Aizaia 27 - Edo Bible (E Baibol Ẹdo) Version 1996

¹ Ọ gha sẹ ẹdẹ ne ẹdẹrriọ, ẹ Nọyaẹnmwa gha ya umozo ẹre ne ọ mwẹ ẹtin ke ne ọ gbe emwi ya rri e Leviatan oya, nene Ugbogiorinmwi ne ọ gbe a kinnọ khiẹn yo khiẹn rre nii, ọ ghi vbe gbe Ugbogiorinmwi ne ọ rre uwu ẹzẹ okun.

² Ọ gha sẹ ẹdẹ ne ẹdẹrriọ, e Nọyaẹnmwa gha kha vbekpa ọghe ogba azara ne mose mose wẹẹ,

³ “Te imẹ khẹ ọre, I ghi vbe gha gbe amẹ khakhae vbe ẹghẹ hia. Te I khẹ ọre ke asọn kevbe avan, ne ọmwarhọkpa ghẹ ya rhia ẹre ua.

⁴ Ohu ogba azara nii i ghi mu mwẹ ọvbehe, adeghẹ igban kevbe ọkọsọ rrọ ne a gha gu khọn, I gha giẹn ehia fẹẹrẹ.

⁵ Sokpan, adeghẹ eghian emwa mwẹ ho ne a degue iran, wẹ ne iran do gun mwẹ dọlọ kugbe. Ẹn, wẹ ne iran do gun mwẹ dọlọ kugbe.”

⁶ Vbe ẹdẹ ne ọ dee, ivbi Izrẹl, iran ne uniẹn Jekọb gha zẹ inian zẹ vbe erhan, iran gha zẹlẹ ebe, iran ghi vbe gbe ighọn. Ọmọ ne iran mọẹn ghi gba agbọn na hia.

⁷ E Nọyaẹnmwa ma he rri Izrẹl oya ne obọ da ẹe zẹ vbene avbe eghian rẹn ye, emwa ni bun vbe ọghe iran ma he vbe wulo vbọ.

⁸ Te Nọyaẹnmwa rri emwa rẹn oya vbene ọ na hẹ iran gha rrie iwe. Okpẹhoho dan ne ọ ke ọlarre ovẹn rre, ọ re ọ ya hẹ iran kpao.

⁹ Sokpan, a gha ya orukhọ Izrẹl bọ ẹe vbe iran a lọ Ogiukpo okuta ọghe avbe ẹbọ iran ni ru ẹbọ nẹ zẹ vbe ebubẹ, ra a ghi miẹn wẹ a i ghi dọlegbe miẹn amazẹ ẹbọ okhuo ne iran tie ẹre Asiẹrra, ra ne Ogiukpo ne iran na giẹn eturari ye kẹe.

¹⁰ Ẹvbo ne a gbe ekẹn gaa nii khian itowa. Emwa lẹkua vbọ zẹ vbe ẹgbo ne ọ dihoi rua. Ọ khian ehe ne avbe ẹmila na rria.

¹¹ Abọ avbe erhan luẹluẹe, ehia vbe bunnọ kua. Te ikhuo ghi ho iran ya koko. Rhunmwuda wẹ, avbe emwa ni ma rẹn otọ emwirhọkpa, Osanobua ne Ayi ne ọ yi iran i ra tohan iran, ra ne ọ vbe mwẹ ekhọe agiẹngiẹn ghe iran.

¹² Vbe ẹdẹ ne ẹdẹrriọ, ke Yufretes kpao ya sẹ ehe ne otọe Igipt lae, e Nọyaẹnmwa gha hannọ emwa rẹn ladian ọkpọkpa, zẹ vbene a khan ọka hin ihunhun rre.

¹³ Ọ gha sẹ ẹdẹ ne ẹdẹrriọ, a gha kpe okpe ne a ya tie ivbi Izrẹl hia ni rre iwe vbe Asiria kevbe Igipt gha die owa. Iran gha rre do ga e Nọyaẹnmwa vbe Jerusalẹm, vbe oke ẹre nọhuanrẹn.