Aizaia 24 - Edo Bible (E Baibol Ẹdo) Version 1996

E Nọyaẹnmwa Gha Rri Otọ Agbọn Oya

¹ E Nọyaẹnmwa ra duẹ otọ agbọn na an, ọ ghi sẹ ọe rae vbe ihoi. Ọ gha mu ehe ne a ya owẹ rrilo vbe otọe agbọn khiẹn yo khiẹn rre, ọ ghi zagha emwa ni rrọọ kua.

² Emwi ọkpa ọ ra rruan emwa hia, ke avbe ohẹn kevbe avbe emwa kẹkan. Eviẹn kevbe avbe arowa, iran ni dẹ kevbe iran ni khiẹn, iran ni rhie ne emwa mọmọ kevbe iran ni mọmọ vbe obọ emwa, iran ni fe kevbe avbe ivbiogue.

³ Agbọn gha zanzan an, ọ ghi la ọrhiae rrie. E Nọyaẹnmwa tae nẹ, te ọ ru ẹe.

⁴ Agbọn na kae, ọ vbe luẹluẹ otọ agbọn khian ne mitanmitan, otọ kevbe iso, ehia kẹkẹ ua.

⁵ Avbe emwa ru awua ye agbọn vbekpa ne iran na rra uhi Osanobua, kevbe ne iran ma na mu ẹẹn sẹ ighe ile ne ọ gu iran taa, emwi ne a wẹ ne ọ gha re ọghe etẹbitẹ.

⁶ Rhunmwuda ọnii, Osanobua fi agbọn unu nẹ. Emwi ne emwa iran ru, ọ re iran ha osa ẹre na. Te iran ni ghi dekẹe ghi kanmwa yọ kanmwa yọ.

⁷ Erhan azara hia luẹluẹ, te ayọn ghi vbee. Emwa hia ne ẹko te ka rhiẹnrhiẹn yi, khian ne ẹko ghi rriara.

⁸ Ema kevbe akpata ni rhiẹnrhiẹn ne iran te kpee hia dobọyi.

⁹ A i ghi so ihuan ne ọ rhiẹnrhiẹn yan ayọn, a i ghi miẹn ọmwa ne orhiẹnrhiẹn ọnrẹn ghi yẹ ọvbehe.

¹⁰ Emwi hia tighi vbe ore ẹvbo, emwa ghi khui egbe ye owa ne iran rhie uhunmwu hin ẹbe rre.

¹¹ Emwa gha go vbe adesẹ ẹvbo rhunmwuda wẹ ayọn ighi rrọọ. Oghọghọ fo ẹdẹdẹmwẹdẹ, a wabọ ẹre ua hin otọe ni rre.

¹² Itowa ọ re ore ẹvbo nii ghi khin, avbe guọghọ avbe onurho ẹre sotọ.

¹³ Emwi ne ọ ra sunu vbe uhunmwu ẹvbo otọe agbọn hia, ọ re ọna khin. Te ọ ra yevbe ufomwẹ emwiorhọ vbe a ghi kọlọ ọmọ hin uhunmwu erhan hia rre nẹ, a na vbe kọlọ alimo ne okiekie hin azara rre.

¹⁴ Iran ni miẹn uhunmwu gha so ihuan oghọghọ. Iran ni rre odẹ orrie gha na iyẹn vbene Nọyaẹnmwa kpọlọ hẹ.

¹⁵ Iran ni rre odẹ ahọ gha rho ẹre. Avbe emwa ni yin lele ọkpẹn okun gha rho e Nọyaẹnmwa ne Osanobua Izrẹl.

¹⁶ Ma gha họn ihuan ne a so ya tian Izrẹl ne ẹvbo ẹmwata, ke ehe ne ọ ghi rrei sẹẹ vbe otọ agbọn gha dee. Sokpan, idaehọ i rrọ ne imẹ, ghe vbe I rriororo hẹ! Avbe ọgueva gha ya ọmwa ne a vbokho. Uma dan ne iran si wa khọrhiọn yọ ẹdẹgbedẹgbe.

¹⁷ Emwa hia, wa danmwehọ mwẹ. Ohan nọkhua rrọ, avbe uye kevbe ifi diakhẹ uwa.

¹⁸ Ọmwa ne ọ wẹ rẹn ra lẹ ne ugborrirri nii, gha de ye uvun, ọmwa ne ọ vbe lẹ hin obọ uvun rre, ọ ghi de ye ifi. Okpamẹ nọkhua gha gbefua ke iso rre, ẹyotọ agbọn gha vbe mu rueghe.

¹⁹ Agbọn gha saa, ọ ghi guọghọ ua, ọ gha vaa, ọ ghi we unu uan yotọ.

²⁰ Agbọn tobọ ẹre ghi gha ya owẹ fi otọ dọn, zẹ vbe Ọdayọn. Ọ ghi gha han yo han rre zẹ vbene irhu ne a gbae ru vbe okpẹhoho a gha hoho. Ihe orukhọ agbọn yẹnyẹn ọẹn mu otọ nẹ, ọ gha de guo, ẹ i ghi vbe kpaegbe ọvbehe.

²¹ Ẹdẹ dee ne Nọyaẹnmwa gha rri avbe ẹtin ni rre odukhunmwu oya deba avbe iran nikhaemwisẹ vbe agbọn.

²² Osanobua silo avbe ọba koko ye uwu uvun zẹvbe oleghan. Ọ gha khui iran ye uwu ẹwẹdọ rhinrin ọ te do sẹ ẹghẹ ne a gha ya rri iran oya.

²³ Uki gha so ebiebi, ovẹn I ghi vbe yunmwu, rhunmwuda, e Nọyaẹnmwa ne Oghodua ọ re ọ ra gha re ọba. Ọ gha rriọba vbe oke Zaiọn vbe Jerusalẹm, avbe ọkaolotu emwa gha miẹn uyi ẹre.