Aizaia 21 - Edo Bible (E Baibol Ẹdo) Version 1996

Umian Ọghe Udemwẹ E Babilọn

¹ Uhunmwu ne ọ gie rre vbekpa e Babilọn ọ re ọna khin. Ọkhọ gha ke ẹvbo ne ọ ye afianma fian ọmwa guọnmwẹ rre, zẹ vbe ẹhoho ẹziza ne ọ la ato gberra.

² I miẹn umian ọghe emwi dan ni sunu, umian ọghe a ya ọmwa ne a vbokho kevbe ọfuan. “Ivbiyokuo Ẹlam, wa dekun iran! Ivbiyokuo e Medis, wa gha ga avbe okpẹvbo nii. Osanobua gha dobọ oya ne Babilọn he si ye emwa egbe yi.”

³ Emwi ne I họẹn kevbe ne I miẹn vbe umian nii, sii ohan kevbe obalọ yọmwẹ egbe, obalọ ne ọ yevbe ọghe okhuo ne emwi ubiẹmwẹ ru.

⁴ Aro wa lẹga mwẹ, te I ghi guọ zẹzẹzẹ rhunmwuda ohan. Te I ghi khẹ wẹ ne ẹdẹ mu sokpan, ọnii ma vbe rhie emwi rhọkpa gunmwuẹ gberra ohan.

⁵ Vbe umian nii, a keghi le evbare eghọ yotọ. A keghi wa ukpọn lele otọ ne avbe emwa ne a tiere tota yi. Iran kegha re, iran na gha da. Vbe udomwurri, urhu asẹ okpa keghi tae wẹẹ, “Ewọe, wa viọ asa ne uwa mu egbe yotọ.”

⁶ Ẹre Nọyaẹnmwa na tama mwẹ wẹẹ, “Gie odibo ne ọ khẹ odẹ okpa tama rẹn wẹ ne ọ do ta emwi ne ọ miẹn.

⁷ Ọ gha miẹn avbe ikpia ni hin ẹsin dee ni re eveva, kevbe avbe ikpia ni hin ekẹtẹkẹtẹ kevbe e kamẹl, wẹ ne ọ gbe aro kotọ ghe iran ẹsẹse.”

⁸ Odibo ne ọ bodẹ nii keghi kha wẹẹ, “Te I wa khẹ odẹ vbe ehe ne I ye ke ẹghẹ nii gha dee, asọn kevbe avan.”

⁹ Wa ghe vbe iran wa dee nian ighẹ avbe ikpia ni hin ẹsin, ni vbe rre uviẹn eveva, odibo ne ọ bodẹ nii ọ re ọ kha vberriọ, “E Babilọn de guọghua, avbe ẹbọ ne iran gho hia wa rre otọ bẹẹrẹ, ehia rẹnkhẹn uan.”

¹⁰ Wa ne Izrẹl ne emwa mwẹ, te a te gha wiẹn uwa vbe ọka, sokpan, banbanna nian, te I mẹ ghi do na iyẹn oghọghọ na ne imẹ vbe họn vbe ọghe Nọyaẹnmwa ne Oghodua ne Osanobua Izrẹl, ma uwa.

Uhunmwu Ne A Gie Rre Vbekpa Idọm

¹¹ Ọna ọrọre uhunmwu ne a gie rre vbekpa Idọm. Ọ wẹẹ, “Abodẹ, vbe ọ ra kpee sẹ hẹ ẹdẹ ke gbe yi? Tama mwẹ, vbe ọ gha kpee sẹ hẹ ọ ke fo.”

¹² Mẹ keghi wanniẹn wẹẹ, “Ẹdẹ wan dee nẹ, sokpan, ẹdẹ gha vbe dọlegbe mu. Adeghẹ, u ho ne u dọlegbe nọ, u ghi werriegbe rre do nọ.”

Uhunmwu Ne A Gie Vbekpa Arebia

¹³ Uhunmwu ne a gie vbekpa Arebia ọ re ọna khin. Ivbi e Dedan, wa ne ekhẹn ekpatẹ ne okotọ ẹre sierre vbe Arebia ne ẹvbo ne ọ dihoi rua,

¹⁴ wa sa amẹ ne emwa ne ovbamẹ gbe ni bu uwa rre. Wa ne ivbi e Tema, wa rhie evbare ne avbe emwa ni lẹ hin ẹvbo iran bu uwa rre.

¹⁵ Emwa gha lẹ hin ehe ne umozo na ho ne ọ gbele iran an rre, hin ehe ne avbe uhanbọ ne ọ ho ne ọ salọ iran ye, hin obọ ẹbe okuo hia.

¹⁶ Ẹre Nọyaẹnmwa na tama mwẹ wẹẹ, “Ọ gha wa rre ukpo okpa zẹẹ ukpọlọmwẹ ọghe ẹwae e Keda gha sẹ ufomwẹ!

¹⁷ Iran ni fi uhanbọ ọrọre emwa ni din sẹẹ vbe Keda sokpan ibozẹghẹ ọ ra kẹe vbọ. Mẹ ne Nọyaẹnmwa ne Osanobua Izrẹl ọ re ọ tae.”