Aizaia 28 - Edo Bible (E Baibol Ẹdo) Version 1996

A Ya Obọ Sekhae Ne Arriọba Odẹ Okuo

¹ Arriọba Izrẹl khian rhie nẹ! O Uyi ẹre hia fafaa zẹvbe ẹde obobo vbe uhunmwu avbe ọkaolotu ẹre ni da ayọn gbe egbe. A te wa ya ori ne ọ winhin wo iran uhunmwu, sokpan, ya ghe vbe ehia lovbiẹ lele otọ, ayọn gbele iran kua.

² E Nọyaẹnmwa mwẹ ọmwa ne ọ wegbe ke ne ọ mwẹ ẹtin, ọ mu egbe ne ọ dekun iran, ọmwa ne ọ gha rre zẹvbe ẹhoho ọgbẹgbẹ, zẹvbe amẹ okpẹhoho, zẹvbe amẹ ọgbẹgbẹ ne ọ lẹ deyan emwa hia, te ọ ra lẹ rhu otọe nii hia.

³ Uhiomwẹ avbe ọkaolotu ni ne ayọn gbe, a gha ya owẹ rri ẹe ginna otọ.

⁴ Uyi ne ọ fafaa ọghe avbe ọkaolotu ni hio nii gha khian ne a ho bẹkun zẹ vbe ọmọ erhan ne ọ ka wa gha ladian, ne a zẹgiẹ kọlọ re vbe ọ wa wo ọwarọkpa.

⁵ Ẹdẹ dee ne Nọyaẹnmwa ne Oghodua gha na yevbe ẹde obobo uyi ne emwa rẹn ni miẹn uhunmwu vbọ.

⁶ Ọ gha ma iran emwi ne a ya ohiẹn ẹmwata kha ighẹ avbe iran ni bu ohiẹn, kevbe udinmwẹ ne iran ni waan ga onurho ẹvbo ne a ghẹ mu igbinna la uwu ẹre.

Aizaia Kevbe Avbe Akhasẹ Izrẹl Ni Daa Ayọn

⁷ Uhin ighe avbe akhasẹ kevbe avbe ohẹn daa ayọn gbe egbe sẹrriọ wẹ te iran ghi dobidokpannọ khian. Iran daa ayọn, iran kevbe wọọn emwi hia bun sẹrriọ wẹ, te iran ghi dekun emwi hia vbe ne emwi ghi tighi sẹ. Avbe akhasẹ daa ayọn bun sẹrriọ wẹ iran i ghi rẹn umian ne Nọyaẹnmwa rhie ma iran, avbe ohẹn vbe daa ayọn sẹrriọ wẹ iran i ghi rẹn ohiẹn ẹmwẹ ne a viọ bu iran yo ya bu.

⁸ Eteburu ne iran tota yi, ekpekpa ọ re ọ ghi gba ẹre, ai vbe miẹn ihe ọkpa ne otọ ne ọ ma gbiruẹn ghi ye vbọ.

⁹ Iran hia gui ẹzọ mwẹ khian. Iran wẹẹ, “De ọmwa ne oko ni ro ighe rẹn ma ẹre emwi yi? De ọmwa ne ọ mwẹ emwi ne ọ ya uhunmwu ne ọ gie ru yi? Emọ ni da fian ewẹn ọkpa ọ re ọ gha mwẹ emwi ne ọ gha yae ru.

¹⁰ Ọ ho ne ọ gha ma ima emwi abidi ọkpọkpa, uviẹn ọkpọkpa, ipapa ebe ọkpọkpa.”

¹¹ Adeghẹ wa ma danmwehọ mwẹ, Osanobua gha gie emwa ẹvbo ọvbehe, emwa ni zẹ eghọnmighọn, ne iran do ma uwa nene emwi.

¹² Ọ rhie ikẹtin kevbe ọfumwegbe ne uwa, sokpan, wa ma danmwehọ ẹre.

¹³ Onii ọ re ọ sii ẹe ne Nọyaẹnmwa ra na ma uwa emwi, abidi ọkpọkpa, uviẹn ọkpọkpa, ipapa ebe ọkpọkpa. Ẹghẹ nii, inugba ne uwa zẹ owẹ ọ re uwa ra vbe gha rrua owẹ. Wa gha kuan egbe uwa, ifi gha munọ uwa, a ghi vbe hẹ uwa gha rrie zẹ vbe oghunmwu.

Okuta Ẹyotọ Ne Zaiọn

¹⁴ Wa danmwehọ vbene Nọyaẹnmwa kha hẹ, wa ne emwa ni tọn egbe mu ni khaemwisẹ yan avbe emwa na vbe Jerusalẹm.

