Aizaia 3 - Edo Bible (E Baibol Ẹdo) Version 1996

Otighi Vbe Jerusalẹm

¹ Banbanna nian, e Nọyaẹnmwa, e Nọyaẹnmwa ne Oghodua ra do viọ avbe emwi nii kevbe emwa nii ne iran mu ẹtin yan hin e Jerusalẹm kevbe Juda rre. Ọ ra do viọ evbare kevbe amẹ iran hin rre,

² avbe asukpekhae iran, kevbe avbe ivbiyokuo iran, avbe ni buohiẹn iran kevbe avbe akhasẹ iran, iran ni miẹn aro ne ẹ iran, kevbe avbe ni da ẹvbo yi ne iran,

³ avbe ekaolotu ivbiyokuo iran kevbe avbe ọkaolotu ni i re ivbiyokuo, iran ni gbinna igbinna ẹvbo iran, kevbe iran ni ya ẹbo awan kha vbene emwi gha de hẹ.

⁴ E Nọyaẹnmwa gha ru ẹe ne a miẹn wẹ ibiẹka ikpia ni ma rẹn ne a ye ọ re ọ ra gha khaemwisẹ yan iran.

⁵ Edọmwadẹ ọghọe ghi gha gbe ogieva ẹre rhu. Avbe igbama i ra ghi gha ya ọghọ ne eniwanrẹn, deba re avbe ivbivbi emwa nii i ghi ra gha yọghọ ne emwa ni sẹẹ iran.

⁶ Ẹghẹ dee, ne emwa ni rre ẹwae ọkpa gha na zẹ ọkpa vbe uwu iran, iran ghi tama rẹn wẹẹ, “Wẹ vbe miẹn ukpọn gha rhie rhuan hiehie, rhunmwuda ọnii, do gha re ọkaolotu ima vbe ẹghẹ ọlọghọmwa na.”

⁷ Sokpan, rẹn ghi wanniẹn wẹẹ, “Ẹ i re imẹ! I i sẹtin ru iyobọ ne uwa. I i mwẹ evbare a ma ghi wẹ ukpọn. Wa ghẹ ya mwẹ ru ọkaolotu uwa.”

⁸ Erriọ nọ, ọ ghe Jerusalẹm fo nẹ! E Juda ra de rẹnkhẹn uan. Emwi ne iran ta, ke ne iran ru hia, wa gbodan ghe Nọyaẹnmwa, te iran wa sirra emwa hia kpa unu ghe Osanobua tobọ ọre.

⁹ Ẹmwẹ ne iran rhie ye ekhọe ọ re a ra ya gu iran gui. Te iran ghi wa rhan ma orukhọ zẹ vbene emwa Sọdom ghaa ye. Ọghe iran fo ne, obọ iran ọ re iran ya sii ẹe gie egbe iran.

¹⁰ Emwa ẹmwata gha ghọghọ, emwi ghi wa vbe gha dunna ne iran. Iran gha rriere ẹsọn ne iran miẹn.

¹¹ Sokpan, ọghe avbe emwa dan fo nẹ. Emwi ne iran ka ru emwa ọvbehe re, ọ re a ghi ra vbe ru iran re na.

¹² Iran ni rhie igho isu ne emwa mọmọ gha wọ emwa mwẹ uhunmwu, iran ni rri iran osa kevbe gha mu iran ru. Wa ne emwa mwẹ avbe ọkaolotu uwa bibi uwa odẹ sẹrriọ wẹ, wa ma ghi rẹn odẹ ne uwa ghẹ ghi la.

E Nọyaẹnmwa Bu Ohiẹn Emwa Irẹn

¹³ E Nọyaẹnmwa mu egbe ne ọ gha ya gui ẹzọ ọghọe, ọ mu egbe ne ọ gha ya bu ohiẹn emwa irẹn.

¹⁴ E Nọyaẹnmwa ra do buohiẹn avbe ediọn kevbe avbe ọkaolotu emwa irẹn, ọ baa iran ifi ẹzọ wẹẹ, “Wa ya de rhu avbe ogba azara, owa ọghe uwa vuọn ne emwi ne uwa miẹn avbe ivbiogue re.

¹⁵ Wa i mwẹ asẹ ne uwa gha ya gha piẹn emwa mwẹ ginnotọ, ne uwa vbe gha mu avbe ivbiogue vbuẹvbuẹ. Mẹ ne Udazi e Nọyaẹnmwa ne Oghodua ọ re ọ tae.”

A Ya Obọ Sekhae Ne Ikhuo E Jerusalẹm

¹⁶ E Nọyaẹnmwa khare wẹẹ, “Ghe vbene ikhuo e Jerusalẹm hio hẹ. Iran ghi gha tọn ukpihue mu khian. Iwinna ọghe ọ re ọ mu iran. Iran ghi gha zẹ owẹ gain gain, emwiobọ ne iran ya te egbe ghi gha tu giẹin giẹin.

¹⁷ I gha rri iran oya, I gha khiokhio iran uhunmwu, I ghi vbe gie iran gha re emwa ne eto i ghi rrọ ẹre uhunmwu.”

¹⁸ Ẹdẹ dee ne Nọyaẹnmwa gha miẹn ikhuo e Jerusalẹm emwi ne iran ya hio hia, avbe emwi itegbe ne iran viọ ye obọ vbe owẹ, ne iran viọ ye uhunmwu, ẹyaẹn

¹⁹ kevbe urhuabọ. Ọ gha miẹn iran ukpọn ugbaleto,

²⁰ kevbe ẹrhu iran, ẹbo ne iran gbalọ lele obọ kevbe ẹkun;

²¹ oroka ne iran viọ ye ukpe ikpinhianbọ kevbe ihue,

²² ukpọn ne mose mose ne iran rhuan hia, ẹwu ọsotọ, ẹwu ọkodukhunmwu, ovbi ẹkpo igho;

²³ ẹwu iran ne a la bẹghe iran egbe, ukhiọnfọ eto ovbiohuẹ, ukpọn ne a rhie kinnọ urhu kevbe ukpọn ugbaleto ne wọọrọ.

²⁴ Ne iran gha na te gha lo ori ne ọ winhin, iran ghi gha wia. Ne iran gha na te gha ya ugbẹkun ni mose gba, iran ghi gha lo irri ne khuarakhuara, ne iran gha na te gha mwẹ eto ne ọ mose, iran ghi gbe akpan, ne iran gha na te rhuan ukpọn ne ọ mose, iran ghi silo osọnmwẹ ukpọn ye egbe, a ghi fi ose iran werriẹ khian emwiekhue!

²⁵ Ikpia ni rre ore ẹvbo, ne a wa kha wẹ avbe ikpia ni wegbe sẹẹ, a gha gbele iran vbe okuo.

²⁶ Avbe onurho ẹvbo gha khiẹ, iran ghi vbe gha viẹ, nene ore ẹvbo tobọ ẹre ghi yevbe okhuo ne ọ bannọ uan, a na mu ẹẹn tota ye otọ kẹkan.