Aizaia 29 - Edo Bible (E Baibol Ẹdo) Version 1996

Emwi Ne Ọ Ra Rruan E Jerusalẹm

¹ Ọghe Jerusalẹm tobọẹre, ne ọ vbe re Ogiukpo Osanobua fo vbe otọ. Ọghe ẹvbo nii ne Devid bu agọ yi fo vbotọ. Gie ukpo okpa ra eva ọvbehe deba ugie kevbe emwi ukpo ne a ru vbọ vbe rre ne ọ vbe rrie,

² ne Osanobua si ọkhọ la rọ ighe ẹvbo nii ne a tie ẹre “ogiukpo Osanobua.” Eve kevbe irria-kọn gha rrọọ, ẹvbo nii hia ghi do yevbe Ogiukpo ne a ya esagiẹn gue ya sẹ otọ.

³ Osanobua gha dekun ẹvbo nii, ọ ghi lẹga ẹre, ọ ghi khọn ẹnrẹn.

⁴ E Jerusalẹm ghi do yevbe orhiọn ọmwa ne ọ wu nẹ ra ẹrinmwi, ne ọ te ziga ne ọ guan ke ototọ gha dee, urhu ne a ya obọ guee ẹre unu ne ọ ke uwu ebubẹ ladian rre.

⁵ E Jerusalẹm, avbe ọrriọvbe ni gu ẹ gbinna hia, a gha kpolo iran gha rrie zẹvbe ebubẹ, avbe ivbiyokuo iran ni gbe orrirri gha lẹkua zẹvbe ebe ne ọ kakae. Vbe udomwurri kevbe a ma ro, a ma kọ

⁶ e Nọyaẹnmwa ne Oghodua gha ya okpẹhoho ne ọ wegbe kevbe ighohiotọ miẹn uwa fan, ọ gha gie ẹhoho amẹ kevbe erhẹn ne ọ to khian,

⁷ ẹkpo nii, avbe ivbiyokuo hia ọghe avbe ẹvbo ni gu ẹvbo Ogiukpo Osanobua gbinna, gha khian ne a ho bẹkun, emwi igbinna iran hia ke emwi ikhẹgbe, kevbe emwi hia fẹẹrẹ, gha khian ne a ho bẹkun zẹ vbe imina, zẹ vbe emwi ne a gha mu idandan rẹn vbe asọn.

⁸ Avbe uhunmwu ẹvbo hia ni si koko ne iran gu e Jerusalẹm gbinna, gha yevbe okpia ne ohanmwẹ gbe ne ọ minaẹn wẹ rẹn wa rri evbare, sokpan ọ keghi rhiọrre vbene ohanmwẹ na gbẹe, ra zẹvbe okpia ne ovbamẹ ra gbe ua, ne ọ minaẹn wẹ rẹn wọn amẹ, sokpan, ọ ghi rhiọrre, ẹho ẹre kakae.

Ude Ne A Ma Rhie

⁹ Gie obọ kẹe ne u wa gha zurọ khian! Gie obọ kẹe, ne uwa rhu aro vbe uhunmwu. Wa gie ayọn gha gbe uwa, vbene uwa ma na da ayọn wa gha dobidokpannọ khian vbe ne uwa ma na da ayọn rhọkpa.

¹⁰ E Nọyaẹnmwa ru ẹe nẹ, ne uwa gha vbiẹhunde, te ovbe ghi ra gbele uwa kua na. Avbe akhasẹ ọ re ọ te kei ne ọ gha re aro emwa nii, sokpan, Osanobua rhu iran aro nẹ.

¹¹ A i ra gie uẹ rẹn emwi ne a ya umian avbe akhasẹ kha; te ọ ra yevbe ebe ohian ne a vbuẹ re a keghi gbae gbua. U gha tọn ẹẹn mu, u na bu ọmwa ne ọ guara tie wẹ ne ọ tie ẹre nuẹn, ọ ghi tama ruẹn wẹ rẹn i ra sẹtin, rhunmwuda te a gbae gbua.

¹² U gha mu gie ọmwa ne ẹ i gua tie ne ọ tie ẹre nuẹn, ọ ghi khama ruẹn wẹ rẹn i gua tie.

