Aizaia 25 - Edo Bible (E Baibol Ẹdo) Version 1996

Ihuan Urhomwẹ

¹ E Nọyaẹnmwa, wẹ ọrọre Osanobua mwẹ I gha ya ọghọ ne uẹn, I gha rho eni ruẹn, u ru avbe emwi ọyunnuan nẹ a vbe emwamwa ne u ru ẹghẹ ni u wa hẹko mu ehia sẹ nẹ.

² U ya avbe okpẹvbo khian itowa nẹ u keghi rẹnkhẹn ogba ikhẹgbe iran hia. Avbe ẹguae ne avbe eghian mwa bọlọe, khian ne a i ghi dọlegbe miẹn ọvbehe.

³ Ivbi ẹvbo ni mwẹ ẹtin gha rho ruẹ a gha mu ohan ruẹn vbe ore avbe uhunmwu ẹvbo dan.

⁴ Ivbiogue kevbe iran ne ẹ i mwẹ iyobọ lẹẹ bu ruẹ rre iran kegha rrọ vbe a i mwẹ ẹbe vbe ẹghẹ ibaro. U rhie ehe ne iran lẹre yi vbe ẹghẹ okpẹhoho, kevbe irhu vbe ẹghẹ owowo ne ọ tọn. Emwa dan gbinna zẹ vbe ẹhoho okhuakhua

⁵ zẹ vbe uyunmwu vbe otọe ne ọ kakae sokpan, wẹ ne Nọyaẹnmwa guee avbe eghian mwa unu nẹ. Wẹ keghi dọ uwemwẹ emwa dan yọ, zẹ vbene okuku amẹ ye ẹdẹ owowo furre.

Osanobua Kpehe Evbare Nọkhua Ye Otọ

⁶ Vbe emwamwa, vbe Oke Zaiọn, e Nọyaẹnmwa gha kpehe evbare nọkhua ne agbọn ẹvbo otọ agbọn hia, evbare nọkhua ọghe evbare ni maa sẹẹ ehia kevbe ayọn ni maa sẹe hia.

⁷ Vbe emwamwa, ọ gha wa mu okuku amẹ ọghe akhiẹ ne ọ te degue agbọn ẹvbo hia hin rre vbe udomwurri.

⁸ E Nọyaẹnmwa ne Udazi gha fuẹn uwu ua ẹdẹdẹmwẹdẹ. Ọ gha khiẹn ameve hin aro emwa hia rre, ọ ghi mu efa ne ọ te rre egbe emwa rẹn vbe otọ agbọn hia hin iran egbe rre. E Nọyaẹnmwa tobọ ẹre ọ re ọ tae.

⁹ Ọna ghẹ ghi sunu, emwa hia ghi kha wẹẹ, “Rẹn ọrọre Osanobua mwa. Ma mu ẹtin mwa yan rẹn, ọ keghi vbe miẹn mwa fan. rẹn ọrọre Nọyaẹnmwa! Ma mu ẹtin mwa yan rẹn, banbanna nian, ma gha ghọghọ, ọyẹnmwẹ sẹ mwa, rhunmwuda ọ miẹn mwa fan.”

Osanobua Gha Rri E Moab Oya

¹⁰ E Nọyaẹnmwa gha degue Oke Zaiọn sokpan, a gha ya owẹ rrilo ivbi e Moab ginna otọ zẹ vbene a ya owẹ rri irunmwu ye uwu ekẹn nekhui ne a ya kọ emwiokọ.

¹¹ Iran gha niẹn obọ ladian zẹ vbe ọmwa ne ọ ra khue vbe ẹzẹ, sokpan, Osanobua gha gbe iran kotọ, obọ iran ghi dinmwi lughọlughọ ye uwu ẹzẹ.

¹² Ọ gha guọghọ owa ọkhẹ ni wegbe ọghe Moab ke ẹe kevbe ekẹn ne a gbe ni yo ne iran mwẹ, ọ ghi rrua ehia guọghọ ua yotọ zẹ vbe ebubẹ.