Aizaia 36 - Edo Bible (E Baibol Ẹdo) Version 1996

Ivbi Asiria Yan Gie Jerusalẹm

¹ Ọ ghi rre ukpo ne ogiwenẹ ne Hẹzekaia rriọba vbe Juda, e Senakẹrib ne ọgbaisi Asiria keghi mu okuo la avbe ẹvbo ne a gba odin gaa vbe Juda, ọ na khọn iran miotọ.

² Ẹre ọ na tama eniwanrẹn ivbiyokuo ẹre ne iran ke Lakis viọ ivbiyokuo nibun mwẹ obọ gha rrie Jerusalẹm, ne iran ya tama e Hẹzekaia ne ọba wẹ ne ọ tobọ ẹre de iguẹ. Avbe ivbiyokuo na keghi mu odẹ ne avbe iran ni do ukpọn la mwẹ, vbe ehe ne uvun ne amẹ lẹ la ke uhae ne ọ ke odọ rre.

³ Ivbi e Juda eha keghi rre do vba ẹre, iran eha ni gbearoghe ẹguae, ena ọre Eliaikim ne ovbi e Hilkaia, ọgbenbe ẹguae ighe Siebna, kevbe Joa ne ovbi Asaf, ne isiẹnmwẹro.

⁴ Ivbi Asiria nii keghi tama iran we ọgbaisi Asiria ho ne irẹn rẹn emwi ne ọ ya e Hẹzekaia din vberriọ.

⁵ Ọ keghi nọ wẹẹ, “Wẹ yayi wẹ unu ne a mwẹ gha winna iwinna ẹtin kevbe iguemwi ọghe okuo ra? De ọmwa ne uwẹ ro ighe ọ gha rhie obọ yuẹ iyeke ne u ya sọtẹ Asiria yi?

⁶ Te u ro ighe Igipt gha ru iyobọ ne uẹn, te ọnii ra yevbe ne ọmwa ye erhan ne wẹnrẹn ru ọkpọ ne ọ ya khian, ọ gha bun nẹ, ọ ghi so ọmwa nii obọ. Erriọ ọ re ọba Igipt ye vbe ọmwaikọmwa a mu ẹtin yan rẹn.”

⁷ Ivbiyokuo Asiria nii keghi vbe ye rhie te ẹe wẹẹ, “Ra te uwẹ ghi ra tama ima ighe e Nọyaẹnmwa ne Osanobua uwa ọ re uwẹ mu ẹtin yan? Aro ehe ne a na gho e Nọyaẹnmwa nii ọ re Hẹzekaia guọghọ ua vbe ẹghẹ ne ọ na tama ivbi e Juda kevbe Jerusalẹm wẹ Ogiukpo okpa kẹkan ọ re iran gha na gha ga.

⁸ I gha ya eni ọgbaisi gu uwa hẹnhẹn unu ẹnrẹn, I ghi viọ ẹsin arriaisẹn eva ne uwa, adeghẹ wa gha kue miẹn emwa ni gha hin iran.

⁹ Wa ma zẹdẹ sẹ ẹrrẹe ọkaokuo Asiria ne ọ ghi kanmwa sẹ, sevba, wa keghi rhie aro yọ wẹ Igipt gha viọ ẹsin kevbe avbe ikẹkẹ okuo gie uwa.

¹⁰ Ne I na mu okuo rrie otọe uwa do khọn rẹn na, te uwa ro ighe e Nọyaẹnmwa ma rhie iyobọ mẹ ne I ya ru ẹe ra? Dekun ẹnrẹn ne I fuẹn ọnrẹn ruan. E Nọyaẹnmwa tobọ ẹre ọ re ọ tama mwẹ ne I dekun ẹnrẹn ne I rẹnkhẹn ọẹn ruan.”

¹¹ Ẹre Eliaikim, e Siebna kevbe Joa na tama avbe ọkaokuo nii wẹẹ, “Zẹ ẹvbo Aram ma ima. Ma wa họn, ghẹ ghi zẹ e Hibru, emwa ni tota lele uhunmwu ekẹn na wa danmwehọ.”

¹² Ọ keghi wanniẹn wẹẹ, “Te uwẹ ro ighe wa kevbe ọba ọkpa ọ re ọgbaisi gie mwẹ ne I do ta avbe ẹmwẹ na ma ra? Hiehiere, kevbe avbe emwa ni tota lele uhunmwu ekẹn na vbe nọ, emwa ni gha rri isan iran, wọn ahiọ iran, zẹ vbene uwa gha vbe ru.”

¹³ Ẹre ọkaokuo nii na kpaegbe mudia, ọ keghi tọn urhu mu tae vbe Hibru wẹẹ, “Wa danmwehọ ẹmwẹ ne ọgbaisi Asiria tama uwa.

¹⁴ Ọ wẹ ne uwa ghẹ gie Hẹzekaia rẹrẹ uwa. E Hẹzekaia i sẹtin miẹn uwa fan.

¹⁵ Wa ghẹ gie ẹe kpikpi uwa wẹ ne uwa mu ẹtin yan e Nọyaẹnmwa. Wa ghẹ ro ighẹ e Nọyaẹnmwa gha miẹn uwa fan, ra wẹ ọ gha da ivbiyokuo Asiria obọ yi ne iran ghẹ khọn mu ẹvbo uwa.

¹⁶ Wa ghẹ zẹye Hẹzekaia re! Ọgbaisi Asiria wẹ ne uwa ladian, ne uwa do rinmwian. A gha kue ne uwa gha rri ọmọ erhan azara uwa, ne uwa vbe gha rri ọmọ erhan ohọ uwa, ne uwa vbe gha wọn amẹ uhae ne uwa fiaẹn

¹⁷ ọ te do sẹ ẹghẹ ne ọgbaisi gha ya gbe uwa ẹkun sotọ vbe ẹvbo ne ọ wa vbe ye vbe ọghe uwa, ehe ne uwa gha na gha miẹn ugbo azara ne a ya ru ayọn, kevbe ọka irhuarhua ne a ya ru ebrẹd.

¹⁸ Wa ghẹ gie Hẹzekaia do uwa ọzuọ, ne ọ ya uwa gha ro ighẹ e Nọyaẹnmwa gha miẹn uwa fan. A he miẹn uhunmwu ẹvbo okpa ne ẹbọ ẹre miẹn fan vbe obọ ọgbaisi Asiria ra?

¹⁹ De ehe ne iran ye nian ighẹ ẹbọ avbe Hamat kevbe Apad. Ẹbọ avbe Sefavim vbo? A miẹn ọmwa ne ọ miẹn Sameria fan ra.

²⁰ A he miẹn ẹghẹ ne ọkpa vbe uwu emwi ne avbe uhunmwu ẹvbo na gho he ya miẹn iran fan vbe obọ ọgbaisi ima ra? De emwi ne ọ ghi ya uwa gha ro ighẹ e Nọyaẹnmwa gha miẹn e Jerusalẹm fan?”

²¹ Emwa nii keghi wa hunwan zẹ vbene Hẹzekaia tama iran, iran ma vbe ta ukpẹmwẹ ọkpa.

²² Ẹre Eliaikim, Siebna kevbe Joa na yanghan ukpọn iran an, iran na ya tama Hẹzekaia, ẹmwẹ ne avbe ivbiyokuo Asiria tae.