Aizaia 34 - Edo Bible (E Baibol Ẹdo) Version 1996

Osanobua Gha Rri Eghian Irẹn Oya

¹ Wa larre, wa ne emwa ni rre uhunmwu ẹvbo hia. Wa do si koko, ne uwa danmwehọ. Gie uhunmwu otọ agbọn hia kevbe emwa ni rrọọ si koko ne iran danmwehọ.

² E Nọyaẹnmwa wa mu ohu avbe uhunmwu ẹvbo hia kevbe avbe iyokuo iran. Ọ tae nẹ ighẹ te iran hia ra fuan.

³ Aira tọnnọ ikun iran yotọ, sokpan te ehia ra gha rre evba, iran ghi gha kẹkẹ ua, iran ghi gha wia, avbe uhunmwu oke ghi gha baa ne esagiẹn.

⁴ Avbe owẹn, uki kevbe orhọnmwẹ hia gha rẹnkhuan khian ebubẹ, iso gha khian ne a ho bẹkun zẹvbe ebe ohian ne a kiri, avbe orhọnmwẹ ghi kharha kua zẹvbe ebe azara ra ebe ohọ.

⁵ E Nọyaẹnmwa dunmwu umozo ẹre nẹ vbe ẹrinmwi, banbanna nian, ọ gha degbe Idọm ne emwa ne irẹn kha nẹ wẹ te iran ra fuan.

⁶ Esagiẹn kevbe efun egbe iran gha gba umozo ẹre aro kevbe iyeke, zẹvbe esagiẹn kevbe efun ivbiohuan kevbe ẹwe ne a ya zọ ese. E Nọyaẹnmwa gha zọ ese na vbe Bozra; ọ gha ru ẹe ne obọ ugbemwẹ ọnrẹn dotọ ẹsẹse vbe otọe Idọm.

⁷ Emwa ni gha dele zẹ vbe ede kevbe ivbi ẹkhuia ẹmila, otọ ghi gha baa ne esagiẹn, efun ghi vbe gba ehe hia.

⁸ Ẹghẹ ne Nọyaẹnmwa gha na miẹn e Zaiọn fan ọ re ọna khin, ọ ghi munọ avbe eghian rẹn gbotọ.

⁹ Avbe ẹzẹ Idọm gha khian odan nekhui, otọe ne ọ rrọ ghi khian ugbofi. Ẹvbo nii hia ghi gha giẹn vbe ọdan.

¹⁰ Asọn vbe avan ọ re ọ ra ya gha giẹn, ighogho ghi gha gbe vbọ rhinrin ẹdẹdẹmwẹdẹ. Otọe ni gha la ọrhiae rrie ke orre ya sẹ orre, a i ghi miẹn ọmwa ne ọ gha la evba gberra ọvbehe.

¹¹ Avbe esughusughu kevbe avbe ukhiokhio ọ re ọ ghi ra mu otọe nii ya khian ọghe iran. E Nọyaẹnmwa gha dọlegbe ya ẹe khian otọe ne ọ dihoi rua, zẹ vbene ọ ka gha ye a te do yi agbọn.

¹² Ọba i ghi ra gha rrọọ ne ọ gha khaemwisẹ yan otọe nii, avbe ọkaolotu ni rrọọ hia gha kpao.

¹³ Igban kevbe ọkọsọ gha zọ vbe ehe hia kevbe avbe ẹvbo ne a gbe ekẹn gaa. Avbe edi kevbe esughusughu ọ re ọ ghi ra gha rrọọ.

¹⁴ Avbe aranmwẹ oha ọ re ọ ghi ra gha hẹyohẹrre vbe evba, avbe ihorẹ ghi gha go tie egbe. Ugbogiorinmwi asọn ghi gha die evba, ọ ghi gha gualọ ehe ne ọ gha na hẹwẹ.

¹⁵ Avbe esughusughu gha bọlọ oko, iran ghi họlọ, iran ghi gbe, iran ghi koko ivbi iran wan vbe evba, ugu ghi do gha si koko vbe evba, iran ghi gha ya ọkpọkpa rre.

¹⁶ Gualọ uwu ebe ọghe emwi ne a yi ni rrọọ ọghe Nọyaẹnmwa ne uwa ghe vbene ọ kha hẹ. Ọkpa ne ai ra miẹn vbe uwu avbe emwi ne a yi na i rrọọ, ọkpa ne ẹi ra vbe gha mwẹ ogieva, ẹ i rrọọ. E Nọyaẹnmwa tae nẹ ne ọ gha ye vberriọ, rẹn ọ re ọ ra tobọ ẹre si iran koko.

¹⁷ E Nọyaẹnmwa ọ re ọ ra tobọ ẹre gha otọe nii ne iran, ọ ghi mu ọghe edọmwadẹ ọghọe ne ẹẹn. Iran ghi gha rre otọe nii ke orre ya sẹ orre, ọ ghi vbe gha re ọghe iran ẹdẹdẹmwẹdẹ.