Aizaia 33 - Edo Bible (E Baibol Ẹdo) Version 1996

Erhunmwu Iyobọ

¹ Ọghe avbe eghian mwa fo nẹ! Iran rhare, iran rhie emwa maa, a gha rhe miẹn wẹ ọmwa rhọkpa ma rha iran ra ne a rhie iran maa sokpan, ẹghẹ ne iran ya rha, ke ne iran ya rhie ọmwa maa gha sẹ ufomwẹ, iran tobọ iran ghi do khian ne a ghi rha ke ne a ghi siuma rẹn.

² E Nọyaẹnmwa, tohan mwa. Wẹ ọ re ima mu ẹtin yan. Gha degue mwa ẹdẹgbegbe, ne u vbe miẹn ima fan vbe ẹghẹ ibaro.

³ U gha gbinna ne ima, avbe uhunmwu ẹvbo ghi gha lẹ kua vbe iran a họn owogho okuo.

⁴ Emwa ghi fan rhu emwi iran, iran ghi hẹ gha rrie zẹ vbe emwi ne obọ vbare vbe ifu.

⁵ U miẹn vbene Nọyaẹnmwa kpọlọ hẹ. Rẹn ọ re ọ khaemwisẹ yan emwi hia. Ọ gha ya ohiẹn ẹmwata kevbe ekhọe ne ọ maa vuọn Jerusalẹm.

⁶ Ọ gha rhie ẹkun ne ọ sotọ ne uhunmwu ẹvbo nii. Te irẹn wa degue emwa rẹn vbe ẹghẹ hia, ọ ghi vbe gha rhie ẹwaẹn kevbe irẹnmwi ne iran. Ẹfe ne ọ sẹẹ ehia ne iran mwẹ ọrọre ọghọ ne a ya ne Nọyaẹnmwa.

⁷ Emwa ni din gha datu nọ iyobọ. Avbe ukọ ẹvbo ni te ho ne iran ho ọfurre ye ẹvbo, gha viẹ eve orriara.

⁸ Ẹbe wa rre odẹ ne a la sẹrriọ wẹ ai ghi miẹn ne ohan gie ẹe lae. Ẹmwẹ ne a gba ta khian ne a mu rhie, avbe rhie obọ gberra ile ne a ta ma egbe. Ọmwa okpa ne a ya ọghọ na i ghi rrọọ.

⁹ Otọe khian ne a i ghi na gbe ugbo, emwa lẹ hin ehia rre. Ẹgbo e Lebanọn luẹluẹe. Iya e Sairọn ne ọ te maa emwiokọ khian ne ọ ghi yevbe ato, ebe khakha kua vbe erhan ni rre Basian kevbe Oke Kamẹl.

E Nọyaẹnmwa Ya Obọ Sa Ekhae Ne Avbe Eghian Rẹn

¹⁰ E Nọyaẹnmwa tama avbe uhunmwu ẹvbo wẹẹ, “Banbanna nian, I gha guan yọ, I gha rhie ma uwa vbene ẹtin mwẹ sẹ hẹ.

¹¹ Emwamwa oya ọ re uwa mwamwa, emwi ne uwa vbe ru, okpa ne ọ mwẹ asa, i rrọọ. Te orhiọn mwẹ yevbe erhẹn ne ọ ra fuẹn uwa a.

¹² Te uwa ra guọghọ sotọ zẹ vbe okuta nọkhua ne a ya erhẹn giẹn nẹ a ya ru orhue ne a ya dọlọ, kevbe igban ne a giẹn ya ru emuẹn.

¹³ Gie emwa hia ni rre ọkpẹn emwa na kevbe ni rre urria họn emwi ne I ru, ne iran vbe kpa uhe ne ẹtin mwẹ.”

¹⁴ Emwa orukhọ ni rre Zaiọn gha guọ zẹzẹzẹ vbe iran runraẹn. Iran wẹẹ, “Ohu Osanobua, te ọ ye vbe erhẹn ne ọ giẹn ẹdẹdẹmwẹdẹ. A gha miẹn ọkpa vbe uwu ima ne ọ gha miẹn uhunmwu vbe egbe erhẹn vberriọ?”

¹⁵ Wa gha miẹn uhunmwu adeghẹ wa ta, wa na vbe gha ru emwi ne ọgbae. Wa ghẹ ya ẹtin uwa gbe ovbiogue rhu, wa ghẹ miẹn igho erinmwian odieke. Wa ghẹ yegbe ba iran ni kun vbene iran gha do izigha hẹ ra ne iran ru emwi dan ọvbehe.

¹⁶ Ẹghẹ nii, wa gha rrọọ vbe ai mwẹ ẹbe, ẹkun ghi vbe sẹ uwa otọ vbene a miẹn wẹ, uwu owa ọkhẹ ne Ọ wegbe ọ re uwa ye. Wa gha miẹn evbare gha re, wa ghi vbe miẹn amẹ gha wọn.

Uwa Ne Ọ Rre Odaro

¹⁷ Ọ gha do sunu wẹ, wa gha miẹn ọba ne ọ gha khaemwisẹ vbe uwu ose yan otọ arriọba ne ọ niẹn obọ ladian ghe ehe hia.

¹⁸ Avbe ọrriọvbe ni do gha koko igho uhunmwu, kevbe avbe emwa ni do gha ba ọmwa ghe, ne ohan rẹn te mu uwa, ghi do khian emwi ne a ya kpa itan.

¹⁹ Wa i ghi ra dọlegbe miẹn avbe ọrriọvbe ni tọn ukpe ihue mu nii, iran ni zẹ ẹvbo ne uwa i họn.

²⁰ Wa ghe Zaiọn ne ẹvbo ne ima na ru emwiukpo ugamwẹ mwa hia. Wa ghe Jerusalẹm. Ehe ne a dia ne ẹkun na sẹ ọmwa otọ ne a ya gie ẹre i rrọọ. Te ọ ra yevbe owa ukpọn ne ai si yo si rre, ne a i vbe vbọlọ ukeke ne a ya kan ẹnrẹn, kevbe ne irri ẹre i fian.

²¹ E Nọyaẹnmwa gha rhie uyi ẹre ma ima. Ma ghi do yin ọkpẹn avbe ẹzẹ nekhua kevbe negiẹrẹ ni vbẹe, sokpan avbe okọ ni gbinna i ra gua vbe avbe ẹzẹ nii.

^22-23 Ugbalọmwẹ ne a gbalọ okọ nii, i mwẹ asa, ukpọn ne ẹhoho ya sua ẹre khian i gia tan. Ma gha viọ emwi ne avbe ivbiyokuo eghian mwa mwẹ, iran gha bun sẹ vberriọ wẹ uhin ghẹ te obọ avbe arọ gha vbe vba vbọ. E Nọyaẹnmwa tobọ ẹre ọ re ọ ra gha re ọba mwa. Rẹn ọ re ọ ra gha khaemwisẹ yan mwa, ọ ghi vbe gha degue mwa.

²⁴ A i ghi vbe miẹn orhiọnkpa vbe ẹvbo ima ne ọ gha kha wẹ rẹn khuọnmwi, a gha vbe ya orukhọ hia bọ ọmwa.