Aizaia 19 - Edo Bible (E Baibol Ẹdo) Version 1996

Osanobua Gha Rri Igipt Oya

¹ Uhunmwu ne a gie rre vbe ekpa Igipt ọ re ọna khin. E Nọyaẹnmwa die Igipt, okuku amẹ ọ re ọ zabọ hin dee. Avbe amazẹ Igipt gha guọ zẹzẹzẹ vbe odaro ẹre, udu ivbi Igipt ghi vbe kpaẹn fi ẹko.

² E Nọyaẹnmwa khare wẹẹ, “I gha bọ Igipt ye igbinna owowa, I ghi viọ etẹn nikpia aro da etẹn iran nikpia, kevbe emwa ẹdogbo ẹre aro da emwa ẹdogbo ẹre ọvbehe. Avbe okpẹvbo ni gu egbe suan ghi gha gu egbe iran khọn, avbe ọba ni gu egbe suan ghi gba gha sinmwi ẹtin.

³ I gha rhia uma ne ivbi Igipt si, I ghi vbe duẹ ẹtin ne ọ te rre iran iwu rua. Iran gha rinmwian wẹ ne amazẹ iran yi iran obọ, iran gha vbe yo ya gha gualotọ emwi vbe obọ iran ni miẹn aro, iran ghi vbe gha nọ ibude vbe obọ orhiọn emwa ni wulo nẹ.

⁴ I gha viọ ivbi Igipt ku obọ ọba dan, ọba ne ekhọe dan ne ọ ra gha khaemwisẹ yan iran. Mẹ ne Nọyaẹnmwa ne Oghodua, ọ re ọ tae.”

⁵ Ẹzẹ e Naẹl gha si, avbe ẹzẹ gha hẹko ka.

⁶ Avbe ẹzẹ ne a ya obọ fian ghi do gha wia, vbene iran ya hẹko ka, irunmwu ni rre ọkpẹn ẹzẹ kevbe ni rhu yan ẹzẹ hia ghi luẹluẹ.

⁷ Avbe emwiokọ ne a kọ lele ọkpẹn e Naẹl hia gha kaka a, ẹhoho ghi hoho ehia gha rrie.

⁸ Emwa hia ni miẹn evbare ẹdẹ iran viọ ke ẹzẹ e Naẹl rre gha viẹ eve orriara, ọga kevbe ẹghọe iran gha la ọrhiae rrie.

⁹ Iran ni do ukpọn eto ovbiohuẹ, gha khian ne ẹtin fo.

¹⁰ Iran ni do emwi kevbe iran ni guẹ ona, egbe ghi wọ iran, ẹtin ghi fo iran.

¹¹ Akpa ọ re iran khin ighe avbe ọkaolotu ẹvbo e Zoan. Ude ọzuọ ọ re emwa ni ghi wan sẹ vbe Igipt bu ọmwa re! Vbe ohan na gie iran tama ọba hẹ yi wẹ iran ọrọre emwa ni mudia ye ihe avbe umẹwaẹn kevbe avbe ọba nẹdẹ.

¹² Ọba Igipt, avbe iran ni gu ọmwa zẹ iro ne avbe umẹwaẹn ruẹn ghi vbo yi? U gha ghe, iran gha sẹtin tama ruẹn ehe ne Nọyaẹnmwa ghae yi vbe ekpa Igipt.

¹³ Ọzuọ ọ re avbe ọkaolotu ni rre Zoan kevbe Mẹmfis khin. Te a te wẹ ne iran su ẹvbo nii sokpan iran de ẹre odẹ.

¹⁴ E Nọyaẹnmwa ru ẹe ne iran gha bu iran ude ne ọ ye emwi lighi ye ọmwa aro, emwi ne ọ ghi lae rre ọrọre wẹ te Igipt ba emwi hia ku ru, te ọ ghi zẹ owẹ ahanmwahan zẹvbe ọdayọn ne ekpa ne ọ kpae miọnghọn ẹre owẹ.

¹⁵ Orhiọnkpa ne ọ gha sẹtin ru iyobọ i ghi rre Igipt, ọ re ne ọ fe nọ ra ovbiogue, ọmwa kpataki ra ọmwa ne a ma rẹn.

Igipt Gha Ga E Nọyaẹnmwa

¹⁶ Ẹghẹ dee ne ohan gha na gha mu ivbi Igipt zẹ vbe ikhuo. Ohan gha mu iran, iran ghi gha guọ zẹzẹzẹ vbe iran a miẹn wẹẹ e Nọyaẹnmwa ne Oghodua niẹn obọ ẹre ladian ne ọ ya rri iran oya.

¹⁷ Afianma e Juda ghi gha fian ivbi Igipt vbe ẹghẹikẹghẹ ne a ya ye iran emwi ne Nọyaẹnmwa ghae khẹ iran.

¹⁸ Ọ gha sẹ ẹghẹ ne a kha na, a gha zẹ ẹvbo ivbi e Hibru vbe okpẹvbo Igipt isẹn. Emwa ni rre evba nii ghi gha ya eni e Nọyaẹnmwa ne Oghodua vẹn ihẹn. A ghi gha tie okpa vbe uwu avbe okpẹvbo nii, “Ẹvbo Owẹn.”

¹⁹ Ọ gha sẹ ẹghẹ ne a kha na, a gha bọ Ogiukpo ne Nọyaẹnmwa vbe otọe Igipt, a ghi vbe ya orre okuta fi ohan ne ẹẹn vbe ehe ne uwu Igipt lae.

²⁰ Ena ghi gha re ama ne a ya rhie ma wẹ e Nọyaẹnmwa ne Oghodua rre otọ Igipt. A gha miẹn wẹ, a wọ emwa ni rre evba uhunmwu, iran na kpetie e Nọyaẹnmwa wẹ ne ọ yi iran obọ, ọ ghi gie orhiọnkpa ne ọ ya miẹn iran fan.

²¹ E Nọyaẹnmwa gha rhie egbe ẹre ma ivbi Igipt, ẹghẹ nii, iran gha vbe miẹn irẹn kue, iran ghi vbe gha ga ẹe, iran ghi vbe gha viọ ese ne a zọ kevbe emwiokọ gie ẹe. Iran gha ye ẹkoata ve ẹre emwi, iran ghi vbe ru vbene iran ve.

²² E Nọyaẹnmwa gha rri ivbi Igipt oya, sokpan, ọ gha vbe mu iran egbe rran. Iran gha fiwerriẹ bu irẹn rre, rẹn ghi vbe mu iran egbe rran.

²³ Ọ gha sẹ ẹghẹ ne a kha na, ukpo ne gbodoo okpa gha rrọ ne ọ ke Igipt ya sẹ Asiria. Ivbi ẹvbo eveva na ghi gha la ẹe yo la ẹe rre do gha mu ẹlẹ tue egbe, ẹvbo eveva na ghi vbe gha ga kugbe.

²⁴ Ọ gha sẹ ẹghẹ ne a kha na, Izrẹl gha gu Igipt kevbe Asiria mwa ẹrrẹe avbe okpẹvbo eheha na ghi gha re afianma ne uhunmwu otọ agbọn hia.

²⁵ E Nọyaẹnmwa ne Oghodua gha fiangbe iran, ọ ghi kha wẹẹ, “I gha fiangbe uwa wa ne Igipt ne emwa mwẹ, wa ne Asiria ne imẹ yii kevbe uwẹ Izrẹl ne emwa ne imẹ hannọ zẹ.”