹre, wa ghi vbe kọ azara, wa ghi vbe rri ọmọ ẹnrẹn.

³¹ Iran ni ghi miẹn uhunmwu vbe Juda, agbọn gha wa ma iran ẹsẹse, iran gha yevbe erhan ne ọ gie inian rẹn dinmwi ye uwu otọ ẹsẹse, ọ ghi vbe gha mọ ẹsẹse.

³² Emwa gha rre Jerusalẹm kevbe Oke Zaiọn ni gha miẹn uhunmwu, rhunmwuda e Nọyaẹnmwa ne Oghodua tae mu olọ yan rẹn nẹ ighẹ erriọ ọ re ọ gha sunu.

³³ “Vbenian ọ re Nọyaẹnmwa khare vbekpa ọgbaisi Asiria: ‘Ẹ i fi owẹ la ore ẹvbo na, ra ne ọ fi ifẹnmwẹ ọkpa ghe ẹre. Ivbiyokuo ni viọ asa mwẹ i ra sikẹ ẹvbo na, a i ra vbe tọn uye ne a ya ghae ye okuo lẹga ẹre.

³⁴ Odẹ ne ọ la rre, ọ re ọ ra vbe la gha rrie vbe ne ẹ i na fi owẹ la ore ẹvbo na. Mẹ ne Nọyaẹnmwa tae nẹ.

³⁵ I gha gbinna ne ẹvbo na, I gha vbe degue ẹre, rhunmwuda uyi mwẹ kevbe rhunmwuda eyan ne I yan ma e Devid ne ọguọmwadia mwẹ.’ ”

³⁶ Odibosa e Nọyaẹnmwa keghi la agọ ivbi Asiria, ọ keghi gbele ivbiyokuo arriaisẹn isẹn yan iyi ihinrin (185,000). Ẹdẹ ghi gbe vbe owiẹ ne ọ lelẹe, ehia keghi wulo lele otọe bẹẹrẹ!

³⁷ Ẹghẹ nii ọ re Senakẹrib ne ọgbaisi e Siria na ladian, ọ keghi werriegbe gha rrie Ninevi.

³⁸ Ọ ghi sẹ ẹdẹ ọkpa, vbe ọ ghi ga vbe aro e Nisrọk ne ẹbọ ne ọ gho, eva vbe uwu avbe ivbi ẹre nikpia, Adramẹlẹk kevbe Siarezẹ, keghi ya umozo iran gbe ẹe rua, iran na lẹ gha rrie otọe Ararat. Ovbi ẹre nokpia ọvbehe ne a tie ẹre Esahadọn keghi rhie ihe ẹre zẹvbe ọgbaisi.