¹³ E Nọyaẹnmwa khare wẹẹ, “Iran na khare wẹ mẹ ọ re iran ga, sokpan, ẹmwẹ iran i mwẹ emwi ne a yae kha, ehe ọvbehe ọ re ekhọe iran ye. Ugamwẹ iran ma gberra uhi emwa nagbọn kevbe ilele ọghe erriọ a ka ru ẹẹ dee ẹdẹ, ne iran ruẹe ye uhunmwu.

¹⁴ Rhunmwuda ọnii, I gha runran iran, vbe ne I gha na kinmwi iran yan egbe yan egbe vbe a ma ro a ma kọ. Iran ni te wan gha khian akpa, ẹwaẹn ne iran wẹ iran wan hia ghi do khian ekẹkan.”

Idaehọ Ọghe Ẹdẹnakhuẹ

¹⁵ Ọghe iran fo ighe avbe emwa ni ho ne iran gha rhie emwamwa iran lẹre ne Osanobua. Iran ru emwi ne iran mwamwa ẹn vbe ẹkhokho, iran ghi vbe gha ro wẹ ọmwarhọkpa i ra bẹghe iran, ra ne iran rẹn emwi ne iran ru.

¹⁶ Iran mu emwi hia ihan. De ne ọ re kpataki sẹẹ vbọ yi, ọmakhe ra obuẹ? Emwi ne ọmwa maẹn gha vbe khama rẹn wẹẹ, “Ẹ i re uwẹ ọ re ọ ma mwẹ” ra? Ra ọ gha sẹtin tama rẹn wẹẹ, “U ma rẹn emwi ne u ru”?

¹⁷ Zẹẹ vbene a yae kpitan wẹ vbe ọ ma he kpee wan, ẹgbo ne ọ wo gha khian ne a ya mu ugbo otọe ugbo ghi vbe khian ẹgbo.

¹⁸ Ogha sẹ ẹdẹ nẹdẹrriọ, ayenhọ gha họn vbe a gha tie ebe ladian avbe arhuaro ni ka rre uwu ebiebi yi, gha rhan aro ua, iran ghi vbe dẹghe.

¹⁹ Avbe ivbiogue kevbe avbe emwa ni mu egberriotọ gha vbe dọlegbe miẹn ọyẹnmwẹ ne Nọyaẹnmwa ne ọmwa nọhuanrẹn Izrẹl rhie ne ọmwa.

²⁰ Evba nii i ọ re ọ khian gha re ufomwẹ iran ni wọ emwa ọvbehe uhunmwu, ni vbe zan Osanobua. A gha fuẹn dọmwadẹ ọmworukhọ ua.

²¹ Osanobua gha fuẹn iran an ighe avbe emwa ni ta ẹrrẹe ọtakhọ, iran ne ẹ i gia rri emwa dan oya, iran ni ta ohoghe ne a ghẹ miẹn ehe na bu ohiẹn ẹmwata ne emwa esi.

²² Banbanna nian, e Nọyaẹnmwa ne Osanobua Izrẹl, ọmwa ne ọ fan Ebraham vbe irri hin uwu ibaro ẹre rre khare wẹẹ, “Wa ne emwa mwẹ, a i ghi dọlegbe fa uwa a ọvbehe, ugbaro uwa i ra dọlegbe ye hoo rhunmwuda ighẹ ekhue mu uwa.

²³ Wa ghẹ ghi miẹn emọ ne I ra viọ ne uwa, ẹghẹ nii wa ghi na miẹnkue wẹ mẹ ọrọre Osanobua nọhuanrẹn ọghe Izrẹl. Wa gha ya ọghọ mẹ, wa ghi vbe gha mu ohan mwẹ.

²⁴ Avbe iran ni kọẹn gha ruẹ vbene iran gha ya gha rẹn otọ ẹmwẹ hẹ. Iran ni wa gui ẹzọ uwunu vbe ẹghẹ hia gha vbe ghọghọ adeghẹ iran miẹn ọmwa ne ọ ma iran emwi.”