Aizaia 23 - Edo Bible (E Baibol Ẹdo) Version 1996

Uhunmwu Ne A Giee Rre Vbekpa Fonisia

¹ Uhunmwu ne a gie vbekpa Taia ọ re ọna khin. Gha go ugomwẹ akhiẹ, wa ne avbe oziguẹ ni gua vbe okun. E Taia ne eghute ẹvbo rua, a dunmwu ẹn ruan nẹ, avbe owa ni rrọ kevbe ehe ne okọ na yakọ khian itowa. Okọ uwa gha ke Saiprọs rre, wa gha họn iyẹn na.

² Wa gha kporhu eve wa ne avbe ọduẹki ni rre Saidọn. Wa gie emwa ne iran

³ fian okun rra, ne iran ya gha dẹ, kevbe ne iran ya gha khiẹn avbe okọ ni rre Igipt, ke vbe ne iran ya gu avbe uhunmwu ẹvbo otọ agbọn hia ya gha do ẹki.

⁴ E Saidọn ne okpẹvbo, a fa ruẹ ua nẹ. Okun kevbe orinmwi amẹ okun nọkhua khare wẹ, iran ma rẹn ruẹn, iran wẹẹ, “I ma biẹ ọmọ rhọkpa, I ma koko emọ ikpia ra emọ ikhuọ.”

⁵ Uhin ighe te ọ ra yan ivbi Igipt ne arẹngbe unu an, orrirri ghi gbe ku iran vbe iran gha họn wẹ a dunmwu e Taia a.

⁶ Wa gha kporhu eve orriara, wa ne emwa e Fonisia. Wa hia ne uwa lẹ gha rrie Spen.

⁷ E Taia ne ẹvbo uzọmọ ọ re ọna gele khin ra, ẹvbo ne a bu ru nẹkpo i mwẹẹ arria gha dee! Ẹvbo nii ne ọ gie emwa ne iran fian okun rra, ne iran ya gha bu ẹvbo, ọ re ọna gele khin ra?

⁸ De ọmwa ne ọ ghi kun ẹn vbe nian na yi wẹ ne emwi vbenian do sunu vbe egbe Taia, ne ẹvbo ahi rre, ne ivbi ogie ẹre ni do ẹki ye isi te gha re emwa ne a ghi yọghọ na sẹẹ vbe otọ agbọn?

⁹ E Nọyaẹnmwa ne Oghodua ọ re ọ mwamwa ẹn. Te ọ mwamwa ẹn ne ọ miẹn ehe na dobọ uhiomwẹ ne iran hio ye emwi ne iran he ye obọ ru yi, kevbe ne ọ silo emwa iran ne a yọghọ na kẹ otọ.

¹⁰ Wa ya ye otọe nii mu ugbo, wa ne emwa ni rre avbe ẹvbo ne a bu ye Spen! Ọmwa ne ọ ghi tan obọ gaa uwa ighi rrọọ.

¹¹ E Nọyaẹnmwa niẹn obọ rra okun, ọ keghi munọ avbe arriọba gbotọ. Ọ keghi vbe wẹ ne a guọghọ avbe ehe ne emwa e Fonisia na do ẹki sotọ.

¹² E Saidọn ne ore nọkhua, oghọghọ ruẹ sẹ ufomwẹ, emwa ruẹn khian ne a ghi wọ ẹre uhunmwu. Ọ gha khọn iran ne iran ya lẹ ku e Saiprọs, iran ma he ye fe vbe obọ ẹbe vbe evba.

¹³ (Ivbi e Babilọn ọ re ọ gie avbe aranmwẹ akọn rẹnkhẹn e Taia rua ighe ẹ i re ivbi Asiria. Ivbi e Babilọn ọ re ọ bọlọ owa ọkhẹ ya ghae ga e Taia, iran keghi guọghọ emwi ne a ya gba ogba lẹga ẹre sotọ, iran na ya ẹvbo nii khian itowa iran ke sẹ ọe rae.)

¹⁴ Wa gha go ugomwẹ orriara wa ne avbe oziguẹ ni ke okun rre nẹ! Ore ẹvbo uwa ne uwa te ye aro khọ, a guọghọe rua nẹ.

¹⁵ Ẹghẹ he dee ne a gha na mianmian e Taia la ukpo ekigbesiyenẹ, omwa ẹghẹ ne ọba ọkpa gha rriọba la vbe otọ. Ẹghẹ nii ghẹ ghi gberra nẹ, e Taia ghi do yevbe ebabotu ne iran ya so ihuan vbenian wẹẹ:

¹⁶ “Mu akpata ruẹ la ẹvbo khinkhian we ne ẹwobi ne a ghi mianmian kpe akpata ne u dọlegbe so ihuan ruẹn ne u ya ẹe dọlegbe tie ikpia rri egbe.”

¹⁷ Ukpoekigbe-siyenẹ ni ghẹ ghi gberra nẹ, e Nọyaẹnmwa gha gie Taia ya dọlegbe suẹn ẹki ẹre nẹdẹ, ọ ghi gie agbọn ẹvbo ni rre otọe agbọn hia do gha rhie ẹre vbe iwinna.

¹⁸ A ghi ya igho ne ọ miẹn vbe ẹki fi ohan ne Nọyaẹnmwa. Ẹ i ra vbe viọ ẹre hin rre, sokpan, avbe emwa ni ga e Nọyaẹnmwa gha ya igho nii dẹlẹ evbare kevbe ukpọn ne iran gha lo.