Aizaia 26 - Edo Bible (E Baibol Ẹdo) Version 1996

Osanobua Gha Gie Emwa Rẹn Khọnmiotọ

¹ Ẹdẹ dee ne emwa gha so ihuan na vbe otọ e Juda: Ẹvbo mwa wegbe. Osanobua tobọ ẹre ọre ọ wan ga ekẹn ọnrẹn.

² Wa kie urho ẹvbo nii, ne uwa gie ẹvbo ẹmwata nii la owa, ẹvbo ne emwa rẹn ru emwi ne ọ kere.

³ E Nọyaẹnmwa, wẹ ọ re ọ rhie ọfumwegbe ne iran, ni mudia ẹse vbe iro ekhọe iran iran na vbe mu ẹtin iran ya ruẹn.

⁴ Mu ẹtin yan e Nọyaẹnmwa ẹdẹdẹmwẹdẹ rẹn gha vbe gha degue ruẹ vbe ẹghẹ hia.

⁵ Ọ si iran ni tọn egbe mu ke otọ, ọ dunmwu ẹvbo ne ọ wegbe ne iran ye ua, ọ keghi gie ekẹn ọnrẹn dele khian ebubẹ.

⁶ Te iran ne a te wọ ẹre uhunmwu ghi khian lae gberra nian iran ghi gha ya ọwẹ mamaẹn ginna otọ.

⁷ E Nọyaẹnmwa, wẹ ọ re ọ gie odẹ rrie ne emwa esi, odẹ ne iran la khian ye kpẹghẹ.

⁸ ma lele vbene uwẹ ho, ma mwẹ idaehọ vbe uwu uwẹ, wẹ okpa ọrọre emwi ne ima ho.

⁹ Vbe asọn, I ya ekhọe gualọ uwẹ khian; wẹ gha bu ohiẹn agbọn kevbe emwa ni rrọọ iran gha rẹn emwi ne a ya ohiẹn ẹmwata kha.

¹⁰ A gha rhe miẹn wẹ u tohan emwa dan iran i ye ruẹ vbene a ru emwi ẹse he uhin vbe ẹvbo ẹmwata ne a ye vbe emwa na te iran ye ru emwi dan. Iran ma ho ne iran miẹn ukpọlọmwẹ ruẹn kue.

¹¹ Avbe eghian ruẹn ma rẹn, ighe u gha rri iran oya Nọyaẹnmwa, ye ekhue mu iran, ne u gie iran rri oya. Gie iran rri oya ne u mwamwa yotọ khẹ iran rhie ma iran vbene u kakabọ ho ẹmwẹ emwa ruẹn hẹ.

¹² Nọyaẹnmwa, u gha gie agbọn ma mwa, emwi ne ima ru ne ọ dunna ne ima hia, emwi ne ọ ke uwu emwi ne uwẹ ru mẹ rre nọ.

¹³ E Nọyaẹnmwa Osanobua mwa, emwa ọvbehe wa gha kha yan mwa, sokpan, wẹ okpa kẹkan ọrọre Nọyaẹnmwa.

¹⁴ Banbanna nian, iran wulo nẹ, iran ighi dọlegbe di agbọn na ya ọvbehe, orhiọn iran i ra vbe rhiọrre, rhunmwuda, te uwẹ rrii iran oya u keghi fuẹn iran an. Ọmwa rhọkpa i ghi ye iran rre ọvbehe.

¹⁵ Nọyaẹnmwa, wẹ ya ẹvbo mwa vuọn yọ, ọ na gha rhie ba egbe vbe igienenẹ ọ na keghi rhie uyi gie uwẹ.

¹⁶ Nọyaẹnmwa, wẹ rri avbe emwa ruẹn oya, ugbẹn vbe obọ ghi da iran, iran keghi na erhunmwu ghe ruẹ.

¹⁷ Nọyaẹnmwa, wẹ ọ re ọ ya ima tu ladian zẹ vbene okhuo ne emwi ubiẹmwẹ ru tu ladian vbe obalọ.

¹⁸ Ma miẹn obalọ kevbe emwi ne ọ kan ọmwa egbe, sokpan ma ma biẹ emwirhọkpa. Ma ma sẹtin khọn okuo rhọkpa miẹn otọ ne ẹvbo mwa. Emwi okpa ne ima he fiangbe ua i rrọọ.

¹⁹ Iran ni wulo nẹ vbe emwa ima, gha dọlegbe gha rre agbọn! Ikun iran gha dọlegbe rhiọrre. Iran hia ni vbiẹ vbe uwu idin iran, gha kpaegbe so ihuan oghọghọ. Zẹ vbene evbu ni fi wainwain ye otọ agbọn rọkhọ, erriọ Nọyaẹnmwa gha huẹn iran ni wulo arria nẹ usin kpaegbe.

Ibuohiẹn Kevbe A Dọlọ Rhie Ye Ukpo

²⁰ Wa la uwu owa uwa, wa ne emwa mwẹ, ne uwa khui urho ke egbe yi. Wa ya lẹre nẹ kherhe, ohu Osanobua te do dọyọ.

²¹ E Nọyaẹnmwa tuorre ke ehe ne ọ ye vbe ẹrinmwi dee, ne ọ do rri emwa ni rre agbọn oya ye orukhọ ne iran ru. Izigha ni iran dee vbe ẹkhokho, a gha fannọ ehia ladian, otọe i ghi ra dọlegbe viọ emwa ne emwa gbele ua lẹre.