¹⁵ Wa gha rhuọ wẹ wa gu uwu koo ẹmwẹ nẹ, wa kevbe gu agbọn iran ni wulo nẹ koo ọta, wa keghi gba mu ẹẹn kọ ye efọnkpa. Aro uwa wa vbe dae wẹ, ẹghẹ ne ọfuan gha na rre, ọ gha fi uwa yi, rhunmwuda, wa mu ẹtin yan ohoghe kevbe erẹrẹ ne ọ miẹn uwa fan.

¹⁶ Vbe ne Nọyaẹnmwa ne Udazi ghi kha hẹ ọ re ọna khin nian, “I ra mu ẹyotọ ọkpa ne ọ deziẹn kevbe ne ọ wegbe ye Zaiọn. I ra vbe mu okuta ẹyotọ ọkpa ne ọ wegbe yọ, a keghi gbẹnnẹ ẹmwẹ vbenian yan rẹn, ‘Iyayi ne ọ deziẹn, te ọ vbe ziengbe.’

¹⁷ Ohiẹn ẹmwata ọrọre okun ne a ra tan ya mwa ẹyotọ ẹre, a ta ẹmwata ọ re a ra ya mwa egbe ekẹn ọnrẹn.” Okpẹhoho ọ re ọ ra kpolo ohoghe ne uwa mu ẹtin yan hia kua, orogho ghi guọghọ ekẹn ne uwa mwẹ kua.

¹⁸ A ghi so ẹe gọ ighe ọta ne uwa gu uwu ko, a gha vbe khiẹn ruan ighe ota ne uwa gu agbọn iran ni wulo nẹ ta mukọ ye efọnkpa. Ọ gha hihiẹ rre ighe ọfuan, ọ ghi kpolo uwa viọ gha rrie.

¹⁹ Ọ gha kinmwi uwa yan egbe yan egbe owiẹ owiẹ, wa ghi vba ẹre vbe egbe ke avan kevbe asọn. Dọmwadẹ uhunmwu ọgbọn ne Osanobua gie rre, ọ re ọ gha vbe gha si ugborrirri ọgbọn rre.

²⁰ Wa ghi do ye vbe oko nii ne a ya kpa itan, ọ keghi lovbiẹ ye ukpo ne ẹ i sẹ a na niẹn egbe, kevbe ukpọn ne wẹnrẹn ne ẹ i sẹ a ya hiẹn egbe.

²¹ E Nọyaẹnmwa gha gbinna zẹ vbene ọ ru vbe uhunmwu Oke Pẹrazim kevbe vbe iya e Gibiọn, ne ọ miẹn ehe na ru vbene ọ wẹ rẹn ra ru vbene ọ khọnrẹn ne emwi ne ọ ru a ya gha re ne a ma he miẹn egbọre ẹdẹ hẹ. Ọ gha winna iwinna rẹn gba, iwinna ọyunnuan nii.

²² Ghẹ giẹ ye obọ ne I ya sa ekhae ne uwa, wa gha danmwẹ ọẹn ru vberriọ, ọ gha baa gbe wa ke miẹn uhunmwu. I họn ẹn vbe Nọyaẹnmwa ne Oghodua tae wẹ te irẹn ra fuẹn otọe ẹvbo nii hia a.

Ẹwaẹn Osanobua

²³ Danmwehọ ẹmwẹ ne I ta, rhie ehọ ye emwi ne I tama ruẹn.

²⁴ A i miẹn ọgbugbo ne ọ wa gua eguegua khian, ne ọ wa vbe gha dọlọe yi khẹ emwi ne a kọ.

²⁵ Ọ gha ru otọ nii vbene ọ kei yi nẹ, ọ ghi kọ ikpe ebe uwọnmwẹ yọ, vbene ogi ra erhẹrhẹ ye. Ọ ghi kọ ọka uviẹn uviẹn, deba ọka irhuarhua, ọ ghi vbe kọ emwiokọ ọvbehe ye ọkhioha ugbo ẹre.

²⁶ Ọ rẹn vbene ọ ya winna iwinna rẹn hẹ rhunmwuda Osanobua ọ re ọ ma ẹre re.

²⁷ Ẹ i ye ovbi odo nọkhua gbe ogi ra erhẹrhẹ, sokpan, ọ ghi gha lo erhan ne ọ ma kpọlọ gbe ne ọ wa vbe rre ihe.

²⁸ Ẹ i vbe rhia ọka a vbekpa ne ọ gha na gha wiẹn ẹnrẹn khian rhinrin vbe ne ẹ i na dobọyi. Ọ rẹn vbene ọ ya wiẹn rẹn, vbene ọ gha na si ikẹkẹ otọ lae vbene ẹ i na guọghọ ọka ne ọ rrọọ.

²⁹ Obọ Osanobua ne Oghodua ọ re avbe ẹwaẹn na hia, ke rre. Emwi ne Osa mwamwaẹn ọ ghe ẹwaẹn ọ re ehia khin, okpa ne ẹ i vbe dinna odẹ ẹ i rrọọ.