Aizaia 18 - Edo Bible (E Baibol Ẹdo) Version 1996

Osanobua Gha Rri E Sudan Oya

¹ A gha fian ẹzẹ e Sudan rra nẹ, otọ ọkpa rrọọ ne a na họn vbe emwi a gha gbe ifuẹn.

² Avbe ukọ ẹvbo ghi gha ke ẹvbo nii ya okọ ne a ya irunmwu do lele e Naẹl rre. Iran ghi gha werriegbe yo owa iran. Avbe ukọ ne okhian kẹe! Wa ya ta uhunmwu ne a gie uwa re gie ẹvbo uwa ne ẹzẹ ghae ye inu ihe ne ọ khin, ẹvbo uwa nii ne ọ wegbe ne ọ vbe mwẹ ẹtin, gie avbe emwa ruẹn ni taẹn, ni vbe mwẹ egbe nọ rriẹe, ne emwa hia mu ohan rẹn vbe otọ agbọn na.

³ Wa danmwehọ, emwa hia ni rre otọ agbọn na! Wa gualọ afiala ama ya mu ba ye avbe uhunmwu oke, wa ghi danmwehọ okpe ne ọ tu.

⁴ E Nọyaẹnmwa tama mwẹ wẹẹ, “I gha hẹko gbaro ghe otọ ke ẹrinmwi rre zẹ vbene evbu ya si koko vbe asọn vbe ẹghẹ emwiorhọ nọ mwẹ ọghae kherhekherhe kevbe zẹ vbene ovẹn gbe ẹkun sotọ yunmwu vbe ẹghẹ ogiavan.

⁵ Ọ te do sẹ ẹghẹ ne a ya rhọ avbe ọmọ erhan ayọn si koko, vbe avbe obobo ẹre a ghi khuọnnọ kua nẹ ighe te ọmọ rẹn ghi vboo, avbe eghian gha fuẹn emwa e Sudan uan vbene ẹ i na vbe lọghọ iran urumwẹ zẹ vbene ẹ i lọghọ erọ vbe ọ gha giagia abọ hin azara rre.

⁶ A gha sẹ ikun avbe ivbiyokuo iran ni wulo rae ne avbe ahianmwẹ kevbe aranmwe oha. Avbe ahianmwẹ ghi gha rri iran vbe ẹghẹ owowo, avbe aranmwẹ oha gha rri iran vbe ẹghẹ okhuakhua.”

⁷ Ẹdẹ dee ne Nọyaẹnmwa gha na miẹn emwi ihaoko vbe obọ ẹvbo na ne ẹzẹ ghae ye inu ihe ne ọ khin, ẹvbo ni wegbe ni vbe mwẹ ẹtin na, ẹvbo ni taẹn ne ikpakpa egbe ẹre vbe rrie na, ne emwa mu ohan rẹn la otọ agbọn hia. Iran gha rri Oke Zaiọn, ehe ne a na ga e Nọyaẹnmwa ne Oghodua.