Aizaia 32 - Edo Bible (E Baibol Ẹdo) Version 1996

Ọba Ne Ọ Rẹn Enegbe

¹ Ẹdẹ ọkpa, ọba ne ọ ye ekhọe esi khaemwisẹ kevbe avbe ọkaolotu ẹvbo ni ya uhunmwu ẹmwẹ ne a ta khaemwisẹ, gha do gha rrọọ.

² Dọmwadẹ ọghọe vbe uwu iran ghi yevbe ehe ne a lẹre yi vbe ẹhoho a gha hoho, kevbe ehe ne a lẹ fi vbe ẹghẹ okpẹhoho. Iran gha yevbe ẹzẹ ni lẹ vbe uwu ato, zẹ vbe aghọnghọn okuta nọkhua vbe otọe ne o dihoi rua.

³ Ehọ kevbe aro iran gha rhan yotọ ye emwi ne avbe emwa gualọ.

⁴ Iran i ghi ra dọlegbe gha re emwa ne egbe balọ, sokpan, iran gha rẹn vbene emwi ye hẹ iran ke gha ru ẹe, iran ghi vbe gha ta emwi ne iran mwẹ vbe ekhọe.

⁵ Ọmwarhọkpa i ghi ra vbe tie ọzuọ adazẹ ra ne ẹwobi gha re ne odẹ ọ re rriẹe.

⁶ Ẹmwẹ ukọnmwẹ ọ re akpa guan, ọ ghi vbe gha zẹ iro emwi dan ne irẹn gha ru, emwi ne ọ ru kevbe ẹmwẹ ne ọ ta, ne a ya yagha e Nọyaẹnmwa ọ re ehia khin. Ẹ i rhie evbare ne ọmwa ne ohanmwẹ gbe ra ne ọ sa amẹ ne ọmwa ne ovbamẹ gbe wọn.

⁷ Ọmwa dan ọ re ọzuọ khin, emwi dan ọ re ọ vbe ru vbe ẹghẹ hia. Ọ ghi kun ẹẹn ne ọ ya ohoghe gbe ovbiogue hin oghẹn rre, kevbe ne ọ ghẹ vbe gie emwi ne ọ khẹ ke iran sẹ iran obọ.

⁸ Sokpan ọmwa ne ọ re adazẹ, emwi uyi ọ re ọ ru, ọ ghi vbe rhie egbe ye emwi ne ọ re ẹmwata.

Ibuohiẹn Kevbe A Dọlegbe Rhie Ye Ihe

⁹ Wa ne ikhuo ni rre uwu ọrọkhọrhọ, wa ni i mwẹ oyanghan rhọkpa, wa danmwehọ vbene I kha hẹ.

¹⁰ Ẹko sẹtin wa vuọn uwa nian, sokpan, vbe ẹghẹ na ukpo ne ọ dee, wa gha rre uwu iro ne ọ hanrẹn, rhunmwuda, wa i ighi ra miẹn alimo rhọ.

¹¹ Uwu ọrọkhọrhọ ọ re uwa ye dee usin, vbe ne a i na mwẹ oyanghan, sokpan, banbanna nian, wa gie ohan ya uwa gha guọ zẹzẹzẹ, wa bannọ ukpọn uwa kua, ne uwa viọ osọnmwẹ ukpọn rhuan.

¹² Wa ye obọ ọ sẹmwẹ sẹ egbe gbe ẹwẹe, rhunmwuda, avbe otọe ne ọ maa emwiokọ, deba avbe ogba azara hia khian ne a rẹnkhuan,

¹³ igban kevbe ọkọsọ ọ re ọ ghi zọ vbe otọ emwa mwẹ. Wa gha viẹ ne avbe owa ne ọyẹnmwẹ na te sẹ emwa, kevbe avbe okpẹvbo ne ọ te hu yo hu rre.

¹⁴ Te a ra lẹ hin uwu avbe ẹguae rre, avbe igiogbẹ hia gha khian ne emwa na lẹkua fẹẹrẹ. Avbe owa kevbe avbe owa ọkhẹ ne a bọlọe ne a na khẹ iran, gha khian itowa ẹdẹdẹmwẹdẹ. Avbe ede ọ re ọ ghi gha gbe ọgọlọbọ vbọ, avbe ohuan ghi ya gha rria vbe evba.

¹⁵ Sokpan, Osanobua gha dọlegbe rhie orhiọn rẹn gie ima. Avbe otọ ni te fafaa gha dọlegbe gha maa emwiokọ, ugbo ghi vbe gha maa emwiokọ ẹsẹsẹmwẹse.

¹⁶ Ohiẹn ẹmwata kevbe uhunmwu ẹmwẹ ghi do khian ne a ta vbe otọe nii.

¹⁷ Rhunmwuda ighe emwa hia ọ re ọ ra gha ru emwi ne ọ gbae, ọfumwegbe kevbe ẹkun ne ọ sotọ ghi gha rrọọ ẹghẹ hia.

¹⁸ Emwa Osanobua gha fe vbe obọ ukpokpo, owa iran ghi gha re ne ọfumwegbe ye kevbe ne ẹ i mwẹ ẹbe.

¹⁹ (Sokpan okpẹhoho dan gha la uwu ẹgbo, a ghi vbe siẹn ore nọkhua sotọ.)

²⁰ Umiẹn vbe ẹko emwa hia gha rhiẹnrhiẹn hẹ ye ẹmwẹ amẹ ne ọkpọe ne emwiokọ ya maa, deba oha ne aranmwẹ na rria ne ẹbe i ye ne avbe ekẹtẹkẹtẹ kevbe avbe ẹmila.