Aizaia 31 - Edo Bible (E Baibol Ẹdo) Version 1996

E Nọyaẹnmwa Gha Degue Jerusalẹm

¹ Ọ ghe iran ni ya gha nọ iyobọ vbe Igipt fo. Emwi igbinna ọrhẹnrhẹn ne Igipt mwẹ ọ re iran mu ẹtin yan, avbe ẹsin, ikẹkẹ okuo kevbe ivbiyokuo sokpan iran ma mu ẹtin yan e Nọyaẹnmwa, ne Osanobua nọhuanrẹn ọghe Izrẹl, ra ne iran nọ iyobọ vbe obọ ẹre.

² Ọ rẹn emwi ne irẹn ru. Ọ ghi gie ọfuan. Ọ ghi vbe mu ẹẹn sẹ ighẹ eyan ne ọ yan rẹn wẹ, rẹn gha rri emwa dan kevbe iran ni gbegue ne iran oya.

³ Avbe ivbi Igipt i re ẹrinmwi, emwa kẹkan ọ re iran khin. Ẹsin iran ivbi re ni ke ẹrinmwi rre. Ẹghẹ ne Nọyaẹnmwa gha na guan yọ, ẹvbo ne ọ wegbe nii gha de guọghọ ua, ẹvbo ne ọ ma wegbe ne irẹn te yọre obọ ghi de. A gha fuẹn iran eveva a.

⁴ E Nọyaẹnmwa keghi tama mwẹ wẹẹ, “Vbene avbe ọsuohuan a rhirhi yan go sẹ ra vbe ne iran a rhi rhi tu sẹ, iran i sẹtin khu oduma hin aranmwẹ ne ọ gbe yotọ nẹ rre, erriọ vbe nọ emwiọkpa i rrọ ne ọ gha sẹtin da mwẹ yi, mẹ ne Nọyaẹnmwa ne Oghodua, ne I ghẹ tan obọ gue Oke Zaiọn.

⁵ Zẹ vbene ahianmwẹ gho lẹga oko ẹre, ne ọ tan ifuẹn ga ivbi ẹre, erriọ mẹ ne Nọyaẹnmwa ne Oghodua gha degue Jerusalẹm ne I tan obọ gue ẹre.”

⁶ Osanobua khare wẹẹ, “Wa ne ivbi Izrẹl, wa rukhọ ghe mwẹ nẹ, wa keghi vbe gha gbodan ghe mwẹ. Sokpan, banbanna nian, wa dọlegbe bu mwẹ gha dee.

⁷ Ẹghẹ dee ne uwa gha na filo avbe amazẹ orukhọ ne uwa ya esiliva kevbe igoru mannọ kua.

⁸ A gha fuẹn Asiria a vbe okuo, sokpan ẹ i re ẹtin ọmwa nagbọn ọ re ọ ra ru ẹe. Ivbi Asiria gha lẹkua vbe okuo, a ghi munọ avbe igbama iran oghunmwu.

⁹ Ọgbaisi iran gha ya ohan lẹ fua. Ohan gha vbe mu avbe ọkaokuo iran sẹrriọ wẹ iran gha lẹ sẹ afiala okuo iran rae ye okuo.” E Nọyaẹnmwa guan nẹ. E Nọyaẹnmwa ne a ga vbe Jerusalẹm kevbe ne erhẹn ne a ya zọ ese ne ẹẹn, baa vbe evba.