Aizaia 30 - Edo Bible (E Baibol Ẹdo) Version 1996

Emwamwa Oya Ne Iran Gu Igipt Ru

¹ E Nọyaẹnmwa guaan nẹ wẹẹ, “Ọghe iran ni khaemwisẹ yan Igipt fo nẹ rhunmwuda, iran sọtẹ mwẹ. Uviẹn ne I ma vin ọ re iran lele. Iran ghi vbe ya gha gu emwa ke ọta ne I i ma kue yi, iran ghi gha kun orukhọ yan orukhọ.

² Iran kpao gha rrie Igipt, vbe ne iran ma na nọ mwẹ vbene I roro ẹe hẹ. Iran ho ne Igipt degue iran, rhunmwuda ọnii, ọba Igipt ọ re iran mu ẹtin yan.

³ Sokpan, ọba nii i mwẹ ẹtin iyobọ ne ọ ra ru ne iran, obọ ne Igipt ra tan gue iran, ọfuan ọ re ọ ra ke ẹre ikian.

⁴ A gha rhe miẹn wẹ emwa ne iran ya zẹ ihe egbe sẹ Zoan kevbe Hanẹ ni re okpẹvbo vbe Igipt nẹ,

⁵ ivbi Izrẹl gha gbe I ma rẹn, wẹ ọ da iran ne iran na zẹdẹ ya egbe yan uhunmwu ẹvbo ne ẹ i gia mu ẹtin yan nii, uhunmwu ẹvbo ne ọ hiẹ iran vbe iran te gha khẹ iyobọ ẹre.”

⁶ Ọna ọre uhunmwu ne Osanobua gie vbekpa avbe aranmwẹ ni rre ato odẹ ekẹn: “Avbe ukọ nii khian la ẹvbo dan ne avbe oduma ye kevbe avbe ẹyẹn ni mwẹ obi dan kevbe avbe Ugbogiorinmwi ni tin. Iran keghi kun emwiokọ ighobioye vuọn ekẹtẹkẹtẹ kevbe kamẹl iran ne a viọ gie uhunmwu ẹvbo ne ẹ i mwẹ iyobọ ne ọ gha sẹtin ru.

⁷ Iyobọ ne Igipt ru i mwẹ esa, rhunmwuda ọnii ọ re I na mu ovan ne Igipt gha tie ẹre, ‘Ugbogiorinmwi ne ọmẹhẹ.’ ”

Emwa Ne Ẹ I Hẹnmwẹ

⁸ Osanobua ke tama mwẹ wẹ ne I gbẹnnẹ vbene emwa ni ye hẹ ye ebe ne a miẹn ehe na sa ẹe ye ama etẹbitẹ ighẹ vbene emwa ni rhia sẹhẹ.

⁹ Ẹghẹ hia ọ re iran ya sọtẹ Osanobua, ẹghẹ hia ọ re iran ya ta ohoghe, ẹghẹ hia ọ re iran ya he ne iran họn iruẹmwi e Nọyaẹnmwa.

¹⁰ Iran ghi khama avbe akhasẹ wẹ ne iran gue unu. Iran ghi kha wẹẹ, “Ghẹ ta ẹmwẹ emwi ne ọ re nọgbae ma ima. Ta emwi ne ima ho ne ima họn ma ima, gie ima hẹko gha dada ebibi ekhọe mwa khian.

¹¹ Biegbe vbe odẹ ne u ghẹ degue ima odẹ. Ma i ho ne ima ghi họn vbekpa ọghe Osanobua nọhuanrẹn Izrẹl ruẹ na.”

¹² Sokpan, vbenian ọ re Osanobua nọhuanrẹn ọghe Izrẹl khare, “Wa fi iyeke gbe ẹmwẹ ne I tama uwa, wa na mu ẹtin yan ọkhọ kevbe erẹrẹ ọghe uwa.

¹³ Wa rri abe. Te uwa yevbe ekẹn ne ọ yo ne ọ wa va eva ke odukhunmwu do sẹ otọ. Wa gha de rẹnkhẹn uan. vbe udomwurri.

¹⁴ Wa gha rẹnkhẹn uan vbe akhe obuẹ, wa gha rẹnkhẹn uan sẹrriọ wẹ ai miẹn ne a gha ya gha wan erhẹn vbọ ra ne a gha ya gha balọ amẹ vbe uhae vbọ.”

¹⁵ E Nọyaẹnmwa ne Udazi, ọmwa nọhuanrẹn Izrẹl tama emwa ni wẹẹ, “Wa werriegbe rre, ne uwa hẹko mu ẹtin yan mwẹ. Ẹghẹ nii, wa gha wegbe, wa ghi vbe gha re ne ẹkun sẹ ọre otọ.” Sokpan, wa he ne uwa ru vberriọ.

¹⁶ Wa keghi kun ẹẹn ne uwa hin ẹsin ni rhulẹ ẹsẹse lẹ fua vbe obọ eghian uwa. Ẹmwata wa nọ, ulẹ ọ re uwa gha lẹẹ, wa ro wẹ avbe ẹsin uwa wa rhulẹ ẹsẹse, sokpan iran ni khu uwa khian gha rhulẹ sẹẹ.

¹⁷ Arriaisẹn vbe uwu uwa gha lẹ vbe iran a bẹghe ovbiyokuo avbe eghian ọkpa. Ivbiyokuo isẹn sẹe ne ogha ya uwa hia lẹ kua. Ọkpa ne ọ gha kẹe vbe uwu avbe ivbiyokuo uwa i rrọ gberra ukperhan ọkpa ne a ya tan afiala vbe uhunmwu oke.

