Aizaia 2 - Edo Bible (E Baibol Ẹdo) Version 1996

Ọfumwegbe Etẹbitẹ

¹ Ghe uhunmwu ne Osanobua gie Aizaia ne ovbie Amọz re vbekpa e Juda kevbe Jerusalẹm:

² Vbe ẹdẹ ne ọ dee, uhunmwu oke ne a gha bọ Ọgua Osa yi, ghi gha re uhunmwu oke ne ọ yo sẹẹ ehia ọ ghi gha ghe avbe oke hia uhunmwu. Agbọn ẹvbo nibun gha rre, iran ghi gha bi la rọ.

³ Emwa iran ghi vbe gha kha wẹẹ, “Wa gie ima hin oke e Nọyaẹnmwa gha rrie Ọgua Osa ọghe Osanobua Izrẹl ọ gha ma ima emwi ne ọ ho ne ima ru, ma gha lele odẹ ne ọ zẹ gha khian. Rhunmwuda, e Jerusalẹm ọ re Nọyaẹnmwa ke ma ọmwa emwi rre, e Zaiọn ọ re ọ ke gu emwa rẹn guan rre.”

⁴ Ọ gha dọlọ avbe uhunmwu ẹvbo nekhua kugbe. Iran gha ya umozo iran dunmwu emwi ne ọ yevbe ẹguẹ kevbe asoro iran, iran gha ya dunmwu ikhu. Avbe uhunmwu ẹvbo ighi khọn okuo ọvbehe iran ighi mu egbe okuo ọvbehe.

⁵ Banbanna nian, wa ne ivbi uniẹn e Jekọb wa gie ima gha khian vbe uwu uwanmwẹ ne Nọyaẹnmwa rhie ne ima.

A Gha Fuẹn Itengbemu Ruan

⁶ E Nọyaẹnmwa, wẹ mianmian avbe emwa ruẹn ne, ighe avbe ivbi e Jekọb. Uyinmwẹ oso ọ re ọ ghi gba otọe nii hia, ke odẹ ahọ yasẹ Filistia. Uyinmwẹ, ẹvbo ẹrrẹe ọ re avbe emwa nii ghi yin.

⁷ Otọe iran vuọn ne esiliva kevbe igoru. Ẹfe iran i vbe mwẹ inu. Otọe iran vuọn ne avbe ẹsin, ikẹkẹ okuo, iran i vbe mwẹ inu.

⁸ Otọe iran vuọn ne amazẹ, emwi ne iran ya obọ iran ma ọ re iran ghi ghoo.

⁹ A gha si edọmwadẹ ọghọe vbe uwu iran kẹ otọ, a ghi fa iran an. E Nọyaẹnmwa ghẹ yabọ iran.

¹⁰ Iran gha lẹ khuakhua vbe uwu uvun okuta vbe avbe oke okuta, ra iran ghi tọnnọ uvun ye uwu otọ ne iran miẹn lao hin izohu Osanobua rre, kevbe uyi ẹre rre.

¹¹ Ẹdẹ dee ne a gha dobọ itengbemu ọmwa nagbọn yi, a ghi vbe fuẹn uhiomwẹ ọmwa nagbọn uan. Ẹghẹ nii, a ghi do tọn e Nọyaẹnmwa mu.

¹² Vbe ẹdẹ nẹdẹrriọ, e Nọyaẹnmwa ne Oghodua gha hie uhunmwu emwa ni mwẹ ẹtin hia rriotọ, iran hia ni hio, kevbe ni ya obọ rra ẹwẹe.

¹³ Ọ gha fuẹn avbe sida ni taẹn ni rre Lebanọn hia, deba avbe okan hia ni rre otọ e Basian.

¹⁴ Ọ gha guọghọ avbe oke ni yo hia kevbe avbe oke negiẹrẹ sẹ otọ,

¹⁵ avbe owa ọkhẹ ni yo hia, deba ekẹn owa ọkhẹ igbinna hia.

¹⁶ Avbe okọ ni kọnkọn ke ni mose sẹ, ọ gha gbele ehia ye ẹzẹ.

^17-18 A gha dobọ uhiomwẹ emwa nagbọn yi, a gha fuẹn itengbemu emwa nagbọn ruan. A gha ho avbe amazẹ bẹkun fẹẹrẹ. E Nọyaẹnmwa ọkpa ọ re a ra gha go wan ẹdẹ ne ẹdọ.

¹⁹ Emwa gha lẹre ye uwu avbe uvun ye uwu otọ ne iran miẹn ehe na lẹfe vbe obọ ohu e Nọyaẹnmwa, kevbe ne iran vbe lẹre hin obọ ẹtin kevbe uyi ẹre rre, vbe ẹghẹ ne ọ gha na mu agbọn rueghe.

²⁰ Ọ gha sẹ ẹdẹ nẹdẹrriọ, iran gha filo amazẹ igoru kevbe esiliva ne iran mannọẹn kua, iran gha sẹ ehia rae ne ofẹn oha kevbe avbe ẹguẹn.

²¹ E Nọyaẹnmwa gha rre do mu agbọn na rueghe, emwa gha lẹre ye uvun otọ kevbe uvun okuta, ne iran miẹn ehe na lẹ ohu ẹre fe, kevbe ne iran lẹre ne ẹtin ẹnrẹn kevbe uyi ẹre.

²² Ghẹ mu ẹtin yan ọmwa ne ọ sẹtin wu. Vbe iran gbe vbe iran hẹẹ?