¹⁸ Sevba e Nọyaẹnmwa ye mudia ne ọ tohan uwa. Ọ mu egbe ne ọ ya tohan uwa, rhunmwuda emwi ne ọ gbae ọ re irẹn ru vbe ẹghẹ hia. Ọmakin iran ni mu ẹtin yan e Nọyaẹnmwa.

Osanobua Gha Fiangbe Emwa

¹⁹ Wa ne emwa ni rre Jerusalẹm i ghi ra dọlegbe viẹ ọvbehe. Ọmwa itohan ọ re Nọyaẹnmwa khin, wa gha tu bu ẹre ya nọ iyobọ, ọ gha zẹ ye uwa ẹre.

²⁰ E Nọyaẹnmwa gha gie uwa miẹn ọlọghọmwa, sokpan, rẹn tobọ ẹre gha rre evba, ọ gha ma uwa emwi, wa i ra ghi dọlegbe gha fie gualọ ẹe khian ọvbehe.

²¹ Wa gha bibi odẹ la obọ erha ọmwa ra obọ iye ọmwa, wa gha họn vbe urhu ẹre a gha tama uwa vbe odieke wẹẹ, “Wa ghe odẹ, wa lelẹe.”

²² Wa gha viọ avbe amazẹ uwa ne a ya esiliva rhu, kevbe avbe amazẹ ne a ya igoru rhu, wa ghi viọ ehia kua zẹ vbe iku, wa ghi datu wẹẹ, “Wa kpahin odaro mwẹ rre!”

²³ Ẹghẹ ikẹghẹ ne uwa a rhirhi ya kọ emwiokọ, e Nọyaẹnmwa gha rhọ amẹ yọ ne ọ ya zọ, ọ gha gie emwiokọ uwa maa ẹsẹse, avbe ẹmila uwa ghi gha mwẹ oha ne iran na rria ne ọ maa ẹsẹse.

²⁴ Ke avbe ekhuia ẹmila kevbe avbe ekẹtẹkẹtẹ ni vulo otọ uwa, oha ne ọ maa sẹẹ ehia ọ re iran gha na gha rria.

²⁵ Vbe ẹdẹ nii ne obọ gha vba owa ọkhẹ igbinna avbe eghian uwa ya mu, a na vbe gbele emwa iran, ẹzẹ gha lẹ ke dọmwadẹ oke nekhua kevbe avbe oke negiẹrẹ ladian.

²⁶ Uki ghi gha baa vbe owẹn, owẹn ghi rhie ukhukhu ihinrọn ba egbe vbene ọ ya yunmwu de yi, vbene a miẹn wẹ ne ọ gha te yunmwu vbe ikpẹdẹ ihinrọn ọ re ọ ghi wa rhie ye ikpẹdẹ okpa kẹkan. Ọna gha sunu, vbe ẹghẹ ne Nọyaẹnmwa gha na gbalọ, ọ ghi kpee rrie ighe ẹwẹn ne ọ te fian emwa rẹn re.

Osanobua Gha Rri Asiria Oya

²⁷ Urria ọ re a ke bẹghe ẹtin kevbe uyi ọghe Nọyaẹnmwa. Erhẹn kevbe ighogho ọ re ọ rhie ma vbe ohu a mu ẹẹn. Ọ gha guan, ẹmwẹ ọnrẹn ghi giẹn emwi uan vbe erhẹn.

²⁸ Ọ ghi gie ẹhoho ke odaro irẹn zẹ vbe orogho amẹ ne ọ kpolo emwi hia rrie. Ọ kpolo avbe uhunmwu ẹvbo ya fuan, ọ ghi gie iro dan ne iran zẹẹ fo ye evba.

²⁹ Sokpan, wa ne emwa Osanobua gha ghọghọ, wa ghi vbe so ihuan zẹ vbene uwa ru vbe asọn ne uwa ru emwiukpo ne a ya ru ugamwẹ kpataki. Ọyẹnmwẹ ghi gha sẹ uwa zẹ vbe avbe emwa ni zẹ owẹ lele ẹrogbo ne a kpee vbe iran rrie Ọgua Osa ọghe Nọyaẹnmwa ne ọ re ne ọ gbinna ne Izrẹl.

³⁰ E Nọyaẹnmwa gha gie emwa hia họn urhu ẹre ne ọ la ne iran vbe rẹn vbene ohu ẹre ye hẹ. Ogidi erhẹn gha rrọọ, okuku amẹ ne ọ mu waa, okpẹhoho kevbe okpamẹ.

³¹ Ivbi Asiria gha runran vbe iran a họn urhu e Nọyaẹnmwa, ighẹ obọ udamwẹ oya ne ọ rri emwa re sẹ iran egbe.

³² E Nọyaẹnmwa gha fi iran emwi yan egbe yan egbe, avbe emwa rẹn ghi gha kpe ema kevbe ukusẹ yọ. Osanobua tobọ ẹre ọ re ọ ra gu ivbi Asiria gbinna.

³³ Ẹghẹ ne ọ kpẹre ne ọ gberra, ọ re a na dọlọ ihe ọkpa yotọ ne a ra na ya ogidi erhẹn giẹn ọgbaisi ọghe Asiria. Ọ dinmwi, ọ vbe vbẹ, a keghi wa silo erhan vuọn ọnrẹn. E Nọyaẹnmwa ghi hiọnrọn erhẹn ladian ne ọ ya hie erhẹn yọ.